రుచి...the temptation

అప్పాలు

2012-01-21T14:06:00.000+05:30

గోధుమ పిండీ, బియ్యపిండీ కలిపి అప్పాలు చేస్తారు. అరిశలు కష్టం అనుకునేవారు ఇలా రెండుమూడు రకాల పిండిలు కలిపి అప్పాలు చేసుకోవచ్చు. మరోరకం అప్పాలు సజ్జ పిండితో(bajra) చేస్తారు. వాటినే సజ్జప్పాలు అంటారు.

నేను ఈసారి గోధుమ పిండీ, బియ్యపిండీ + సజ్జ పిండి కలిపి అప్పాలు చేసాను. బాగా వచ్చాయి.

ఇదిగో రెసిపీ:

* గోధుమపిండి: రెండు గ్లాసులు
* బియ్యప్పిండి :ఒక గ్లాసు
* సజ్జపిండి: ఒక గ్లాసు
* ఒక చిప్ప కొబ్బరి కోరు
* బెల్లం తురుము: రెండు గ్లాసులు
* పావు కప్పు నెయ్యి
* ఐదారు ఏలకుల పొడి
* అప్పాలు వేయించటానికి తగినంత నూనె

విధానం:

* పిండిలన్నీ బాగా కలిపి జల్లించి ఉంచుకోవాలి.

* బెల్లంతురుములో గ్లాసుడు నీళ్ళు పోసి ఉండపాకం పట్టాలి. (కాస్త పాకం చెంచాతో తీసి నీళ్ళల్లో వేస్తే కరగకుండా గట్టిపడుతున్నట్లు ఉండాలి)

* బెల్లం పాకం తయారవ్వగానే కొబ్బరికోరు, జల్లించి ఉంచిన పిండి పాకంలో పోసి ఉండలు కట్టకుండా బాగా కలపాలి. యాలకుల పొడి, నెయ్యి కూడా ఈ కలిపేప్పుడే వేసేయాలి.

* నాలుగైదు నిమిషాలు పొయ్యి మీద మొత్తం మిశ్రమం బాగా కలిపి బాగా దగ్గర పడినట్లు కనబడ్డాకా స్టౌ ఆపేయాలి. తయారైన ఉండ ఇలా ఉంటుంది.

* చలిమిడి లాగ ఉన్న ఆ మిశ్రమం కొద్దిగా చల్లారాకా(ఎక్కువ చల్లారిపోతే గట్టిగా అయిపోతుంది) గోరుచెచ్చగా ఉండగానే చిన్న చిన్న ఉండలు చేసుకుని, పాల కవర్ మీదో లేక అరిటాకు మీదో కాస్తంత నూనె రాసి, చేత్తో గుండ్రంగా వత్తుకోవాలి. (మరీ సన్నంగా వత్తనక్కర్లేదు.)

* వత్తిన వెంఠనే నూనెలో వేయించాలి.

* పొంగిన అప్పాలను ఏదైనా గరిటతో లేదా అరిశలు వత్తే చెక్కతో వత్తాలి. ఇలా వత్తటం వల్ల ఎక్సెస్ నూనె అంతా బయటికి వచ్చేసి అప్పాలు ఫ్లాట్ గా అవుతాయి.

* ఇలా చేసుకున్న అప్పాలు పదిహేను ఇరవై రోజులు నిలవ ఉంటాయి. అప్పటికి ఇంట్లో వాళ్ళు డబ్బా ఖాళీ చేసేయకుండా ఉంటే..:)

వాంగీబాత్

2012-01-19T19:57:00.000+05:30

కావాల్సిన పదార్ధాలు:

బియ్యం: 300gms
వంకాయలు: 250gms
ధనియాలు : రెండు చెంచాలు
కొబ్బరి : పావుకప్పు (తురిమినది)
మినపప్పు: రెండు చెంచలు
శనగపప్పు: రెండు చెంచాలు
ఇంగువ : చిటికెడూ
దాల్చిన చెక్క: చిన్న ముక్క
లవంగాలు: మూడు
పసుపు : పావు చెంచా
ఉప్పు: తగినంత
జీడిపప్పు: 10
నూనె: మూడు చెంచాలు
నెయ్యి: రెండు చెంచాలు

క్రింద చెప్పిన పదార్ధాలన్నీ కలిపి మెత్తగా గ్రైండ్ చేసుకోవాలి:

* ధనియాలు, మినపప్పు, శనగపప్పు, దాల్చిన చెక్క, లవంగాలు, కొబ్బరి,7 లేక 8 ఎండు మిరపకాయలు, ఇంగువ కాస్తంత నూనెలో వేయించి మెత్తగా పొడికొట్టుకోవాలి లేదా గ్రైండ్ చేసుకోవాలి.

తయారీ:

* ముందుగా బియ్యాన్ని కడిగి, పులిహోరకు వండినట్లు కాస్త బిరుసుగా వండి చల్లారబెట్టి ఉంచాలి.

* వంకాయలు చిన్నగా తరిగి రెండు మూడు చెంచాల నూనెలో నూనెలో వేసి, ఉప్పు వేసి మూత పెడితే ముక్కలు త్వరగా మగ్గుతాయి.

* వేగిన కూరలో గ్రైండ్ చేసుకున్న మసాలపొడి వేసి,పసుపు వేసి బాగా బాగా కలపాలి.

* తర్వాత చల్లారిన అన్నం కూరలో వేసి బాగా కలుపుకోవాలి. అన్నం పొడిగా ఉంటే వాంగీబాత్ ముద్దవ్వకుండా ఉంటుంది.

* అన్నం, కూర బాగా కలిసాకా స్టౌ ఆపేయాలి.

* చివరగా నెయ్యిలో జీడిపప్పు వేయించాలి.

* జీడిపప్పు వేయించిన నెయ్యి వాంగీబాత్ లో కలిపేసి, పైన జీడిపప్పు + కొత్తిమీర కలిపి అలంకరించాలి.

పండుమిరమకాయ - చింతకాయ పచ్చడి

2011-12-15T21:08:00.000+05:30

బజార్లో ఎక్కడ చూసినా పండుమిరపకాయలే ! ఎర్రగా భలే ఉన్నాయి చూట్టానికి. పండు మిర్చి కారం తింటే మాత్రం గూబ గుయ్యే !! అది క్రితం ఏడాది పెట్టాను. ఈసారి పండుమిర్చి, చింతకాయలు కలిపి పచ్చడి చేద్దామని ట్రై చేసాను. బాగానే వచ్చింది.

కావాల్సినవి:

పండుమిర్చి 200gms

చింతకాయలు 300gms (క్వాంటిటి ఇలా అయితే బాగా కారం లేకుండా ఉంటుంది పచ్చడి)

ఉప్పు తగినంత (పచ్చడిలో ఎవరెంత వేసకుంటే అంత)

పోపుకి:

మూడు పెద్ద చెంచాల నూనెలో ఆవాలు, మినపప్పు , 1/2sp ఇంగువ, 1/2sp పసుపు.

చేయటం:

* పండుమిరపకాయలు కడిగి ఆరబెట్టి, తడిలేకుండా ఆరాకా గ్రైండ్ చేసుకోవాలి.
* చింతకాయలు గ్రైండర్ సాయంతో కానీ రోట్లో కానీ కాస్త తొక్కి గింజ తీసేసి, గ్రైండర్లో ముద్దగా చేసి పెట్టుకోవాలి.
* తర్వాత తగినంత ఉప్పు వేసి చింతకాయ, పండు మిర్చి రెండు ముద్దలు మెత్తగా గ్రైండ్ చేసేయాలి.
* పైన చెప్పిన పదార్ధాలతో పోపు పెట్టి, స్టౌ ఆపేసాకా అందులో ఈ గ్రైండ్ చేసిన ముద్ద వేసి బాగా కలిపి, చల్లారాకా సీసాలో స్టోర్ చేసుకోవటమే.

*వేడి వేడి అన్నంలో ఈ పచ్చడి వేసుకుని, ఓ చెంచా నెయ్యి లేదా పప్పునూనె వేసుకుని తింటే....ఆహా..!!

* చింతకాయ, పండుమిర్చి రెండూ బాగా వేడి చేసే పదార్ధాలు కాబట్టి ఈ పచ్చడి తిన్న రోజున తప్పకుండా ఓ గ్లాసుడు పల్చని మజ్జిగ తాగితే మంచిది...:))

ఓట్స్ దోశ

2011-12-13T17:09:00.000+05:30

ఓట్స్ ఉపయోగాలూ, ఉప్మా గురించి(వ్యాఖ్యల్లో) గతంలో రాసాను. ఇప్పుడు ఓట్స్ దోశ గురించి చెప్పుకుందాం..

కావాల్సినవి:

ఒక గ్లాస్ ఓట్స్

ఒక గ్లాస్ దంపుడు బియ్యం లేదా white rice

ఒక గ్లాస్ ఉప్పుడు బియ్యం (par boiled rice)

అర గ్లాసు అటుకులు

అర గ్లాసు మినపప్పు

చెయ్యటం:

* పైనవన్ని కలిపి మూడు గంటలు నానబెట్టుకున్నాకా, తగినంత ఉప్పు వేసి మెత్తగా రుబ్బుకోవాలి.

* రుబ్బిన పిండి మరో మూడు నాలుగు గంటలు అట్టేబెట్టాలి. లేదా రాత్రికి రుబ్బేసి పొద్దుటిదాకా బయట ఉంచేసి తర్వాత కూడా వేసుకోవచ్చు. అప్పుడు స్పాంజ్ దోశల్లాగ దోశలు ఉబ్బుతాయి.

* కేరెట్, చౌ చౌ, బీన్స్ మొదలైన కూరలు చిన్నగా తరిగి, కాస్త ఉప్పు వేసి ఒక్క ఉడుకు రానిచ్చి తీసేయాలి.

* దోశ వేసాకా పైన ఉడికిన కూర ముక్కలు, అల్లం పచ్చిమిరపకాయ ముక్కలు చల్లితే ఓట్స్ దోశ రెడీ.

* కూర ముక్కలు లేకుండా ఒట్టి దోశ కూడా వేసుకోవచ్చు ఇలా...

(కాల్చిన)అరటికాయ పొడి కూర

2011-12-07T11:33:00.001+05:30

మరుగున పడిపోతున్న మంచి మంచి ఆంధ్రా వంటకాల్లో ఒకటి ఈ అరటికాయ పొడి కూర. వంకాయను కాల్చి పచ్చడి చేసినట్లు అరటికాయను కూడా కాల్చి ఈ కూర చేస్తారు. ఓపిక ఉంటే అరటికాయను కుంపటిలో కాల్చవచ్చు లేదా స్టౌ మీద కూడా కాల్చవచ్చు.

ఎలా చెయ్యాలంటే:

* ముందుగా పచ్చి అరటికాయకు కాస్త నూనె రాసి పొయ్యి మీద పెట్టాలి. అన్నివైపులా అరటికాయ బాగా కాలేలా కాల్చాలి. (ముచిక బాగ కాలి రాలిపోతే అతఇకాయ బాగా కాలినట్లు.) క్రింద ఫోటోలోలాగ.

* తర్వాత తొక్కలోపలి అరటికాయకి మసి అంటకుండా జాగ్రత్తగా తొక్కవలవాలి. వలిచిన అరటికాయ లోపల ఇలా ఉంటుంది..

* కాల్చిన అరటికాయ కు (మీ కారానికి)తగినంత అల్లం,పచ్చిమిర్చి ముద్ద తొక్కి పెట్టుకోవాలి.

* తర్వాత మూకుడులో రెండు చెంచాల నూనె వేసి, శనగపప్పు,మినపప్పు,ఆవాలు,జీలకర్ర,చిటికెడు పసుపు,కర్వేపాకు వేసి పోపు పెట్టుకోవాలి. పోపు వేగాకా అల్లం పచ్చిమిర్చి ముద్ద వేసి, అది వేగాకా మేష్ చేసిపెట్టుకున్న అరటికాయ పొడి అందులో వేసి, తగినంత ఉప్పు వేసి బాగా కలిపి రెండు నిమిషాల తరువాత దింపేసుకోవాలి.

* చూడటానికి అరటికాయ ముక్కలు ఉడకబెట్టి అల్లం,పచ్చిమిర్చి వేసి పోపు కూర వండుకున్నట్లే ఉంటుంది. కానీ రుచిలో తేడా ఉంటుంది. నిమ్మరసం ఇష్టముంటే వడ్డించేముందు కూరలో అరచెక్క నిమ్మరసం పిండివచ్చు.

ఆయిల్ ఫ్రీ పొంగడాలు

2011-11-30T15:08:00.000+05:30

వెయిట్ కాన్షియస్నెస్ కీ, ఆయిల్ ఫ్రీ డైట్ కీ ప్రాముఖ్యత పెరిగిపోతున్న ఈ రోజుల్లో, నూనె లేకుండా తినగలిగే స్నాక్స్ లో ఈ ఆయిల్ ఫ్రీ పొంగడాలు ఒకటి. చేసుకోవటం కూడా సులువు. ఇవి చేసుకోవటానికి షాపుల్లో ఇడ్లీ ప్లేట్ మాదిరిగా గుంటలు ఉండే నాన్స్టిక్ కడాయీ అమ్ముతారు.

వీటి తయారీకి ఫ్రెష్ గా రుబ్బుకున్న దోశ పిండిని వాడుకోవచ్చు. అప్పుడే రుబ్బిన పిండి కన్నా పిండి చివరికి వచ్చేసాకా కాస్త పుల్లబడుతుంది కదా అప్పుడు చేసుకున్నా రుచి బాగుంటుంది. దోశ పిండిలో ఉల్లిపాయలు, పచ్చిమిర్చి, కొత్తిమీర, అల్లం తురుము కలుపుకోవాలి. కేరెట్ ఇష్టముంటే తురుముకుని కూడా కలుపుకోవచ్చు. పొంగడాలను అందులోని గుంటలకు నూనె రాయవచ్చు, లేదా అస్సలు నూనె రాయకుండా కూడా చేసుకోవచ్చు. పొంగడాల ప్లేట్ లో పిండి ఇలా వేసుకోవాలి.

ఓ ఐదు నిమిషాలు మూత పెట్టి, తర్వాత పొంగడాల ప్లేట్ కొనేప్పుడు ఇచ్చే కోన్ లాంటి చెక్క గరిటెతో వాటిని రెండో వైపుకి తిప్పుకోవాలి. నాన్స్టిక్ కాబట్టి అడుగున ఆంటుకోవు. తేలికగా వెనక్కు తిరిగిపోతాయి.

మరో నాలుగైదు నిమిషాలు ఉంచాకా ఎర్రబడ్డాయి అనిపించాక స్టౌ ఆపేయాలి. ఆయిల్ ఫ్రీ పొంగడాలు రెడీ.

రెండవ రకం పొంగడాలు:

అర కప్పు సగ్గుబియ్యం,
ఒక కప్పు బియ్యం,
అర కప్పు మినపప్పు కూడా నానబెట్టి పొంగడాలకు పిండి రుబ్బుకోవచ్చు. ఈ పిండిలో కూడా పైన చెప్పినట్లు కొత్తిమీర, అల్లం, ఉల్లిపాయ,కేరెట్ అన్నీ వేసి చేసుకోవటమే.

దబ్బకాయ ఊరగాయ

2011-11-28T14:31:00.001+05:30

దబ్బకాయ !! పేరులోనే గొప్ప ఫీల్ ఉంది కదా. మంచి పసుపు రంగులో చూడముచ్చటగా ఉంటుంది దబ్బకాయ. అందుకే మనుషుల రంగును చెప్పేప్పుడు "పచ్చగా దబ్బపండు ఛాయలో.." అని అంటూంటారు. దబ్బకాయతో పప్పు, పులిహోర, ఊరగాయ మొదలైనవి చేసుకుంటారు. అన్నీ బాగుంటాయి. జ్వరం వచ్చి తగ్గాకా ఆ చప్ప నోటికి అంత దబ్బకాయ అన్నం రుచి చూపిస్తే...లాలాజలం ఊరుతుంది. దబ్బ ఆకులు వేసవికాలం మజ్జిగలో వేసుకుని తాగితే ఆ మజ్జిగ రుచి అద్భుతం. మా కాకినాడ ఇంట్లో పనసచెట్టు తో పాటూ దబ్బచెట్టు కూడా ఉండేది. బోలెడు కాయలు కాసేది. పనసకాయలతో పాటూ దబ్బకాయలు, దబ్బ ఆకులు కూడా మాతో విజయవాడ వస్తూండేవి. చాలా మంది ముళ్ళ చెట్టు ఇంట్లో ఉండకూడదు కొట్టించెయ్యమని అనేవారు కాని మేము కొట్టించలేదు. ఎందువల్లో మేం స్కూల్లో ఉన్న రోజుల్లోనే ఆ దబ్బచెట్టు చచ్చిపోయింది..:((

సిటీల్లో దబ్బకాయలు అరుదుగా దొరుకుతాయి. ఆంధ్రాకి వచ్చాకా ఎక్కడా దొరకలేదు కానీ బొంబాయిలో ఓ షాపులో ప్రియా పచ్చళ్ళ వారి "Citron pickle"(దబ్బకాయఊరగాయ) దొరికేది మాకు. ఇప్పుడు వాటి సీజన్ అనుకుంటా క్రితం వారం మర్కెట్లో దొరికాయి. కాస్త రంగు తేలేదాకా ఆగి ఒక కాయతో పులిహోర, పప్పు చేసి, మరో కాయతో మొన్న ఊరగాయ పెట్టాను. ఇదే మొదటిసారి నేను పెట్టడం. ముక్కలింకా ఊరకపొయినా నిన్ననే వచ్చిన గెస్ట్ లకి భోజనంలో వడ్డించి బాగుందనిపించుకున్నా...:))

ఊరగాయ చేసే పధ్ధతి:

* ముందుగా ముక్కలు తరిగి ఉప్పు, కాస్త పసుపు వేసి కలిపి ఓ పూట ఎండలో పెట్టాలి. ఇలా

* తర్వాత ఒక మీడియం సైజు దబ్బకాయకు 100gms మెంతులు, 50gms ఆవాలు విడి విడిగా ఎర్రగా వేయించుకోవాలి. ఆవాలు నొక్కితే పొడి అవ్వాలి.అలా వేగాలి. అవి రెండూ కూడా చల్లారాకా విడి విడిగా మిక్సీ లో పొడి చేసి ఉంచుకోవాలి.

* తర్వాత ఒక చిన్న గ్లాసుడు (సుమారు వంద గ్రాములు) నూనె మూకుడులో పోసి పొయ్యిమీద కాగనివ్వలి. కాగిన నూనెలో పావు చెంచా ఇంగువ వేసి ఇంగువ నూనె కాగ నివ్వాలి.

* కాగిన ఇంగువ నూనెలో 125 gms ఎండు మిరపకాయ కారం వేసి నల్లబడకుండా వేగగానే స్టౌ ఆపేయాలి.

* మిక్సీ చేసుకున్న మెంతి పిండి, ఆవ పిండి, 125 gms ఉప్పు, ఒక పెద్ద చెంచా పసుపు పొయ్యి మీది కరమ్ ఉన్న మూకుడులో వేసి బాగా కలపాలి.

* ముక్కలు తరిగేప్పుడు బాగా పండిన దబ్బకాయలైతే రసం కారుతుంది. అది కూడా ఓ గిన్నెలో పోసి అట్టేపెట్టుకోవాలి. ఈ రసాన్ని ఇప్పుడు ఊరగాయ కలిపేప్పుడు అందులో పోసేయాలి.

* ఎండలో పెట్టిన దబ్బకాయ ముక్కలు (పొద్దుట ఎండలో పెట్టి సాయంత్రమో, మధ్యాన్నమో తీసేయచ్చు) పైన చేసుకున్న పిండిలో వేసి మళ్ళి స్టౌ వెలిగించి ఓ ఐదు నిమిషాలు కలుపుతు ఉంచాలి. దీన్ని మా ఇంట్లో పొక్కించటం అంటారు. (వేరే పేర్లు ఉన్నాయేమో తెలీదు).

* మరో పధ్ధతిలో ముక్కలు పొయ్యి మీద పెట్టకుండా రెండు రోజుల పాటు ఎండబెట్టి మాగాయకులాగ కూడా ఈ ఊరగాయ చేసుకోవచ్చు.

* మర్నాడు ఊరగాయలో ఊట ఎక్కువ రాకపోతే కాస్తంత నూనె పోసుకోవచ్చు. ఓ వారమైతే ముక్కలు బాగా ఊరి తినటానికి బాగుంటాయి. ఊరగాయ పెట్టిన మర్నాడు ముక్కలు రాకుండా పిండి వేసుకుని తినేయచ్చు. రుచి.... తిని చూడాల్సిందే !!

mixed vegetable "కూటు"

2011-11-25T13:18:00.000+05:30

నాకు తెలిసీ "కూటు" అన్ని కూరలు కలిపి చేసుకోవచ్చు, లేక విడివిడిగా ఆనపకాయ, కేరెట్, గుమ్మడికాయ, కేబ్యేజ్ తో, బీట్ రూట్ తో, చౌ చౌ తో, బీన్స్ మొదలైన కూరలతో కూడా చేసుకోవచ్చు. రెండు మూడు రకాలుగా దీన్ని వండుకుంటారు.

* కొందరు శనగపప్పు, మినప్పప్పు, కొబ్బరి,ధనియాలు, మిరియాలు కలిపి వేయించి పొడి చేసి ఉడికిన కూరముక్కలు , పప్పు కలిపి చేస్తారు.

* కొందరు ఈ పొడి లోనే ఒక కొబ్బరి చిప్ప మొత్తం గ్రైండ్ చేసి పప్పు లేకుండా ఒట్టి కూరముక్కల్లో కలిపి వండుతారు.

* కొందరు కూరముక్కలు లేకుండా ఈ పొడిని ఒక్క పప్పులోనే కలిపి వండుతారు.

నేను నేర్చుకున్న mixed veg కూటు లో ingredients ఏంటంటే:

* రెండు చెంచల నూనెలో
* ఒక చెంచా శనగపప్పు
* ఒక చెంచా మినపప్పు
* మూడు నాలుగు ఎండు మిరపకాయలు
* 11/2 చెంచాల ధనియాలు
* చిన్న దాల్చిన చెక్క ముక్క
* ఒక చెంచా గసగసాలు
* (కొందరు ఒక చెంచా మిరియలు కూడా వేసుకుంటారు. నేను వెయ్యను)
* ఫ్రెష్ కొబ్బరి తురుము రెండు మూడు చెంచాలు లేదా చిన్న చిన్న కొబ్బరిముక్కలు పైన ఐటెమ్స్ తో కలిపి వేయించుకోవచ్చు.

____ పైన చెప్పిన ఐటెమ్స్ అన్నీ బాగా వేగాకా, చల్లార్చి పొడి కొట్టుకోవాలి.

* ముఖ్యమైన పాయింట్ ఏంటంటే కూటు కు ఎప్పటికప్పుడు ఫ్రెష్ గా పొడి కొట్టుకుంటేనే రుచి బావుంటుంది.

చేసే విధానం:

* ఒక గ్లాసు కందిపప్పు (సుమారు 150gms) కాస్త పసుపు వేసి మెత్తగా ప్రెషర్ కుక్కర్లో ఉడికించుకోవాలి.

* కేరెట్, బీన్స్, క్యేబేజ్, కాలీఫ్లవర్, చౌ చౌ, ఉంటే గుప్పెడు బఠాణీ మొదలైన కూరముక్కలు (300gms అంటే పప్పుకి డబుల్ క్వాంటిటి కూర ముక్కలు ఉండాలి ఎప్పుడూ) మరీ మెత్తగా కాకూండా ఉడికించికుని ఉంచాలి. (బంగాళా దుంప, వంకాయ కూడా కలుపుకోవచ్చు ఇష్టం ఉంటే)

* ఒక కడాయీ లో ఒక చెంచ నూనె వేసి అవాలు, మినప్పప్పు, జీలకర్ర, ఇంగువ ,కర్వేపాకు పోపు వేయించాలి.

* వేగిన పోపులో ఉడికిన పప్పు, కూరముక్కలు, గ్రైండ్ చేసి ఉంచుకున్న మసాలా పొడి అన్నీ వేసి బాగా కలపాలి. కలిపేప్పుడు కూర ముక్కలు ముద్దగా అవ్వకుండా చూసుకోవాలి.

* ఒక ఐదు నిమిషాలు ఉంచాక స్టౌ ఆపేసి తరిగిన ఫ్రెష్ కొత్తిమీర కూటు పై చల్లి వడ్డించటమే.

* అన్నం లోకైతే మరి పల్చబడకుండా ఉంచేయాలి. చపాతిలోకో, దోశ లోకో అయితే ఉడికేప్పుడు కాస్త నీరు కలిపితే జారుగా బావుంటుంది.

బెంగుళూరు వంకాయ (chow chow) తో రకాలు...

2011-11-24T14:56:00.000+05:30

వంకాయతో ఏమాత్రం పోలిక లేని ఈ కూరను "బెంగుళూరు వంకాయ" అని ఎందుకు అంటారో అర్ధం కాదు...:( ఇది బెంగుళూరులో ఎక్కువగా దొరుకుతుందో ఏమో మరి. నార్త్ లో దీన్ని చౌ చౌ(chow chow) అని పిలుస్తారు. ఇంగ్లీష్ లో chayote అంటారు. చలికాలంలో ఎక్కువగా మార్కెట్లోకి వస్తాయి ఇవి. ఇక ఈ కూరతో అమ్మ "కూటు" మాత్రమే చేసేది. ఇదీ కర్ణాటక వంటకమే . చౌ చౌ మార్కెట్లో కొనేప్పుడు లేతవి చూసి కొనుక్కోవాలి. ముదిరిపోతే పీచు వచ్చేసి రుచి బాగుండదు.

ఇంట్లో బహుకొద్ది కూరలు తినేవాళ్ళతో ఈ వంటకం తినిపించటానికి నేను ఈ కూరతో కొన్ని ప్రయోగాలు చేసాను. అదృష్టం బాగుండి ఈ కూర నా కూరలమార్కెట్ లిస్ట్ లో ఏడ్ అయిపోయింది. తెలియనివాళ్ళకు ముందు ఇది ఎలా వండాలో చెప్తాను...చెక్కు తీసేసి మధ్యకు కోయాలి. అందులో మావిడికాయలోలాగ జీడి ఉంటుంది. అది తీసేయాలి. క్రింద ఫోటోలోకలాగ.

అలా జీడి తీసేసిన చౌ చౌ ని చిన్న చిన్న ముక్కలు చేసుకుని, ఎన్ని ముక్కలు ఉన్నాయో వాటికి సగం నీరు(ఉడికాకా వార్చాల్సిన అవసరం లేకుండా కొన్నే నీళ్ళన్నమాట) పోసి, కాస్తంత ఉప్పు వేసి ఒక్క విజిల్ వచ్చేలా కుక్కర్లో ఉడికించుకోవాలి. ముద్దయిపోతుందనిపిస్తే వీడిగా ఉడకపెట్టుకున్నా త్వరగా అయిపోతుంది. ఇలా ఉడకపెట్టుకున్న కూరముక్కలతో నాలుగైదురకాల కూరలు వండుకోవచ్చు.

1) మినప్పప్పు, శనగపప్పు, జీలకర్ర, ఆవాలు, కర్వేపాకు, ఎండుమిర్చి, పచ్చిమిర్చి వేసి ఉట్టిగా పోపు కూర వండుకోవచ్చు. ఆనపకాయ లాగ.

2) పోపు వేసాకా తురిమిన ఫ్రెష్ కొబ్బరి కూరలో వేసుకోవచ్చు. కొబ్బరి వేసే కూరల్లాగ.

3) పోపు కూర చల్లారాకా పచ్చి ఆవపొడి వేసి ఆవ కూరలా కూడా చేయవచ్చు.

4)పొపు వేసాకా దాంట్లోనే నూపొడి కారం ( నువ్వులు వేయించి, కారం కలిపి చేసిన పొడి) వేసుకోవచ్చు. ఇది పొయ్యి మీద ఉండగానే వేసుకోవచ్చు. క్రింద ఫోలోలా ఉంటుంది.

5) అన్ని కూరముక్కలతో కలిపి లేక ఒక్క చౌ చౌ తో కూటు చేసుకోవచ్చు. "కూటు" గురించి రేపు రాస్తాను.

chow chow పచ్చడి:

తరిగిన చౌ చౌ ముక్కలను కాస్త వేయించి, చింతపండు వేసి (ఆనపకాయముక్కలతో చేసినట్లుగానే) పచ్చడి చేసుకొవచ్చు.

----------- --------------

* ముక్కలు ఉప్పు వేసి ఉడకఎట్టుకుని సలాడ్ లాగ కూడా తినవచ్చు.

ఈ బెంగుళూరు వంకాయ తినటం వల్ల ఉపయోగాలు ఇక్కడ చదవవచ్చు.

పనసపొట్టు ఆవకూర

2011-11-23T13:33:00.000+05:30

మా కాకినాడ ఇంట్లో పేద్ద పనసచెట్టు ఉండేది. నిండా కాయలు, పిందెలతో చెట్టు కళకళాలాడుతూ ఉండేది. కాయ పండితే వంద తక్కువకాకుండా పనసతొనలు వచ్చేవి. అంత పెద్ద పెద్ద కాయలు కాసేది చెట్టు. విచిత్రం ఏంటంటే నాకు పనసతొనలు నచ్చేవి కాదు. వాటి వాసన కూడా గిట్టదు ఇప్పటికీ. కానీ పనసపొట్టు కూర మాత్రం తినేదాన్ని. మేం కాకినాడ నుండి విజయవాడ వచ్చేప్పుడల్లా చిన్న చిన్న కాయలు ఐదారు ఓ సంచీతో ఇచ్చేది మా నాన్నమ్మ. సామానుతో పాటూ ఈ సంచీ కూడా విజయవాడ వచ్చాకా కొందరికి మొత్తం కాయ, కొందరికి కొట్టిన పనసపొట్టూ పంచేవాళ్ళం. ఇప్పుడు బజార్లో పనసపొట్టు కొన్నప్పుడల్లా అవన్నీ గుర్తుకువస్తాయి.

చౌపాల్, రిలయన్స్, ఫ్రెష్ ఎట్ మొదలైన కూరలషాపుల్లో కొట్టిన పనసపొట్టు అమ్ముతారు. వీటిలో ఎక్కువ నిలవ ఉండటానికి ఉప్పు ఎక్కువ వేసేస్తారు కాబట్టి వండే ముందు రెండు మూడు సార్లు కడుక్కోవలసి ఉంటుంది. అలాకాకుండా బజార్లలో అరటిదూట, అరటి పూవ్వులు అమ్మేవాళ్ళు అమ్మే పనసపొట్టు ఫ్రెష్ గా ఉంటుంది. అందులో ఉప్పు ఉండదు. కానీ ఇలా అమ్మే చోట్లు చాలా అరుదుగా ఉంటుంటాయి. మొన్న అరటిదూట కొనటానికి వేళ్తే ఫ్రెష్ పనసపొట్టు దొరికింది. బాగానే కొట్టాడు. ఈ పనసపొట్టును సన్నగా కొట్టడం అనేది ఒక అద్భుతమైన కళ. కూర వండటం కూడా..:)

సరే ఇక ఆవ పెట్టిన పనసపొట్టు కూర చేసేసుకుందామా? ముందర బజార్లో కొన్న పనసపొట్టు ఒక్కసారి గబుక్కున కడిగేసుకుని వార్చేసుకోవాలి.

సుమారు ఓ పెద్దగ్లాసుడు పనసపొట్టుకు, నిమ్మకాయంత చింతపండు నానబెట్టుకుని రసం తీసి, ఈ పనసపొట్టు + చింతపండు రసం + బుల్లిగ్లాసుడు నీళ్ళు + తగినంత ఉప్పు + చిటికెడు పసుపు వేసి కుక్కర్లో కానీ విడిగా గిన్నెలో కానీ ఉడకపెట్టుకోవాలి.

విడిగా ఉడకపెట్టేట్లయితే కాసిన్ని నీళ్ళు ఎక్కువ పోసుకోవాలి. కుక్కర్లో అయితే ఒక్క విజిల్ వస్తే చాలు. కొన్న పనసపొట్టులో పసుపు కలిపి అమ్ముతారు కాబట్టి ఇక పసుపు వేయక్కర్లేదు ఉడికేప్పుడు. కాయ దొరికి మనమే కొట్టుకుని వండేప్పుడు అయితే ఉడికేప్పుడు కాస్త పసుపు కూడా వేసుకోవాలి. ఉడికిన పొట్టులో నీళ్ళుంటే ఇలా వార్చేసుకోవాలి. ఉడికిన పనసపొట్టు మరీ ముద్దయిపోకుండా పొడిపొడిగా ఉండాలి.

కొంతమంది ఉడకపెట్టినతరువాత పోపు వేసేప్పుడు కూడా చింతపండు రసం వేసి కాసేపు పొయ్యిమీద మగ్గిస్తారు. అప్పుడు పోపు ఫ్రెష్నెస్ పోతుందని నేను ఉడికించేప్పుడే చింతపండు రసం వేసేస్తాను. చివరగా పోపులో వేస్తాను.

ఒక మూకుడులో మూడు చెంచాల నూనె వేసి, శనగపప్పు, మినప్పప్పు, ఆవాలు, జీలకర్ర, 3 ఎండుమిర్చి, 3 పచ్చి మిర్చి, కర్వేపాకు, కాస్త ఇంగువ వేసి పోపు పెట్టేసుకోవాలి. పొపులో చివరిగా 6,7 జీడిపప్పు పలుకులు కూడా వేసుకోవచ్చు. జీడిపప్పు వద్దనుకుంటే కాసిని వేరుశనగగుళ్ళు కూడా వేసుకోవచ్చు. వేగిన పోపులో వార్చి పెట్టి ఉంచుకున్న ఉడికిన పనసపొట్టు వేసి బాగా కలిపి రెండు నిమిషాల తరువాత ఆపేసుకోవాలి.

కూర చల్లారాకా పచ్చి ఆవపొడి ఒక ముప్పావు చెంచా(ఇది ఇది సుమారు ఓ పెద్దగ్లాసుడు పనసపొట్టుకు) అందులో వేసి బాగా కలుపుకోవాలి. నోరూరించే పనసపొట్టు కూర రెడీ !!

పనసపొట్టుకూరలోకి చిట్టొడియాలు కాంబినేషన్. (చిన్నగా పెట్టుకునే మినపఒడియాలు). కొన్నిచోట్ల ఈ ఒడియాలు వేయించి కూరలో కలిపేస్తారు కూడా.

అన్నంలోకే కాక, చపాతిల్లోకి కూడా ఈ కూర బావుంటుంది. టెస్టెడ్ & ట్రైడ్ అన్నమాట.

అరటిపువ్వు పచ్చడి

2011-11-22T11:30:00.000+05:30

అరటిపువ్వులో vitamin E పుష్కలంగా ఉంటుంది. చాలా మంచిది. అరటిపువ్వు ముఫ్ఫై రోజులు వరుసగా వాడితే బ్లడ్ సుగర్ లెవెల్స్ తగ్గుతాయని క్రింద వెబ్సైట్ లో రాసాడు....వాడకం వల్ల శరీరానికి చేకూరే మరిన్ని లాభాల గురించీ ఇక్కడ చూడండి.

ఇదివరకూ అరటిపువ్వు వడలు గురించి రాసాను. ఇప్పుడు పచ్చడి చేస్కుందాo..

ముందుగా ఒక అరటిపువ్వు తీసుకుని, చేతికి కాస్త నూనె రాసుకుని(లేకపోతే వేళ్ళు నల్లగా అయిపోతాయి) ఆ పువ్వులో చివర ఉన్నవి వలుచుకోవాలి. ఆ తరువాత వాటిల్లోంచి క్రింద ఫోటోలో చూపించినవి తొలగించవలెను. లేకపోతే చేదు,వగరు కలగలిపి ఒక వింత టేస్టు వస్తుంది. అది మనం భరించలేము.

* ఆ తర్వాత వాటిని కాస్త ఉప్పు వేసి (క్రింద ఫోలోలాగ) రోటిలో కాస్తంత కచ్చాగా తొక్కుకోవాలి లేదా గ్రైండర్ లో ఒక్కసారి బర్రున తిప్పేసుకోవాలి.

* * ఆ తొక్కిన/గ్రైండ్ చేసిన పదార్ధాన్ని గట్టిగా పిండుకోవాలి. అలా చేయటం వల్ల వగరంతా పోతుందన్నమాట. పిండేసాకా క్రింద ఫోటోలోలా ఉంటుంది.

* అప్పుడొక ముద్ద రెడీ అవుతుంది. అదే మనకు కావాల్సిన పదార్ధం. ఆ ముద్దనే వడలకు, పచ్చడికీ, కూరకూ వాడతారు.

పచ్చడి విధానం:

* అర చెంచాఆవాలు, అర చెంచా మినప్పప్పు, కాస్త జీలకర్ర, కాస్త ఇంగువ,రెండు ఎండు మిరపకాయలు వేసి పోపు వేయించి పెట్టుకోవాలి.

* తర్వాత పైన చెప్పిన విధంగా పిండేసి పెట్టుకున్న ముద్దను రెండు చెంచల నూనెలో మాడకుండా 2,3mins వేయించాలి.

* వేయించిన ముద్దలో :

నానబెట్టిన (మీడియం సైజు నిమ్మకాయంత) చింతపండు,

తగినంత ఉప్పు(పైన పిండేందుడుకు కాస్త ఉప్పు వేసాం కాబట్టి తక్కువగానే వేసుకోవాలి)

రెండు పచ్చిమిర్చి, రెండు ఎండుమిర్చి (పోపుతో వేగినవి)

* పైనరాసినవన్నీ కలిపి మెత్తగా గ్రైండ్ చేసుకోవాలి. గిన్నెలోకి తీసాకా వేయించి ఉంచికున్న పోపు వేసి కలుపుకోవాలి.

* టేస్టీ టేస్టీ అరటిపువ్వు పచ్చడి రెడీ. అద్భుతమైన ఆ రుచి కోసం కొంచెం కష్టమైన విధానమే అయినా చేసేసుకోవాలి. తప్పదు మరి...:))

వాక్కాయ-కొబ్బరికాయ పచ్చడి

2011-09-15T17:34:00.000+05:30

మార్కెట్లోకి వక్కాయలు వచ్చాయి.. మరి పచ్చడి చేసేస్కుందామా? వాక్కాయలు మరీ పండిపోకుండా గ్రీన్ గా ఉన్నవి కొనుక్కోవాలి.. ఇలా..

వాటి మధ్యన గింజలు తీసేయాలి క్రింద ఫోటోలోలాగ. లేకపోతే పచ్చడి చేదొస్తుంది.

కొబ్బరికాయ పచ్చడి ఎలా చేసుకుంటామో అలానే అన్ని పాళ్ళు తీసుకుని, చింతపండు బదులుగా ఈ వాక్కయల్ని వాడాలి. అంతే.

కొలతలు కావలంటే:

* మొదట ఆవలు, మినపప్పు (కాస్త ఎక్కువ), కాస్త జీలకర్ర, రెండు ఎండు మిర్చి, కాస్త ఇంగువ, ఓ రొబ్బ కర్వేపాకు లతో పోపు పెట్టుకోవాలి.

తర్వాత:

* ఒక కొబ్బరి చిప్ప (మొత్తం కాదు సగమే..:)) చిన్నగా ముక్కలు తరుక్కోవాలి లేదా కోరుకోవాలి

* ఎనిమిది లేక పది వాక్కాయలు (ఎక్కువ వేస్తే పులుపు తినలేము)

* రెండు పచ్చిమిర్చి

* తగినంత ఉప్పు ,చిటికెడు పసుపు

* పోపుతో వేయించిన ఎండు మిరపకాయలు

* పైన చెప్పినవన్నీ కలిపి గ్రైండ్ చేసేసుకోవాలి. మెత్తగా గ్రైండ్ అయ్యిన పచ్చడిలో మొదట్లో పెట్టుకున్న పోపు కలిపేసుకోవాలి.

* పోపు కూడా పచ్చడితో గ్రైండ్ చేసేస్తారు కొందరు. కానీ పెరుగు పచ్చడిలో అయినా, రోటి పచ్చడిలో అయినా పోపు చివరన వేస్తేనే మధ్య మధ్య వేగిన మినపప్పు తగులుతూ రుచిగా ఉంటుంది.

కేబేజీ పకోడి

2011-09-08T11:39:00.001+05:30

ఎలాగంటే:

* కేబేజీ సన్నగా తరుక్కోవాలి.

* చిన్న అల్లం ముక్క తురుముకోవాలి.

* ఒక మీడియం సైజు ఉల్లిపాయ కూడా సన్నగా తరుక్కోవాలి.

* ఇవన్నీ కలిపి, ఉప్పు, కారం వేసి ఉల్లిపాయపకోడి కి కలుపుకున్నట్లే శనగపిండి, దాంట్లో పావు వంతు బియ్యప్పిండి వేసి గట్టిగా పిండి కలుపుకోవాలి.

* కొలత కావాలంటే పావుకేజీ కేబేజీ తరుగుకి, సుమారు 60gms శనగపిండి, 15gms బియ్యప్పిండి కలపాలన్నమాట.

*మూకుడులో నూనె కాగాకా పకోడీలు వేయించుకోవటమే.

:::::::::: ****** ::::::::::: ******

మొన్న నా బజ్ లో నేను షేర్ చేసుకున్న మిరపకాయ బాజ్జీలు...మొక్కజొన్న వడలు....మీరూ చూసేయండి...

కొబ్బరన్నం with & without masala

2011-09-06T19:17:00.000+05:30

మసాలా లేకుండా:

* ముందుగా ఒక గ్లాస్(nearly 150gms rice) అన్నం వండేసుకోవాలి.

* మూడు చెంచాల నూనె/నెయ్యిలో క్రింద ఐటెమ్స్ తో పోపు పెట్టుకోవాలి:
శనగపప్పు రెండు చెంచాలు,
మినపప్పు రెండు చెంచాలు,
ఆవాలు ఒక చెంచా,
జీలకర్ర ఒక చెంచా,
ఇంగువ పావు చెంచా,
కర్వేపాకు రెండు రొబ్బలు,
మూడు ఎండు మిరపకాయలు,రెండు పచ్చిమిరపకాయలు.

* బఠాణీ ఇష్టమైతే గుప్పెడు నానబెట్టుకుని ఉడికించుకోవాలి విడిగా

* చివరిగా ఒక చిప్ప తురిమిన కొబ్బరికోరు వేసి స్టౌ ఆపేయాలి.

* విడిగా పెట్టుకున్న అన్నంలో పైన వేయించిన పోపు వేసేసుకుని, బఠాణీ , తగినంత ఉప్పువేసి బాగా కలిపేసి దింపేసుకోవాలి.

* పది జీడిపప్పు పలుకులు విడిగా వేయించుకుని రైస్ పైన అలంకరించచ్చు.

* ఇది సింపుల్గా అయిపోయేది. బజార్లో ఈ మధ్యన కొబ్బరిపాలు అమ్ముతున్నారు. రుచి కావాలనుకునేవారు బియ్యం ఉడికేప్పుడు కాస్త నీరు తగ్గించుకుని ఆ కొబ్బరిపాలు కలిపి కుక్కర్లో పెట్టుకుంటే బాగుంటుంది.

***********************************

మసాలాతో కొబ్బరన్నం:

మసాలా దినుసులు:
1 అంగుళం దాల్చిన చెక్క,
2,3 ఏలకులు,
2,3 లవంగాలు,
ఒక పెద్ద ఉల్లిపాయ తరిగినది,
అల్లం వెల్లుల్లి పేస్ట్ ఒక చెంచా
బఠాణీ ఇష్టమైతే గుప్పెడు నానబెట్టుకుని ఉడికించుకోవాలి విడిగా,
ఒక చెక్క కొబ్బరి కోరు,

విధానం:
* దాల్చిన చెక్క,ఏలకులు,లవంగాలు వేయించి గ్రైండ్ చేసుకోవాలి.
తర్వాత కాస్త నూనెలో ఉల్లిపాయ ముక్కలు కూడా వేయించుకుని, రెండూ కలిపి ఒక గ్లాసు(nearly 150gms rice) బియ్యం + కొబ్బరికోరు కూడా వేసేసి కుక్కర్లో ఉడికించాలి. మాములుగా రైస్ ఉడికేంత టైం చాలు.

* పది జీడిపప్పు పలుకులు విడిగా వేయించుకుని రైస్ పైన అలంకరించచ్చు.

*బజార్లో ఈ మధ్యన కొబ్బరిపాలు అమ్ముతున్నారు. రుచి కావాలనుకునేవారు బియ్యం ఉడికేప్పుడు కాస్త నీరు తగ్గించుకుని ఆ కొబ్బరిపాలు కలిపి కుక్కర్లో పెట్టుకుంటే బాగుంటుంది.

* ఉల్లిపాయ,టమాటో ముక్కలతో చేసిన రైతా ఇందులోకి బావుంటుంది.

Russian salad

2011-08-30T19:54:00.001+05:30

నాకు బాగా ఇష్టమైన, నేను తరచూ చేసే సలాడ్ ఇది. కాకపోతే రకరకాల హోటల్స్ లో రకరకాల పదార్ధాలతో చేస్తారు. అంటే కొందరు పొటాటో, కేప్సికం కూడా వేస్తారు. కొందరు అవి వెయ్యరు. నేను ఎలా చేస్తానంటే:

* పైనాపిల్ ముక్కలు, కేరెట్ , బఠాణీ, బీన్స్ ముక్కలు వాడతాను. బఠాణీ ఫ్రెష్ వి దొరకని సీజన్లో నానబెట్టి, విడిగా ఉడకబెట్టి కలుపుతాను. కూరముక్కల కన్నా ఎక్కువ టైమ్ తీశుకుంటాయి కదా ఉడకటానికి అందుకు.

* కేరెట్ , బీన్స్ రెండూ కొంచెం ఉడకబెట్టిన ముక్కలు. పూర్తిగా మెత్తగా అవ్వకుండా కాస్త మెత్తబడితే చాలు. (half-boiled అన్నమాట)

* ఈ ముక్కలు రెండు కప్పులు ఉన్నాయంటే డ్రెస్సింగ్ కోసం క్రింద పదార్ధాలన్నీ తీసుకుంటాను..

1) నాలుగు చెంచాలు మయోన్నీస్( నేను ఎగ్లెస్స్ వాడతాను. ఎగ్ ఉన్నదయినా వాడచ్చు)

2) చిటికెడు ఆవపొడి

3) అర చెంచా ఉప్పు

4) వైట్ పెప్పర్ లేక బ్లాక్ పెప్పర్ అర చెంచా

5) ఫ్రెష్ క్రీం నాలుగు చెంచాలు(ఇది వెయ్యకపోయిన పర్వాలేదు). ఫ్రెష్ క్రీం బజార్లో చిన్న చిన్న పేకెట్లలో దొరుకుతుంది.

* పైన రాసిన నాలుగు పదార్ధాలు బాగా కలిపేసి; పైనాపిల్, బఠాణీ, కూర ముక్కలు అందులో వేసి మళ్ళీ బాగా కలపాలి.

* పైన ఫోటోలో సలాడ్లో నేను ఎక్కువ క్రీం వేయలేదు. weight problem లేనివారు క్రీం ఎక్కువ కావాలంటే వేసుకోవచ్చు.

* కొందరు అర చెంచా పంచదార కూడా వేస్తారు కానీ మయోన్నీస్ లో కాస్త షుగర్ ఎలానూ ఉంటుందని నేను వెయ్యను.

* యమ్మీ యమ్మీ టేస్టి రష్యన్ సలాడ్ రెడీ. సర్వింగ్ బౌల్ చుట్టూరా పైన ఫోటోలోలాగ బత్తాయి లేక కమలా గానీ అలా గుండ్రని స్లైసెస్ చేసి పెట్టుకుంటే కలర్ఫుల్ గా ఉంటుంది. ఆ ముక్కలు కూడా సలాడ్ తో పాటూ తినొచ్చు.

బీట్రూట్ - ఆవ కూర

2011-08-29T15:39:00.001+05:30

బీట్రూట్ తో వండుకునే కూఅల్లో ఇదీ ఒక రకం.

కావాల్సినవి:

బీట్రూట్ - రెండు పెద్దవి

పోపుకు : ఆవాలు,శనగపప్పు,మినపప్పు, జీలకర్ర, 2 ఎండుమిర్చి, 2 పచ్చిమిరపకాయలు, కర్వేపాకు

అర చెంచా పచ్చి ఆవపొడి

పోపుకి తగినంత నూనె

తయారీ:

* బీట్రూట్ ముక్కలు చిన్నగా తరిగి, ముక్కలు ఎంత క్వాంటిటి ఉన్నాయో వాటికి సగం వంతు నీళ్ళు పోసి, తగినంత ఉప్పు కుక్కర్లో ఉడకపెట్టుకోవాలి. (కుక్కర్లో ఉడకపెట్టే ఏ ముక్కలకయినా ఇలానే నీళ్ళు పోస్తే, నీళ్ళు వేస్ట్ అవ్వవు. వాటిలోని పోషకాలు కూడా పోకుండా ఉంటాయి.)

* మూకుడులో పోపు వేసుకుని ఉడికిన ముక్కలు అందులో వెయ్యాలి. రెండు నిమిషాల తరువాత ఆపేయ్యాలి. కారం సరిపోకపోతే కాస్తంత ఎండుమిరప పొడి వేసుకోవచ్చు.

* కూర చల్లారిన తరువాత అరచెంచా ఆవ పొడి వేసి బాగా కలపాలి. ఆవ ఎక్కువ అస్సలు వేయకూడదు. ఘాటుగా ఉంది తినలేము. వేడి మీద వేస్తే చేదు వచ్చేస్తుంది.

* ఈ కూర అన్నంలోకే కాక చపాతీల్లోకి కూడా బావుంటుంది.

బీట్రూట్, కేరెట్, మావిడల్లం కలిపి ఇలా చిన్నచిన్న ముక్కలు చేసుకుని సాల్ట్, చిన్న చిన్నపచ్చి మిర్చి ముక్కలు కలిపి, నిమ్మరసం పిండుకుంటే సైడ్ డిష్ క్రింద బావుంటుంది. పప్పులోకి బావుంటాయి ఈ ముక్కలు. మావిడల్లం దొరకకపోయినా బీట్రూట్, కేరెట్లతో ఇలా చేసుకోవచ్చు.

బీట్రూట్ పచ్చడి కూడా చాలా బావుంటుంది. అది మరోసారి చెప్పుకుందాం.

* సుగర్ ఉన్నవాళ్లకు మంచిది కాదు కానీ డయాబెటిస్ లేనివాళ్ళకు బీట్రూట్ ఎంతో మంచిది.

*కేల్షియం,మెగ్నీషియం, సోడియం,పొటాషియం, B1, B2, B3, B6 and C మొదలైన విటమిన్లు కలిగిన బీట్రూట్ శరీరానికి ఎంతో మేలు చేస్తుంది.

* రక్తం పెరగటానికి ఉపయోగపడే బీట్రూట్ కొలెస్ట్రాల్ తగ్గిచటానికి,

* బ్లడ్ ప్రెషర్ తగ్గించటానికీ కూడా ఉపయోగకరం అని పరిశోధనల్లో తెలిసిందట.

మిక్స్డ్ వెజిటెబుల్ ఆవకాయ

2011-08-17T19:20:00.001+05:30

మావిడికాయతో పెట్టుకునే పర్మెనెన్ట్ ఆవకాయ కాకుండా టెంపరరీగా కేరెట్, కాకరకాయ, ములక్కడ, పచ్చిమెరప, కాలీప్లవర్, టమాటా మొదలైన కూరలతో కూడా టెంపరరీ ఆవకాయ పెట్టుకుంటాం కదా. అలానే కొన్ని కూరలు కలిపి కూడా మిక్స్డ్ వెజ్ ఆవకాయ పెట్టుకోవచ్చు. ఎలాగో చూసేస్తారా మరి..

కావాల్సిన కూరలు, పదార్ధాలు:

* కాలీప్లవర్
* బీన్స్
* కేరెట్
* బంగాళా దుంప(పచ్చిదే)
* బఠాణీ(నానబెట్టినవి)
* టమాటా (కొంచెం గట్టిగా ఉన్నది చిన్న ముక్కలు తరుక్కోవాలి)

పైన రాసిన కూరలన్నీ ఓ 250gms దాకా ఉండేలా చిన్నముక్కలు తరుగుకోవాలి. (అన్నీ పచ్చివే.)

* 1 inch కట్ చేసిన వెల్లుల్లి ముక్కలు, 1 inch కట్ చేసిన పచ్చిమిరప ముక్కలు ఒక అర కప్పు తీసుకోవాలి.

మొత్తం కూరముక్కలన్నీ కలిపి ఒక గిన్నెలో అరచెంచా పసుపు వేసి ఉంచాలి. ముక్కల్లో తడి ఉండకూడదు.

* అల్లం-వెల్లుల్లి పేస్ట్ - 20gms (బజార్లో అమ్మేది కొనుక్కున్నా సరే, ఇంట్లో తడి తగలకుండా గ్రైండ్ చేసుకున్న సరే)
* ఆవపిండి - 30gms
* కారం - 30gms
* ఉప్పు - 30gms
* నిమ్మరసం - 1/2 cup
* పసుపు - 1/2 sp

* oil - 1 cup

తయారీ:

* ముందుగా అల్లం-వెల్లుల్లి పేస్ట్ మాడకుండా వేయించుకోవాలి. పచ్చివాసన పోతే చాలు.

* ఆవ,కారం ,ఉప్పు బాగా కలుపుకోవాలి. ఇందులో కూరముక్కలు, అల్లం-వెల్లుల్లి పేస్ట్ వేసి బాగా కలుపుకోవాలి.

* చివరిలో నిమ్మరసం వేసి కలుపుకోవాలి.

కొన్ని టిప్స్:

* ఓపిక ఉంటే ఒక ఉల్లిపాయ గ్రైండ్ చేసి, ఆ ముద్దను మచ్చివాసన పోయేలా కాస్త నూనెలో బాగా వేయించి ఈ ఆవకాయలో కలిపితే కూడా రుచి బావుంటుంది.

* చేసిన రెండ్రోజుల తరువాత తింటే కూర ముక్కలు ఊరతాయి.

* ముక్కలు ఎక్కువగా ఉంటే దోశల్లోకి ,చాపాతిల్లోకి కుడా బావుంటుందని నేను పిండి తక్కువ కలుపుతాను. పిండి ఎక్కువ కావాలనుకునేవాళ్ళు ఆవ,కారం,ఉప్పులను మరో పది గ్రాములు ఎక్కువగా కలుపుకోవచ్చు.

* నిమ్మరసం వెయ్యకపోతే ఈ ఆవకాయ రెండ్రోజుల కన్నా నిలవ ఉండదు. పాడయిపోతుంది.

* ఈ ఆవకాయ ఒక నెల రోజులు నిలవ ఉంటుంది కానీ ముక్కలు మెత్తబడిపోతే రుచి తగ్గిపోతుంది. అందుకని కొద్దిగా పెట్టుకుంటేనే బావుంటుంది.

పచ్చి టమాటా తో ' మెంతిబద్దలు '

2011-08-05T14:36:00.000+05:30

పచ్చి టమాటాలతో పప్పు, పచ్చడి చాలా బావుంటాయి. పచ్చి టమాటాలతో చేసే 'మెంతి బద్దలు ' ఇంకా బావుంటాయి. అన్నం లోకీ, చపాతీల్లోకీ కూడా బావుంటాయి.

పచ్చి టమాటా తో మెంతిబద్దలకి కావాల్సినవి:

ఆకుపచ్చని పచ్చి టమాటాలు - 3

మెంతులు - నాలుగు స్పూన్లు
ఆవాలు - మూడు స్పూన్లు
మినపప్పు - ఒక స్పూన్
ఎండు మిరపకాయలు - నాలుగైదు
రెండు చెంచాల నూనె
చిటికెడు ఇంగువ
అర చెక్క నిమ్మరసం

తయారీ:

* ముందుగా అర చెంచా నునెలో మెంతులు, ఆవాలు,మినప్పప్పు బాగా వేగనిచ్చి తరువాత ఎండు మిర్చి కూడా వేసి, అన్నీ వేగాకా స్టౌ ఆపే ముందర కాస్తంత ఇంగువ వేయాలి.

* పైన వేయించిన మెంతులు అవీ చల్లారాకా మిక్సీ లో మెత్తగా గ్రైండ్ చేసుకోవాలి.

* ఈ పిండిని తరుగుకున్న పచ్చి టమాటా ముక్కల్లో కలిపి, మిగిలిన నూనె పోసి బాగా కలపాలి.

* దీనిలో అర చెక్క నిమ్మరసం కూడా పిండుకోవాలి.

ఇది ఎక్కువ నిలవ ఉండదు. కాబట్టి తక్కువ మోతాదులోనే చేసుకోవాలి. రెండ్రోజులు ఉన్నా కూడా ఫ్రిజ్ లో పెట్టుకుంటే పాడవకుండా ఉంటుంది. మెంతులు వేయించే బదులు ఆవాలు వేగాకా కొందరు మెంతి పిండి, మిరపకాయల బదులు ఎండు మిర్చి కారం వాడుతూ ఉంటారు. అలా కూడా చేయచ్చు కానీ రుచిలో కొంచెం తేడా ఉంటుంది..:)

ములక్కాడ(drumstick) తియ్య కూర

2011-06-20T12:43:00.000+05:30

కావాల్సినవి:
* రెండు పెద్ద ములక్కాడలు
* అర చిప్ప కోరిన కొబ్బరి
* నాలుగు పెద్ద చెంచాలు నానబెట్టిన బియ్యం
* సుమారు 50gms బెల్లం లేక పంచదార (తీపి ఇష్టమున్నవారు మరికాస్త ఎక్కువ తీపి వేసుకోవచ్చు)
* పోపు కు : ఆవాలు, జీలకర్ర, మినపప్పు, రెండు ఎండు మిరపకాయలు.
* రుచికి సరిపడా ఉప్పు.

తయారీ:
* రెండు గంటల ముందుగా బియ్యం నానబెట్టి, కూర వండే ముందు తురిమిన పచ్చి కొబ్బరి వేసి మెత్తగా, జారుగా గ్రైండ్ చేసుకోవాలి.

* ములక్కాడ ముక్కలు రెండంగుళాలు చప్పున ముక్కలు తరుక్కుని, చిటికెడు ఉప్పు వేసి ఉడకబెట్టుకోవాలి. కుక్కర్లో పెడితే ఒక్క స్టీం రాగనే ఆపేయాలి. ఏ రకంగా ఉడకపెట్టిన ముక్కలు ముద్దవ్వకుండా చూసుకోవాలి.

* మూకుడులో గ్రైండ్ చేసిన బియ్యం, కొబ్బరి పేస్ట్ కు గ్లాసుడు నీళ్ళు(150ml) కలిపి పోసి అడుగంటకుండా ఉడకనివ్వాలి.

* బియ్యప్పిండి కాస్త ఉడికినట్లు అనిపించాకా అందులో బెల్లం లేదా పంచదార వెయ్యాలి.

* ఈ మిశ్రమం వండేప్పుడు ఎంత జారుగా ఉంటే అంత మంచిది. ఎందుకంటే వండిన కాసేపటికి (బియ్యంతో రుబ్బిన పేస్ట్ వేయటం వలన) గట్టిపడి అంతా గట్టి ముద్దగా అయిపోతుంది.
* బెల్లం / పంచదార కరిగాకా ఉడికిన ములక్కాడ ముక్కలు వేసి, చిటికెడు ఉప్పు కూడా వేయాలి. (రుచి చూసి చాలా తక్కువగా ఉప్పు వేసుకోవాలి.)

* మొత్తం అంతా మరో ఐదు నిమిషాలు ఉడికాకా పైన చెప్పిన పదార్ధాలతో విడిగా పోపు పెట్టి, ఉడుకుతున్న ఈ కూరలో కలపాలి.

* దీనిని అన్నంలో కాకుండా విడిగా ఏదైనా స్వీట్ తిన్నట్లే మేము తినేవాళ్ళం.

బియ్యo నానబెట్టి రుబ్బటం కష్టమైతే బియ్యప్పిండి కూడా అప్పటికప్పుడు వాడుకోవచ్చు కానీ బియ్యం నానబెట్టి చేసుకుంటేనే రుచి బావుంటుంది. ములక్కాడ ముక్కలు మరీ మెత్తగా కాకుండా, అలాగని పచ్చిగా కాకుండా సమంగా ఉడికేలా చూసుకుంటే ఈ కూర రుచి బాగుంటుంది.ఇది తియ్యగా ఉంటుందని దీనినే మేము "ములక్కాడ పరమాన్నం" అని కూడా అనేవాళ్ళం.నాకు ఇష్టమని మా పిన్నివాళ్లు మా ఊళ్ళో ఉన్నన్నాళ్ళు ఇది చేసినప్పుడల్లా నాకు పంపిస్తూ ఉండేది. పిన్ని దగ్గర ఇది నేర్చుకున్నాను.

పుదీనా రైస్

2011-06-13T16:57:00.003+05:30

మొన్నొకరోజు మా కజిన్ ఫోన్ చేసి "రుచి.. లో రైస్ ఐటెమ్స్ రాయట్లేదేం? నీ బ్లాగ్ లో పెట్టిన ఒకే ఒక రైస్ రెసిపి(మెంతికూర రైస్) ప్రయోగం చేసాను. చాలా బాగా వచ్చిందని" చెప్పింది. విని నేనూ చాలా సంతోషించాను. నేను అదివరకూ " రైస్ వెరైటీస్" బాగా చేసేదాన్ని. ఎక్కడెక్కడో రాసుకుని వచ్చి రోజుకో రకం రైస్ వెరైటీ ప్రయోగం చేసి ఇంట్లోవాళ్ళతో తినిపించిన రోజులు ఉన్నాయి..:) ఇప్పుడు దంపుడుబియ్యం మొదలెట్టాకా వైట్ రైస్ తినటం, ప్రయోగాలు చేయటం చాలా తగ్గిపోయింది. సరే నేను ఎక్కువ తినకపోతేనేం అప్పుడప్పుడు వచ్చినవి రాస్తే చదివేవారు చేసుకుని తింటారు కదా అని అప్పుడప్పుడు రైస్ వెరైటీలు రాయాలని నిర్ణయించుకున్నానన్నమాట !

ఇవాళ "పుదీనా రైస్" గురించి రాస్తాను.

కావల్సినవి:

* బాస్మతిబియ్యం గాని/ మామూలు బియ్యం గానీ రెండు కప్పులు(ఎలక్టిక్ రైస్ కుక్కర్ కు ఇచ్చే ప్లాస్టిక్ కప్పు కొలత)

* ఒక పెద్ద కట్ట కానీ రెండు మీడియం సైజు కట్టలు వలిచిన పుదీనా ఆకు(పైన
ఉదాహరణకి ఇచ్చిన కప్పైతే ముప్పావు కప్పు రుబ్బిన ముద్ద అవ్వాలి)

* మూడు మిర్చి సన్నగా పొడుగ్గా కట్ చేసుకోవాలి.(ఎక్కువకారం కావాలంటే ఇంకొన్ని ఎక్కువ మిరపకాయలు వేస్కోవాలి)

* రెండు లవంగాలు, ఒక ఇంచ్ దాల్చిన చెక్క

* ఒక పెద్ద చెంచా అల్లం,వెల్లుల్లి పేస్ట్(నచ్చకపోతే మానేయచ్చు)

*రెండు మూడు చెంచాల నూనె

* కావాలంటే అరచెక్క నిమ్మరసం

తయారీ:

* ముందు బియ్యం వండేసుకుని ముద్దల్లేకుండా పొడిగా విడదీసుకుని ఉంచాలి. (కావాలంటే ఒక చెంచా నెయ్యి వేసుకోవచ్చు.)

*వలిచిన పుదీనా ఆకు (పచ్చిదే) కాస్త నీళ్ళు పోసుకుని గ్రైండ్ చెసుకోవాలి. ముద్ద గట్టిగా కాకుండా జారుగా ఉండాలి. క్రింద ఫోటోలోలాగ.

* మూకుడులో నూనె వేసి అందులో దాల్చిన చెక్క, లవంగాలు వేసి కాస్త వేగాకా అల్లం వెల్లుల్లి పేస్ట్, తరిగిన పచ్చిమిర్చి ముక్కలు వేసుకోవాలి.

* అది వేగాకా రుబ్బిన పుదీనా ఆకు ముద్ద కలిపి అందులో ఉన్న నీరంతా బాగా ఇగర నివ్వాలి. క్రింద ఫోటోలోలాగన్నమాట.

* తరువాత వండి ఆరబెట్టిన అన్నం కొంచెం కొంచెం వేస్తూ, మొత్తం కలిసేలాగ బాగా కలపాలి. క్రింద ఫోటోలోలాగ. పుదీనారైస్ రెడీ !!

* ఇందులో కావాలంటే స్టౌ పైనుండి దింపిన తరువాత నిమ్మరసం కలుపుకోవచ్చు. లేకపోయినా తినేయచ్చు.

ఆంధ్రా pizza

2011-05-31T19:49:00.000+05:30

ఇదేంటి అచ్చం పీజా లాగే ఉంది అని చూస్తున్నారా? ఇది ఇడ్లీ పిండితో వేసిన మినపట్టు. నాలుగు రోజులకు రుబ్బుకున్న ఇడ్లీ పిండి చివరకు వచ్చాకా ఇడ్లీలు పుల్లబడతాయని నేను చివరి పిండిని అట్లుగా వేస్తుంటాను.(చాలామంది ఇలానే చేస్తారు) వాటిని నేను ఉత్తి అట్లుగా కాక ఇలా రకరకాలుగా ప్రయోగాలు చేస్తానన్నమాట.

ఇక ఫోటోలోని దానిపై ఏమేమి పదార్ధాలు వేసానంటే:

* సోయా గ్రాన్యూల్స్

* టమాటా ముక్కలు

* సన్నగా పొడుగ్గా తరిగిన పచ్చిమిరపకాయ ముక్కలు

* గ్రేటేడ్ ఉల్లిపాయ ముక్కలు

* గ్రేటేడ్ అల్లం

ఈ ఫోటోలోది రోస్ట్ అయ్యాకా రూపం. బావుంది కదా?

చేసే విధానం:

ఈ అట్టు రుచి అంతా "సోయా గ్రాన్యూల్స్" వల్లే. ఒక లేయర్ పిండి వేసి మళ్ళీ కాసిని సోయా గ్రాన్యూల్స్ చల్లి, మళ్ళీ ఒక గరిట ఇడ్లీ పిండి వేసేసి పైన మళ్ళి సోయా గ్రాన్యూల్స్ + పైన చెప్పిన ఉల్లి, టమాటా మొదలైన ముక్కలు వేసు చక్కగా రోస్ట్ చేసుకుని లాగించటమే.

సోయా గ్రాన్యూల్స్ బజార్లో దొరుకుతాయి. అవి గోరువెచ్చని ఉప్పు నీటిలో వేసి ఐదు నిమిషాల తరువాత నీరు వంపేసి, గట్టిగా పిండేయాలి. అవి చపాతీ కూరల్లో కూడా ఓ గుప్పెడు వేస్కోవచ్చు. చేసే కూర ఏదైనా రుచి తేడా రాదు + పోషకాలు వెళ్తాయి. అదన్నమాట !

One salad - Two dressings !!

2011-05-25T13:05:00.000+05:30

mixed sprouts

dressing one :(ఈ ప్రయోగం నిన్న రాత్రి చేసాను)

white pepper
Eggless mayonnaise(ఇది Egg ఉన్న mayonnaise కన్నా బెటర్ అని నా అభిప్రాయం. ఏదైనా mayonnaise ఎక్కువ తినకూడదంటారు. once in a while పర్లేదన్నమాట...:))

a pinch mustard powder
salt (as per the taste)
red chilli powder (1/2 sp)
తరిగిన కొత్తిమీర
తురిమిన కేరెట్

dressing 2: (ఈ ప్రయోగం ఇవాళ పొద్దున్న చేసాను)

tomato sauce ఒక పెద్ద sp
soya sauce ఒక పెద్ద sp
salt (as per the taste)
red chilli powder (1/2 sp)
తరిగిన కొత్తిమీర
తురిమిన కేరెట్

రెండింటిలో కలిపిన mixed sprouts మరియు ఇతర పదార్ధాలు :

మొలకలొచ్చిన పెసలు, మొంతులు(పెద్దగా చేదు ఉండవు), ఉలవలు, బొబ్బర్లు, నల్ల శనగలు, తెల్ల శనగలు, బఠాణీలు, మొన్న కొన్న అల్ఫాల్ఫా మొలకలు + కేప్సికం, కొద్దిగా స్వీట్ కార్న్ గింజలు.

ఇవన్నీ కూడా కుక్కర్లో ఉప్పు వేసి కొంచెం ఉడికించాలి. అంటే ఒక విజిల్ వచ్చాకా ఆపేయాలి. బాగా ముద్దగా ఉడకనివ్వకూడదు. ఉడకబెట్టకుండా కూడా తినచ్చు. నాలా గడ్డి గాదం తినేవాళ్ళకి ఇబ్బంది ఉండదు కానీ పాపం శ్రీవారిలా పచ్చివి తినటానికి కష్టపడేవాళ్ళకి కొద్దిగా ఉడకబెట్టి చేస్తే ప్రసన్నంగా తినగలరన్నమాట.

ఇక డ్రెస్సింగ్ ఐటేమ్స్ అన్నీ కలిపేసుకుని దాన్లో ఈ ఉడకబెట్టిన మొలకలన్నీ కలిపేసుకోవాలన్నమాట. సలాడ్ రెడీ ! నిన్న రాత్రి ఇవాళ పొద్దున్న రెండు రకాలు తినాకా మేం ok కాబట్టి మీరూ ప్రయత్నించవచ్చు...:)

Gujarati 'chundo'

2011-05-18T18:00:00.002+05:30

"చుండో" పచ్చిమావిడికాయలతో చేస్తారు. దీనిని చెపాతీలతో తింటారు గుజరాతీవాళ్ళు. మేం బొంబాయిలో ఉన్నప్పుడు మా ఇంటి పక్కన ఒక గుజరాత్ వాళ్ళు ఉండేవారు. ఆవిడ నాకు భక్రీ, చుండో మొదలైనవి టేస్ట్ చూపించి ఎలా చేయాలో చెప్పేవారు. నేనూ ప్రతి వేసవిలో తప్పనిసరి చేస్తుంటాను. ఇవాళే చేసాను. ఎలా చేయాలంటే:

రెండు పచ్చిమావిడికాయల తురుము
మావిడి తురుములో సగం కొలత పంచదార
ఉప్పు రెండు చెంచాలు
కారం ఒకటిన్నర చెంచాలు
జీలకర్ర ఒక చెంచా
పసుపు అర చెంచా

* పుల్లటి పచ్చడి మావిడికాయలు రెండింటిని తురుముకోవాలి.
* ఆ తురుములో అరచెంచా పసుపు, రెండు చెంచాల ఉప్పు కలిపి మూడు గంటలు పక్కన పెట్టాలి. (ఊట ఊరుతుంది.)
* తర్వాత తురుముకు సగం కొలత ఉన్న పంచదార తీసుకుని దాంట్లో కలిపి మందపాటి మూకుడులో పొయ్యి మీద పెట్టాలి.
* పంచదార తురుముకి వుప్పావు వంతు కూడా వేసుకోవచ్చు ఇష్టం ఉంటే.
* మధ్య మధ్య అడుగంటకుండా కలుపుతూ ఉండాలి.
* ఆ మిశ్రమం దగ్గర పడ్డాకా ఒకటిన్నర చెంచాల కారం వేసి, మరీ రెండు మూడు నిమిషాల తరువాత ఒక చెంచా జీలకర్ర వేసి దింపేసుకోవాలి.

ఇది నేను చేసిన ప్రయోగం:
ఇంట్లో ఉంటే కనుక చిటికెడు కుంకుమపువ్వు(saffron) తయారైన మిశ్రమంలో వేస్తే రుచి అమోఘం.

ఈ "చుండో" చపాతీల్లోనే కాక దోశల్లోకి కూడా బావుంటుంది. ఒక్కమాటలో చెప్పాలంటే మావిడికాయ జామ్ మాదిరి అన్నమాట. వేసవికాలంలోనే ఎందుకు చేసుకోవాలంటే పచ్చడిమావిడికాయలతో పెడితేనే రుచి బావుంటుంది. తడి తగలకుండా తయారు చేస్తే ఎక్కువ కాలం నిలవ ఉంటుంది. పిల్లలే కాక పెద్దలు కూడా ఇష్టంగా తింటారు(తీపి ఇష్టమున్నవాళ్ళు).

మరో ట్రెడిషనల్ పధ్ధతి కూడా ఉంది. మా ఇంటిపక్క గుజరాతీ ఆవిడ ఇలా చేసేవారు. మావిడి తురుములో వెయ్యాల్సిన పదార్ధాలన్ని వేసేసి ఊట వచ్చాకా అది విడిగా తీసి, ఎండలో ఓ వారం పాటు రోజూ ఊట విడిగా తీసి మళ్ళీ రాత్రి కలిపి మళ్ళీ పొద్దున్నే తీసేసి(మన మజ్జిగ మెరపకాయల టైపులో) పాకం ఇగిరేదాకా ఎండలో పెట్టడం. అది కష్టం అంటే పొయ్యి మీద చేసే పైన చెప్పిన విధానం చెప్పిందావిడ. ఆవిడ పేరు బావుండేది "పారుల్" అని. అర్ధం ఏంటండీ అంటే తెలీదనేది..!

my most favourite - ఉప్పుడుపిండి పులిహోర !

2011-05-04T15:36:00.000+05:30

ఇప్పుదంటే చాలామంది రాత్రిళ్ళు అన్నం మానేసి టిఫిన్ తింటున్నారు కానీ నా చిన్నప్పుడు పెద్దలందరూ వారాలు చేసేవారు. "శనివారం","ఆదివారం","గురువారం" అంటూ. ఆయవారాల్లో రాత్రిళ్ళు తిఫిన్ తినేవారు. అలాంటి వారపు రోజుల్లో మా ఇంట్లో ఎక్కువగా చేసే టిఫిన్ ఉప్పుడుపిండి. ఇది మా అన్నయ్యకు చాలా చాలా ఇష్టం. శనివారం రాత్రి చేస్తే కొంచెం ఎక్కువ చేయించుకుని ఆదివారం పొద్దున్నే ఉప్పుడుపిండిలో ఆవకాయ కలుపుకుని తినటం వాడి మోస్ట్ ఫేవొరేట్ హాబీ ! మేం అన్నయ్య దగ్గరకు వెళ్ళినప్పుడు వాడు కలుపుకున్న (ఉప్పుడుపిండిలో) ఆవకాయ ముద్దలు అడిగి తినటం నాకూ, మా తమ్ముడికీ ఎంతో ఇష్టమైన పని. అన్నయ్య పెళ్ళిచూపుల్లో అమ్మాయికి "ఉప్పుడుపిండి చేయటం" వస్తే చాలండి ఇంకేమీ రాకపోయినా పర్వాలేదు అని చెప్పాం.

ఇక ఆ ఉప్పుడుపిండితోనే పులిహోర చేస్తారు. అది నాకు చాలా చాలా ఇష్టం. my most favourite అనొచ్చు. కానీ అది నేర్చుకొవటం తేలికైన పని కాదు. అప్పట్లో గుండ్రని ఇత్తడి గిన్నెతో వండేవారు. సులువు తెలుకోకపోతే ఓ పట్టాన సరిగ్గా చెయ్యటానికి రాదు. ఉప్పుడుపిండి చెయ్యటానికి కావాల్సినది బియ్యం రవ్వ. కాస్త నూనె, పెసరపప్పు బద్దలు వేసి, salt వేసి, కావాలంటే ఆవగింజలు, కర్వేపాకు పోపు వేసి వండుతారు. మధ్య మధ్యన గరిటెతో తిప్పుతూ ఉండటం ఇంకా కష్టం. అదివరకూ బియ్యాన్ని పిండిమరకు పట్టుకెళ్ళి రవ్వ ఆడించుకోవాల్సివచ్చేది. ఇప్పుడు "rice rawa" అని మార్కెట్లో దొరుకుతుంది. ఉండ్రాళ్ళకి రాత్రి బియ్యం తడిపి, ఆరబెట్టి, పొద్దుటే దంచి, జల్లించి నానా హైరానా పడేవారు పూర్వం. ఇప్పుడు ఉండ్రాళ్ళు కూడా దాంతోనే(rice rawa) చేసేస్తున్నారు .

ఇంతకీ నేను ఉప్పుడుపిండిపులిహోర నేర్చుకోవటానికి చాలా పరిశోధనలు చేసాను. ఇత్తడి గిన్నెలో, కుక్కర్లో, చిన్న కుక్కర్లో డైరెక్ట్ గా రవ్వ పోసి...రవ్వను ముద్దవ్వకుండా వండటానికి నానాతంటాలు పడేదాన్ని. నాన్నమ్మ, అమ్మ చేసినట్లు, పిన్నివాళ్ల అత్తగారు చేసినట్లు పొడిపొడిగా రవ్వ జలజలా రాలేలా "ఉప్పుడుపిండి పులిహోర" చెయ్యటం అసలు వస్తుందా అని బెంగ పెట్టుకున్నా కూడా. కానీ ఈ మధ్యనే కాస్త బాగా పొడిపొడిగా చెయ్యటం నేర్చుకున్నా. నాకు ఇత్తడిగిన్నె కన్నా, పెద్దకుక్కర్లో కన్నా, 2 ltrs బుల్లికుక్కర్లో డైరెక్ట్ గా వండితే బాగా వచ్చింది.

చేసే విధానం:
* ఒక గ్లాసు బియ్యం రవ్వ

ఒకటింపావు నీళ్ళు

తగినంత ఉప్పు

రెండు చెంచాలు నూనె వేసి బుల్లికుక్కర్లో డైరెక్ట్ గా సన్న సెగ మీద స్టౌ మీద పెట్టాలి. నీళ్ళు తక్కువైతే రవ్వ ఉడకదు. ఎక్కువైతే ముద్దైపోతుంది. అందుకని నీళ్ళు ఎంత పొయ్యాలో రెండుమూడు సార్లు వండితే కానీ పాళ్ళు తెలీదు. ఏ రకం బియ్యంతో రవ్వ చేసామో అన్నదాని మీద కూడా పొడిగానా,ముద్దగానా అన్నది ఆధారపడి ఉంటుంది.

* స్టౌ ఆపేసాకా బాగా చల్లారాకా మూత తీసి ఉడికిన రవ్వను ఏదైనా బేసెన్లో గానీ పెద్ద గిన్నెలో కానీ వెయ్యాలి.

* పులిహోరకు మామూలుగా పెట్టుకునే పోపు(ఆవాలు,జీలకరా,మినపప్పు,శనగపప్పు,వేరుశెనగ,కర్వేపాకు,ఎండు మిర్చి,పచ్చి మిర్చి,ఇంగువ,పసుపు) పెట్టుకుని ఆ ఉడికిన బియ్యం రవ్వలో కలపాలి. మామూలు పులిహోరలో లాగనే అల్లం తురుముకుని వేస్తే రుచి బావుంటుంది. వేరుశనగ బదులు జీడిపప్పు కూడా వేసుకోవచ్చు.

* రవ్వ బాగా ఆరాకా(చల్లారాకా) ఇందులో నిమ్మకాయ రసం పిండుకోవాలి. నిమ్మరసం బదులు మావిడి కోరుతో కూడా చేయచ్చు. చింతపండు రసం కూడా వేసి చేసుకోవచ్చు.

* చింతపండు రసంతో చేస్తే గనుక ఇందులో నూపొడెం కూడా కలుపుకోవచ్చు.

* ఇందులో పసుపు కాస్త తక్కువ వాడితే చూట్టానికి బావుంటుంది.

అన్నంలోకి ఎప్పుడైనా అన్ని ఐటెమ్స్ వండటం బధ్దకం అనిపిస్తే నేను ఇదొక్కటే + కాస్తంత రైస్ వండేసి "కర్డ్ రైస్" కూడా చేసేస్తా. రెడీగా రెండు ఐటెమ్స్ తినేసేలాగన్నమాట.

పేలాల వడియాలు

2011-04-23T14:29:00.000+05:30

పేలాల వడియాలు మొదటిసారి మా వదిన తెచ్చినప్పుడు తిన్నాను. రుచి అమోఘం. పేలాలతో చేస్తారు. మా వదినావాళ్ళ అమ్మమ్మగారు అనకాపల్లిలో ఉంటారు. ఆవిడ ఒకట్రెండుసార్లు పేలాల వడియాలు పంపించారు. చాలా నచ్చాయి మాకు. మరో రెండుసార్లు ఎవరో చేసి అమ్ముతున్నారంటే తెప్పించుకున్నాం. ఎన్నిసార్లని తెప్పించుకుంటాం? ఎలా చేయాలో తెలిసేసుకుని చేసేస్తే ఒ పనైపోతుంది కదా అని అడిగేసి మొత్తానికి ఈ ఏడు పెట్టేసాను. బాగా వచ్చాయి. ఎలా చేయాలో చెప్పేస్తాను. ఆసక్తి ఉన్నవాళ్ళు పెట్టేసుకోండి మరి.

పేలాలంటే కొంతమంది బజార్లో మరమరాలు ఇచ్చేస్తారు. మొదట నేను కూడా వాటితోనే ఒడియాలు పెట్టేసి వేయించేసరికీ అవి విరవటానికి వీల్లేకుండా వచ్చాయి. మళ్ళీ సరిగ్గా కనుక్కుని సరిగ్గా అడిగి కొని మళ్ళి పెట్టాను. అప్పుడు బాగా వచ్చాయి..:)

పేలాలు క్రింద ఫోటోలోలాగ ఉంటాయి.(తెలియనివాళ్ళకు)

ఎలా చేయాలంటే:

* అరకిలో పేలాలు తీసుకుని ఒడ్లు ఏరేసి శుభ్రం చేసుకోవాలి. నేను తడిపాకా ఆ సంగతి గ్రహించాను. అందువల్ల సరిగ్గా ఏరలేకపోయా..:)

* కాసిని నీళ్ళు తీసుకుని కాస్త కాస్త చప్పున పేలాలన్నీ ఒకసారి ముంచి తీసేసి, గట్టిగా పిండి పక్కనపెట్టుకోవాలి.

* అర కిలో పేలాలకి ఒక గ్లాసు సగ్గుబియ్యం తీసుకుని రాత్రి నానబెట్టి పొద్దున్నే వాడుకోవచ్చు. లేకపోతే అప్పటికప్పుడు రెండుగ్లాసులు నీళ్ళలో సగ్గుబియ్యాన్ని ఉడకబెట్టాలి.

* మీ కారానికి సరిపడా పచ్చిమిర్చి, కాస్తంత జీలకర్ర కలిపి గ్రైండ్ చేసుకోవాలి.

*కాసిని నువ్వులు కూడా తీసుకోవాలి.

* ఇప్పుడు నీటిలో పిండేసి ఉంచిన పేలాల ముద్ద, ఉడికిన సగ్గుబియ్యం, తగినంత ఉప్పు, రుబ్బిన మిర్చి-జీలకర్ర పేస్ట్, నువ్వులు అన్నీ కలిపి బాగా కలుపుకోవాలి. నాకులా చేత్తో కలిపి తర్వాత మంట మంట అని గోలపెట్టకుండా చక్కగా ఒక గరిటేతో మొత్తం బాగా కలుపుకోండి.

ఆ ముద్ద క్రింది ఫోటోలోలాగ ఉంటుంది. ఫోటో సరిగ్గా రాలేదు..:(

రెండు ఎండలకే బాగా ఎండిపోయాయి వడియాలు. అవి వేయించుకుని తింటే... 'ఆహా ఏమి రుచి' అనక మానరు !!

అరటిపువ్వు వడలు - no one can eat just one !

2011-04-15T20:50:00.001+05:30

హీరోయిన్ కుటుంబం ఆచూకీ తెలియక వెతికి వెతికి అలసిపోయి..అన్యమనస్కంగా ఓ హోటల్లో కూర్చున్న హీరోకి "వేడి వేడి అరటిపువ్వు వడలు ఒకావిడ వేస్తోంది తినండి" అని ఒక ప్లేట్ ఇస్తాడు వెయిటర్. హీరో బుర్రలో బల్బ్ వెలుగుతుంది. వడివడిగా హోటల్ కిచెల్ లోకి వెళ్తాడు. అక్కడ హీరోయిన్ తల్లి వడలు వేస్తూ కనబడుతుంది. కట్ చేస్తే...

సినిమా అవ్వగానే వడలు చేయటానికి "అరటిపువ్వు" ఎక్కడ దొరుకుతుందా అని చూసింది తృష్ణ...అంటే నేనేనన్నమాట..!

ఇంతకీ సినిమా గుర్తు వచ్చేసిందా? మోస్ట్ ఎంటర్టైనింగ్ మ్యూజికల్ రొమాంటిక్ మూవీ "ప్రియురాలు పిలిచింది". (ఆంగ్ల రొమాంటిక్ ఫిక్షన్ రచయిత్రి "జేన్ ఆస్టిన్" రాసిన "సెన్స్ అండ్ సెన్సిబిలిటీ" నవల ఈ సినిమాకు ఆధారం) I love the film and also the most tempting అరటిపువ్వు వడలు.

Now coming to vadas..firstly we have to buy a banana flower ..:) (అబ్బా మాకు తెలీదులే అంటున్నారు కదా..వినిపిస్తోంది నాకు...:)

కొన్న అరటిపువ్వు

అరటిపువ్వుతో

౧)ఆవ పెట్టి కూర

౨)పెసరపప్పు బద్దలతో పొడికూర

౩)పచ్చడి

౪)వడలు

ఈ నాలుగూ మా ఇంట్లో చేస్తూంటాం. నాకు పచ్చడి, వడలు ఇష్టం. ప్రస్తుతం వడల వరకూ చెప్పుకుందాం.

అరటిపువ్వును వంటకు వాడాలంటే కొంచెం శ్రమ,ఓపిక అవసరం. చేతికి కాస్త నూనె రాసుకుని(లేకపోతే నల్లగా అయిపోతాయి) ఆ పువ్వులో చివర ఉన్నవి వలుచుకోవాలి. క్రింది ఫోటోలో లాగఉన్నవన్నమాట.

ఆ తరువాత వాటిల్లోంచి క్రింద ఫోటోలో చూపించినవి తొలగించవలెను. లేకపోతే చేదు,వగరు కలగలిపి ఒక వింత టేస్టు వస్తుంది. అది మనం భరించలేము.

*ఆ తర్వాత వాటిని రోటిలో కానీ గ్రైండర్ లో కానీ కాస్త ఉప్పు వేసి కాస్తంత తొక్కవలేను.

* ఆ తొక్కిన పదార్ధాన్ని గట్టిగా పిండవలెను.

*అప్పుడొక ముద్ద రెడీ అవుతుంది. అదే మనకు కావాల్సిన పదార్ధం.

*వడలు చేసే హడావుడిలో ఇక ఆ ముద్దకు ఫోటో తియ్యలేదు..:(

ఇప్పుడు వడలు చేసే విధానం:

*అరగంట ముందుగా ఒక మీడియం కప్పు శనగపప్పు నానబెట్టుకోవాలి.

*పువ్వు వలిచి తొక్కుకునేలోపూ ఆ టైమే అవుతుంది. పైన చెప్పినట్టుగా తొక్కిన అరటిపువ్వు ముద్దను పక్కన(ఏ పక్కన తల్లీ అని ఆడగకండి) పెట్టుకోవాలి.

*నానబెట్టిన శనగపప్పు, జోలకర్ర, పచ్చిమిర్చి, కర్వేపాకు, అల్లం ముక్క అన్నీ కలిపి గ్రైండ్ చేసుకోవాలి.

* ఈ మిశ్రమానికి తరిగిన తరిగిన ఉల్లిపాయ(1) ముక్కలు కలపాలి.

* ఆ రుబ్బిన ముద్దలో అరటిపువ్వు ముద్దను కలపాలి. క్రింద ఫోటోలోలాగ ఉంటుంది మిశ్రమం.

*అప్పుడు కడాయి లో నూనె వేడి చేసుకుని వడలు వేయించేసుకోవటమే. అవి పైన పెట్టిన ఫోటోలో ఉన్నాయి కదా. ఫోటోలో పుదీనా ఆకులు జస్ట్ colourful గా ఉంటాయని పెట్టాను. వాటికీ వడలకీ లింకేమీ లేదు. ఇక చేసుకున్న వడలను పక్కనెవరన్నా ఉంటే పెట్టడం.. లేదంటే మనమే అన్నీ సుబ్బరంగా తినేయాలన్న మాట. అలా చూడకండి దిష్టి తగులుతుంది. నాక్కాదు నా వడలకి..:)

అరటిపువ్వులో vitamin E పుష్కలంగా ఉంటుంది. చాలా మంచిది. మిగిలిన

ఉపయోగాల కోసం ఇక్కడ చూడండి.

ఆదివారం పొద్దున్నే ఓట్స్ ఉప్మా !!

2011-04-10T10:19:00.001+05:30

ఇది నా ఇవాళ్టి పొద్దుటి తిఫిన్. ఆదివారం పొద్దున్నే ఓట్స్ ఉప్మా తినే మొహం నువ్వూనూ అని
నవ్వుకుంటున్నారా..? నాకేం బాధలేదు. ఆరోగ్యానికి మంచిది కాబట్టి నేను హాయిగా తినేస్తాను. అందులోనూ ఉప్మాలో మొలకెత్తిన పెసలు,కేరట్ తురుము, ఉల్లిపాయ, అల్లం, పచ్చిమెరప, కొత్తిమీర, కర్వేపాకు అన్నీ వేసాకా తినటానికేం? ఉప్మాలందు ఓట్స్ ఉప్మా మేలయా అంటారు డైటిషియన్స్, న్యూట్రీషనిస్ట్ లు కూడా. వీటిలోని పోషకాలను గురించి తెలిసాకా ఓట్స్ ను ఏదో రూపంలో వంటల్లో వాడటం మొదలెట్టాను నేను.

అబ్బే నేను ఓట్స్ ఉప్మా ఎలా చేయాలో చెప్పబోవటం లేదు.. జస్ట్ ఓట్స్ లోని పోషకాలను ఉపయోగాలను గురించి చెప్తానంటే.

ఓట్స్ రోజూ తింటే ఏమౌతుందంటే :

* ఫైబర్ రిచ్ ఫుడ్ కాబట్టి అరుగుదలను తేలిక చేస్తాయి.
* కొలెస్ట్రాల్ ను తగ్గిస్తుంది.
* బ్లడ్ షుగర్ లెవెల్స్ ను కంట్రోల్లో ఉంచుతుంది.
* రోజూ ఓట్స్ తింటే హై బ్లడ్ ప్రషర్ తగ్గుతుంది.
* ఓట్స్ లోని సాల్యుబుల్ ఇన్సాల్యుబుల్ ఫైబర్ మలబధ్ధకాన్ని తగ్గిస్తుంది.
* అధిక బరువుని తగ్గిస్తుంది.
* ఓట్స్ లో ఫొలిక్ ఏసిడ్, విటమిన్ ఈ, బయోటిన్, కాపర్, ఐరన్ మొదలైన ఉపయొగకరమైన విటమిన్లు ఉంటాయి.
*వీటిలో ఉండే "ఫైటోకెమికల్స్" కేన్సర్ వంటి జబ్బుల బారిన పడకుండా రక్షణ నిస్తాయి.

ఓట్స్ ఎలా తినచ్చు:

* వేడి పాలలో వేసుకుని కాసేపు నానాకా తినచ్చు.
* కాసిని ఓట్స్ తో సూప్ చేసుకుని తినొచ్చు.
* పైన ఫోటోలోలాగ ఉప్మా చేసుకుని తినచ్చు.
* ఓ గుప్పెడు ఓట్స్ చపాతీ కలిపేప్పుడు పిండిలో కలిపేస్తూ ఉండచ్చు.
* కాసిని ఓట్స్ గ్రైండ్ చేసేసి ఆ పొడిని దోశల పిండిలో కలిపేయచ్చు.

ఇంట్లో అందరితోనూ ఓట్స్ తినిపించాలంటే పైన రాసినవాటిలో చివరి రెండు పాటించచ్చు. కాకపోతే అలా కలిపినట్లు చెప్పకూడదన్నమాట...:)

మెంతిబద్దలు

2011-04-10T08:39:00.000+05:30

మార్కెట్లో చిన్న చిన్న మావిడికాయలు దొరకటం మొదలవగానే మా ఇంట్లో మొదట అమ్మ మెంతిబద్దలు పెట్టేసేది. ఆ తరువాత చిన్న చిన్న మావిడి పిందెలు సంపాదించి బుల్లి బుల్లి ముక్కలు కోసి ఆవకాయ పెట్టేసేది. పెద్ద మావిడికాయతో కన్నా ఇలా చిన్న చిన్న పిందెలతో పెట్టిన ఆవకాయ బద్దలు చాలా రుచిగా ఉంటాయి. లార్జ్ స్కేల్లో కొత్తావకాయ, మాగాయ, మెంతికాయ మొదలైనవి పెట్టుకునేదాకా టెంపరరీ రిసోర్సెస్ అన్నమాట ఇవి.

క్రితం వారం ఉగాదికి కొన్న చిన్న మావిడికాయ ఒకటుంటే నేనూ మెంతిబద్దలు వేసాను. చాలా బాగా కుదిరింది. చాలా వంటలు అలా కొంచెం చేసినప్పుడే బాగా వస్తూంటాయి ఎందుకో మరి. 'మెంతిబద్దలు' తెలియనివారికి ఎలా చేస్కోవాలో చెప్పెయ్యనా?

* ఆవాలు, మెంతులు 1:1 పాళ్ళలో విడివిడిగా పొడి మూకుడులో ఎర్రగా వేయించుకోవాలి. ఆవాలు వేలితో నొక్కితే పొడుం అవ్వాలి. అప్పుడు బాగా వేగినట్లు. కానీ మాడకూడదు. మెంతులు కూడా ఎర్రగా వేగాలి నల్లగా అవ్వకూడదు.

* ఒకటి రెండుకాయలకైతే ఆవాలూ,మెంటులు కలిపి వేయింఛుకోవచ్చు. కానీ నాలుగైదు కాయలకైతే ఆవాలు విడిగా, మెంతులు విడిగా వేయించుకోవాలి.

* నూనె వేడిచేసుకుని అందులో కాస్త ఇంగువ వేసి వేగాకా అందులో కారం (ఆవాలు,మెంతులతో సరిపోయేంత కొలత) వేసి స్టౌ ఆపేయాలి. కారం మరీ నల్లబడిపోకూడదన్నమాట.

* ఈ మిశ్రమం చల్లారాకా తొక్కు తీసేసి తరిగి ఉంచుకున్న చిన్న చిన్న మవిడి ముక్కలు, ఉప్పు అందులో కలిపేయటమే. మెంతిబద్దలు రెడీ.

సోయా వడలు

2011-04-05T17:45:00.001+05:30

ఇందాకా పాప ఆకలి..అని గొడవ. ఇంట్లో ఉన్నవి వద్దు ఏదన్నా కొత్తది కావాలి అని పేచీ. బిస్కెట్లు తప్ప పాపకు బయట జంక్ ఫుడ్స్ అవీ కొనము మేము. ఏదన్నా కావాలంటే వీలైనంతలో ఇంట్లోనే చేస్తూంటాను. సరే ఇందాకా ఏమున్నాయి చెయ్యటానికి అని చూస్తే రాత్రి చపాతీలోకి కూర చేద్దామని పొద్దున్నే నానబెట్టిన సోయ గింజలు కనబడ్డాయి. వాటికి ఏం కలపాలి అని ఆలోచిస్తుంటే ఫ్రిజ్లో మొలకెత్తిన పెసలు కనబడ్డాయి.(ఇవి రోజూ కాసిని తినటానికని రెండ్రోజులకొకసారి మొలకెత్తించి ఉంచుతూంటాను).

ఇదివరకూ నేను బొబ్బర్లు, పెసలు, సోయా, మొక్కజొన్న అన్నీ కలిపి నానబెట్టి రుబ్బి వడలు చేస్తూండేదాన్ని. ప్రస్తుతం ఉన్న పదార్ధాలతో వడలు చేద్దామని మొదలెట్టాను.

నానబెట్టిన సోయా గింజలు

ఏం కలిపానంటే:

ఒక కప్పుడు నానబెట్టిన సోయా గింజలు

అర కప్పు మొలకెత్తిన పెసలు

రెండంగుళాల అల్లం ముక్క

రెండు పచ్చిమిరపకాయలు

కాసిని ఫ్రెష్ పుదినా ఆకులు(ఫ్రెష్ ఎందుకంటే అవి మా గోడ మీది కుండీలోవి...:))

కలిపి గ్రైండ్ చేసేసాను.

అందులో --

ఒక చెంచా బియ్యప్పిండి

ఒక చెంచా కార్న్ ఫ్లోర్

చిన్నగా తరిగిన ఒక ఉల్లిపాయ ముక్కలు

తగినంత ఉప్పు

వేసి మొత్తం ఓసారి మళ్ళీ కలిపేసి ఫ్రై చేసేసా. వేగాకా టిష్యు పేపర్ మీద వేసేసా. ఇంకా... పాప, నేనూ కలిసి తనకి కూడా ఉంచకుండా ప్లేట్ ఖాళీ చేసేసాం...:)

ఆరోగ్యానికి ఎంతో మంచిదైన "సోయా"ను నేను ఎక్కువగానే వాడతాను. సోయా గ్రాన్యూల్స్ వెచ్చని ఉప్పునీటిలో నానబెట్టి పిండేసి అట్ల మీద, కూరల్లోనూ వేయచ్చు, సోయా పిండి చపాతీ పిండిలో ఓ గుప్పెడు కలిపేసుకోవచ్చు, కూరల్లో పన్నీర్ బదులు "టోఫు"(సోయాపాలతో చేసిన పన్నీర్) కూడా అప్పుడప్పుడు వాడుతూంటాను. సోయాలోని పోషకాల కోసం, మరిన్ని ఆరోగ్యకరమైన వివరాల కోసం ఇక్కడ చూడండి.

కొత్తావకాయ, కందిపొడి, ముద్దపప్పు !!

2011-04-02T13:21:00.000+05:30

రెండ్రోజుల క్రితం మా రాత్రి అన్నం మెనూ ఇది.

మా పెద్దత్తగారు కాకినాడ నుంచి పంపించారు. వాటిని చూడగానే నోరూరి ఇక ఆ పూటకు చపాతీలకు స్వస్తి చెప్పి(రాత్రి పూట మేం రోజూ చపాతీలే) దంపుడు బియ్యం కాకుండా వైట్ రైస్ వండేసి, వేడి వేడి అన్నంలో ఆవకాయ, కందిపొడి విత్ "ఇంట్లో చేసిన నెయ్యి" వేసుకుని సుభ్భరంగా తినేసాం. ఒక్కరోజుకు డైటింగ్ కు టాటా చెప్పచ్చు...:)

ఆవకాయలోనూ, కందిపొడిలోనూ నూనె వేసుకుని తినటం మామూలే. నెయ్యి వేసుకుని కూడా తింటే భలే ఉంటుంది. ఇక ముద్దపప్పు నాకోసం కాదు శ్రీవారి కోసం. ముద్దపప్పు + ఆవకాయ వాళ్ళింట్లో కాంబినేషన్. మరి మీరు కూడా కందిపొడి చేసేసుకుంటారా?

కందిపొడి:

కందిపప్పు : ఒక గ్లాసు
పెసరపప్పు : అర గ్లాసు
శెనగపప్పు : పావు గ్లాసు
పుట్నాలపప్పు : పావు గ్లాసు
చారెడు మినప్పప్పు (ఇది వేయకపోయినా పర్వాలేదు)
మీరు తినే కారానికి సరిపడా ఎండు మిరపకాయలు

తగినంత ఉప్పు

* ముందు పప్పులన్నీ కాసేపు ఎండబెట్టుకోవాలి. లేకపోయినా పర్వలేదు.

* తర్వాత ముందుగా కందిపప్పు దోరగా వేయించుకోవాలి.

* ఆ తరువాత మిగిలిన పప్పులు, మిరపకాయలు కలిపి మాడకుండా వేయించుకోవాలి.

* గుల్ల శనగపప్పు(పుట్నాలపప్పు) వేయించఖ్ఖర్లేదు. గ్రైండ్ చేసేప్పుడు కలిపి గ్రైండ్ చేస్తే సరి.

* వేయించిన అన్ని పప్పులు చల్లారాకా మెత్తగా గ్రైండ్ చేసుకోవాలి.

* గ్రైండ్ చేసాక ఉప్పు చివరలో కలుపుకోవాలి.

కందిపొడి రుచి పప్పులు సరిగ్గా మాడకుండా వేయించుకోవటం లోనే ఉంటుంది..:)

పెసరఉండలతో మజ్జిగపులుసు

2011-03-25T17:16:00.006+05:30

మజ్జిగపులుసును కొందరు "మజ్జిగ చారు" అనీ, కొందరు "చల్ల పులుసు" అని కూడా అంటారు. మేము "మజ్జిగ పులుసు" అంటాం. పుల్లటి పెరుగులో కానీ, తాజా పెరుగులో కానీ కాస్తంత శనగపిండి కలిపి మజ్జిగ పులుసు చేస్తారు. ఒకట్రెండు రోజుల పెరుగు కాస్త కాస్త మిగిలిపోతే, అంతా కలిపి మా ఇంట్లో అమ్మ "మజ్జిగ పులుసు" చేసేది. మరీ పులుపు మాకు ఇష్టం ఉండదు కాబట్టి కాసిని పాలు కలిపేది. మజ్జిగ మరీ పాతది కాకుండా ఉంటేనే దీని రుచి బాగుంటుంది. మా ఇంటిపక్కన కొన్నాళ్ళు గుజరాతీవాళ్ళు ఉన్నారు. వాళ్ళూ కూడా మజ్జిగపులుసు చేసేవారు. "కడీ" అంటారు వాళ్ళు. కానీ దాంట్లోనూ బెల్లం వేసేవారు. (వాళ్ళన్నింటిలోనూ, పప్పులో కూడా తీపి వేస్తారు.) మనవైపు నాకు తెలిసీ మజ్జిగపులుసులో తీపి ఎవరం వేసుకోము.

మజ్జిగపులుసులో రకాలు ఉన్నాయి :

* చిన్నఉల్లిపాయలతో(సాంబారు ఉల్లిపాయలు)
* ఆనపకాయ ముక్కలు, కేరెట్, ములక్కాడ తో
* అల్లం, ధనియాల పొడీ, కొబ్బరి పేస్ట్ తో
* పెసర ఉండలతో
* బచ్చలి ఆకుతో
* పాలకూర ఆకుతో
* ఏమీ వెయ్యకుండా ఉత్తదే.
* నేను బేబీ పొటాటోస్, ఉల్లిపాయలు వేసి కూడా చేస్తూంటాను.
* కొందరు బంగాళాదుంప బజ్జీలు, లేదా వేరే రకం బజ్జీలుగా చేసుకుని మజ్జిగపులుసులో వేస్కుంటారు.

మామూలు విధానం:
* ఒక గ్లాసు పెరుగుకి రెండు గ్లాసుల నీళ్ళు పోసి, ఉప్పు వేసి బాగా చిలుక్కోవాలి.
* శనగపిండి రెండు చెంచాలు, పావు చెంచా పసుపు ఆ చిలికిన మజ్జిగలో వేసి మళ్ళీ కాస్తంత చిలకాలి.
* ఇప్పుడీ మజ్జిగను మందపాటి గిన్నెలో లేదా మూకుడులో పోసి స్టౌ మీద పెట్టి, బాగా మరిగించాలి.
* మధ్య మధ్య కలపకపోతే అడుగంటి, మాడిపోతుంది.
* కాస్తంత కొత్తిమీర, సన్నగా పొడుగ్గా చీలికలు చేసిన ఒకటి రెండు పచ్చిమిరపకాయలు కూడా వేయాలి.
* దింపే ముందు మెంతులు, ఆవాలు, జీలకర్ర, ఇంగువ, కర్వేపాకు వేసి పోపు పెట్టాలి.

ఆకుకూరలు,కూరలతో:
బచ్చలి, పాలకూర మొదలైన వాటితో చేయాలంటే ముందర వాటిని సగం ఉడికించుకుని తరువాత మజ్జిగపులుసులో వెయ్యాలి. కూర ముక్కలతో చేసేది కూడా అంతే. ముందు ఉల్లిపాయ, కేరెట్, ములక్కాడ, ఆనపకాయ చిన్నచిన్న ముక్కలు చేసి, ఉడికించి తరువాత ఉడికే మజ్జిగపులుసులో వెయ్యాలి.

అల్లం, ధనియాల పొడీ, కొబ్బరి పేస్ట్ తో:
ఒక అంగుళం అల్లం ముక్క, పచ్చి ధనియాల పొడి ఒక చెంచా, రెండు చెంచాల ఫ్రెష్ కొబ్బరి కలిపి గ్రైండ్ చేసేసి అది పైన రాసిన మాములు మజ్జిగపులుసు ఉడుకుతున్నప్పుడు వేయాలి. దీని రుచి చాలా బాగుంటుంది. దీనిలో ఏ ముక్కలూ వేయకపోయినా బాగుంటుంది.

పెసర ఉండలతో:

* టీ గ్లాసులో 3/4 పెసరపప్పు ఓ గంట ముందు నానబెట్టాలి.
* పెసరపప్పు నానాకా, నీళ్ళు పూర్తిగా ఓడ్చేసి కాస్త ఉప్పు, పచ్చిమిర్చి(మీ టేస్టుకి తగినంత), కాస్త ఇంగువ కలిపి గ్రైండ్ చేసుకోవాలి. దీనినే పెసరపప్పు పచ్చడి అంటారు. వేడి వేడి అన్నంలో కలుపుకుని తింటే భలే ఉంటుంది.
* పైన రాసిన మామూలు మజ్జిగ పులుసు విధానం ప్రకారం మజ్జిగపులుసు చేసేసి, అది మరుగుతూండగా ఈ పెసరపప్పు ముద్దని ఒక గిన్నెలో తీసుకుని, కాస్త కాస్త చప్పున (పుణుకులపిండి నూనెలో వేసినట్లుగా) మరుగుతున్న పులుసులో వదలాలి. చేతి మీద వేడి పులుసు చిందకుండా జాగ్రత్త పడాలి మరి. ఈ పెసర పచ్చడి పులుసులో వెయ్యగానే ఉండలుగా ఎలా మారుతోంది? అని చిన్నప్పుడు ఆసక్తిగా ఉండేది చూట్టానికి.
* మరుగుతున్న పులుసులో ఈ పెసర ముద్దలు వెయ్యగానే గట్టిగా ఉండల్లా మారిపోతాయి. మరి కొంచెం సేపు మరగనిచ్చాకా దింపేసుకోవటమే.

చారులు .. రకాలు..

2011-03-24T12:09:00.009+05:30

(పైన ఫోటో లోనిది అల్లం చారు. క్రింద వరుసలో ఎనిమిదో రకం.)

అప్పుడెప్పుడో "బ్లాగాడిస్తా" రవిగారు చారు మీద ఒక అద్భుతమైన టపా రాసారు. ఆసక్తిగల బ్లాగ్మిత్రులు "ఇక్కడ"ఓ లుక్కేయండి. అందులో మొదట్లో చారు మీద ఆయన రాసిన శ్లోకం మా నాన్నగారికి ఆయన నాన్నమ్మగారు చెప్పేవారట. నాన్న మాకు చెప్తూ ఉండేవారు. మా ఇంట్లో(పుట్టింట్లో + అత్తవారింట్లో కూడా ) అందరూ సాంబారు ఇష్టంగా తింటారు కానీ ఎక్కువ చారుప్రియులే. ఏపూట కాపూటే వంట. మళ్ళీ రాత్రి భోజనానికి చారు కొత్తగా పెట్టల్సిందే. బొంబాయిలో ఉన్నప్పుడు మా వింగ్ లో అందరూ పొద్దున్నే రెండు పూటలకీ వండేసి, ఇక రాత్రి అన్నం ఒక్కటే వండుకుంటారని తెలిసినప్పుడూ ఆశ్చర్యం వేసేది అలా ఎలా తింటారబ్బా అని. అక్కడ అందరివీ ఉరుకులు పరుగుల జీవితాలు. కొన్ని రాజీలు తప్పవు మరి.

సరే ఇక చారులు.. రకాల్లోకి వచ్చేస్తే ....

నీళ్ళు, చింతపండు, ఉప్పు, చిటికెడు పసుపు, కొత్తిమీర కామన్ పదార్ధాలు. ఇవి కాక చారులో అదనంగా వేసే పదార్ధాలను బట్టి "చారు" రుచి మారుతుంది. గిన్నె నిండా నీళ్ళు పోసి ముప్పావు భాగం ఇంకా కావాలంటే సగ భాగం నీరు ఇగిరేవరకూ ఉంచటమే చారులోని రుచి రహస్యం. నాకు తెలిసిన చారు రకాలు రాస్తున్నాను.

1) చారుపొడి తో చారు :

చారు పొడికి: కందిపప్పు(1 cup), పెసర పప్పు (1/2 cup), ధనియాలు (3/4 cup), జీలకర్ర1 spoon, మిరియాలు1 spoon ఎండలో కాసేపు ఎండబెట్టి మెత్తగా పొడికొట్టుకోవాలి. నీళ్ళు, చింతపండు, ఉప్పు, చిటికెడు పసుపు, కొత్తిమీర మొదలైన కామన్ పదార్ధాలు వేసాకా ఈ చారు పొడి కూడా రెండు చెంచాలు వేసి బాగా మరిగించుకోవాలి.

2)టమాటా చారు : రెండు మూడు టమాటాలు బాగా మెత్తగా గ్రైండ్ చేసేసి జూస్ లాగ నీళ్ళు, ఉప్పు, చిటికెడు పసుపు, కొత్తిమీర మొదలైనవి వేయాలి. టమాటాలు పుల్లగా ఉంటాయి కాబట్టి చింతపండు కొద్దిగానే వేసుకోవాలి. మా అమ్మ అయితే అసలు టమాటా చారు లోకి చింతపండు వేసేది కాదు.

3)మామూలు చారు: అన్నింటిలోకీ ఇది నాకు ఇది ఇష్టం. నీళ్ళు, చింతపండు, ఉప్పు, చిటికెడు పసుపు, కాస్త ధనియాల పొడి, కొత్తిమీర,సగం పచ్చిమెరపకాయ ముక్క,(కావాలంటే ఒక టమాటా) వేసి బాగా మరిగిస్తే ఆ రుచే అద్భుతం. ఏ చారుపొడులో అఖ్ఖర్లేదు. నేనసలు చారు పొడి చెయ్యటం చాలా తక్కువ. నేను ఎక్కువగా ఈ మామూలు చారే పెడతాను. చారులో దండిగా వేసిన కొత్తిమీర అంతా నాక్కావాలి అంటే నాక్కావాలి అని దెబ్బలాడుకునేవాళ్ళం నేనూ మా తమ్ముడూ. ఇప్పుడిక పోటీ లేదు కాబట్టి కొత్తిమీరంతా నాకే. కానీ " ఆకులూ, కాడలూ మనుషులు తినరు" అనే దెప్పుడు మాత్రం వినాల్సివస్తుంది. అంతే..:)

4) మిరియాల చారు: ఫ్రెష్ గా అప్పటికప్పుడు మిరియాలు కొట్టి చేసుకునే మిరియాల చారు(దీని గురించి "పాకవేదం" బ్లాగ్లో కౌటిల్యగారు రాసారు)

5) కందికట్టు: కస్త ఎక్కువ నీళ్ళతో కందిపప్పుని ఓ గిన్నెలో ఉడికించి పైన తేరిన నీళ్లతో పెట్టే చారుని కందికట్టు అంటారు. కుక్కర్లో పెట్టిన కందిపప్పు అయినా గిన్నెలో పైన తేరిన నీటితో చారు కాచవచ్చు. దీనిలో కాస్త ముద్దపప్పు మెత్తగా చేసి కలపుతారు కూడా.

6)పెసరకట్టు: కందిపప్పు బదులు పెసరపప్పు ఉడికిన నీటితో పెట్టే చారు. దీనిలో చింతపండు బదులు నిమ్మకాయ వాడుతూంటారు.

7) ములక్కాడ చారు: దీనిలో మామూలు చారులో వేసే అన్ని పదార్ధాలు వేసి, ఒకటి లేక రెండు ములక్కాడ ముక్కలు కట్ చేసి వేసి ఉడికించే చారు. ములక్కడ ఉడకటానికి టైం పడుతుంది కాబట్టి నేనైతే బుల్లి కుక్కర్లో ఒక్క విజిల్ రాగానే తీసేసి చారులో వేస్తాను. ఒకటి కంటే ఎక్కువ విజిల్స్ రానిస్తే ములక్కాడ ముక్కలు రూపాన్ని కోల్పోయి ముద్దయిపోతాయి...:)

ముఖ్య గమనిక: ఈ చారులన్నింటికీ పోపు చాలా ముఖ్యమైనది. అది కూడా నేతి పోపు పెట్టుకుంటే ఆ రుచే వేరు. చెంచాడు నెయ్యిలో ఆవాలు, జీలకర్ర, మెంతులు వేగాకా ఇంగువ ,కర్వేపాకు వేసుకుని అది మరిగే చారులో వేసేయాలి. అమ్మయితే గరిట కూడా చారులో ముంచేసేది. చూయ్.. మని భలే శబ్దం వచ్చేది. పోపు ముందర పెట్టి తరువాత నీళ్ళు పోసి చారు కాచితే పోపు మెత్తబడిపోయి ఫ్రెష్నెస్ పోతుంది. కాబట్టి ఎప్పుడూ కూడా చారు బాగా మరిగాకానే పోపు పెట్టుకొనవలెను.

8) ఇక చింతపండు వెయ్యని మరో రకం చారు "అల్లం చారు". పైన ఫోటో లోనిది. దీనినే "నిమ్మకాయ చారు" అని కూడా అంటాము. నాన్నవాళ్ళు చదువుకునే రోజుల్లో మద్రాసు హాస్టల్లో "ఇంజి(అల్లం) రసం" అని చేసేవారట. ఆ రెసిపీ చెప్పి అమ్మకి నేర్పించారు. నేను ఎక్కువగా చేసే ఈ అల్లం చారు ఎలా చెయ్యాలంటే:

* ముందుగా రెండు అంగుళాల అల్లాన్ని తొక్కు తీసి, సన్నగా పొడుగ్గా ముక్కలు తరుక్కోవాలి.
* తరువాత ఒక మీడియం కప్పు పెసరపప్పు కడిగి రెండు కప్పుల నీరు పోసి,చిటికెడు పసుపు వేసి కుక్కర్లో ఉడుకించాలి. అందులోనే మరీ చిన్న గిన్నెలో ఈ అల్లం ముక్కలు వేసి కాసిని నీళ్ళు పొయ్యాలి. పప్పులో కలిపి పెట్టినా, విడిగా పెట్టినప్పుడు ఎక్కువ నీరు పోసినా అల్లం ముక్కలు పేస్ట్ అయిపోతాయి. (అలా కాకూడదంటే విడిగా గిన్నెలో ఉడికించుకోవటమే.)
* కుక్కర్లోంచి తీసాకా పెసరపప్పు ని పప్పు కనబడకుండా మెత్తగా మేష్ చేసుకోవాలి. కుక్కర్లో పెట్టేప్పుడు పసుపు వేసాం కాబట్టి ఉడికిన పప్పు మంచి రంగులో చూడ్డానికి బాగుంటుంది.
* మెత్తగా చేసిన పెసరపప్పుకి ఒక అర లీటర్ గానీ మరికొన్ని ఎక్కువగానీ నీళ్ళు పోసి, ఉడికిన అల్లం ముక్కలు, ఉప్పు వేసి బాగా మరిగించాలి. తరువాత ఆవాలు, జీలకర్ర, మెంతులు, ఇంగువ, కర్వేపాకు వేసి పోపు పెట్టాలి. స్టౌ ఆపేసాకా ఒక అరచెక్క నిమ్మరసం పిండాలి. ఇది సూప్ లాగ తాగేయచ్చు కూడా. మధ్య మధ్య ఉడికిన అల్లం ముక్కలు తగుల్తూంటే భలే ఉంటుంది. అల్లం ఇష్టమైనవాళ్ళకి ఇది బాగా నచ్చుతుంది.

9) ఉలవ చారు: ఇది ఆరోగ్యానికి చాలా చాలా మంచిది. కానీ నేనెప్పుడూ తినలేదు. చెయ్యలేదు...:) (ఎవరికైనా తెలిస్తే చెప్పండి)

ఉలవలు నానబెట్టి, ఉడికించి,fresh కొబ్బరికోరు వేసి , పోపు వేసి చాట్ లాగ తినొచ్చు. అప్పుడప్పుడు ఇదైతే చేస్తూంటాను.

10)పప్పు చారు: ఇది చాలా ఫేమస్సు. మామూలు చారులో(item.no.3)నే కొంచెం ఎక్కువ మోతాదులో పప్పు వేసి చేసేదాన్ని పప్పు చారు అంటారు. పొద్దున్న మిగిలిన పప్పుతో రాత్రికి అమ్మ పప్పుచారు పెట్టేసిన సందర్భాలెన్నో...ఇప్పుడు నేను చేసేదీ అదే మరి...:)

కొసమెరుపు:ఇక ఈ చారుల్లో తీపి సంగతి: మా అమ్మ అయితే చారులో పంచదార వేసేది. అలవాటు ప్రకారం పెళ్ళయ్యాకా అత్తవారింట్లో మొదటిరోజు వంటచేసినప్పుడు చారు తిని మా మరిది ఇది చారా పానకమా? అని అడిగాడు. వాళ్ళసలు చారులొ తీపి వేసుకోరని తెలిసి నేను అవాక్కయ్యాను...ఇప్పుడిక అలవాటైపోయింది...:) కానీ అప్పుడప్పుడు కాస్త బెల్లం ముక్క వేస్తూంటాను తెలిసీ తెలియకుండా.

ఇవండీ నాకు తెలిసిన చారులు. మీకింకేమైనా రకాలు తెలిస్తే చెప్పగలరు.

ఇంట్లోనే "సాంబార్ పౌడర్" చేసుకోండిలా...

2011-03-23T12:50:00.005+05:30

ఫోటోలో సాంబార్లో ముక్కలేవి అని చూస్తున్నరా? ములక్కాడ, ఉల్లిపాయ, టమాటా, కేరెట్, ఆనపకాయ మొదలైన అన్ని ముక్కలు ఉన్నాయి. గిన్నెలోకి ట్రాన్స్ఫర్ చేసేసరికీ అడుక్కి వెళ్ళిపోయాయి..:) అందుకే కనిపించటం లేదు.

వంటింట్లో పరిశోధనలు చేసే కాలేజీరోజుల్లో సాంబారు బాగా చెయ్యటానికి కొన్ని కిటుకులు నేర్చుకున్నా. ఆ తరువాత సాంబార్ పౌడర్ కూడా ఇంట్లోనే తయారుచేయటం తెల్సుకుని అదే పద్ధతి ఫాలో అయిపోయి ఘుమఘుమలాడే సాంబార్ రెడీ చేసేస్తూంటాను. నాకు సాంబార్ స్పెషలిస్ట్ అని పేరు కూడా ఉంది తెలుసా? నిఝంగా ! మరి మీరు ఇలా చేసేసి మీ ఇంట్లో మార్కులు కొట్టేయండి.

సాంబార్ పౌడర్ తయారీకి కావాల్సినవి:
ధనియాలు - 1 1/2 కప్పులు
శనగపప్పు - 3/4 కప్పు
మినప్పప్పు- 3/4 కప్పు
కందిపప్పు - 1/2 కప్పు
బియ్యం - 1/4 కప్పు
జీలకర్ర - 1 చెంచా
మెంతులు - 1 చెంచా
పసుపు - 1 1/2 చెంచా
మిరియాలు - 1 1/2 చెంచా
ఎండు కొబ్బరి - 1/2 కప్పు

* ముందుగా ఒక పొడి మూకుడులో ధనియాలు,జీలకర్ర ఎర్రగా వేయించి పక్కన పెట్టుకోవాలి.

* తరువాత శనగపప్పు, కందిపప్పు, మినపప్పు, బియ్యం,మెంతులు, మిరియాలు కలిపి ఎర్రగా, మాడకుండా వేయించాలి.

* స్టౌ ఆపేసాకా వేడిమీద ఎండు కొబ్బరి పొడి, పసుపు వేసి బాగా కలిపిఉంచాలి.

* మొత్తం చల్లారాకా మెత్తగా గ్రైండ్ చేయాలి.

* ఈ పౌడర్ నెలరోజులు దాకా నిలవ ఉంటుంది. నేను నెలకోసారి ఈ పౌడర్ చేసుకుంటూ ఉంటాను.

* పప్పులన్నీ వేగడాన్ని బట్టి సాంబార్ రుచి ఆధారపడి ఉంటుంది. (ఆ వేగడాన్ని బట్టి నెలకో రుచి వస్తూంటుంది నా సాంబార్ కి.)

ఇది కాక మరొక ముఖ్యమైన టిప్ ఉంది. అది ఏంటంటే ఒక మీడియం సైజ్ టమాటా + ఉల్లిపాయ ముక్కలు తరిగి ఒక చెంచా నూనెలో మాడకుండా వేయించి, తాజా కొబ్బరి కోరు ఒకటి లేక రెండు చెంచాలు దాంట్లో కలిపి ఒక నిమిషం తరువాత దింపేసి దాన్ని మెత్తగా గ్రైండ్ చేసి మరుగుతున్న సాంబార్లో వేస్తే ఆ రుచి అద్భుతం.

మీ ఇంట్లో చేసాకా ఎలా వచ్చిందో చెప్పాలి మరి..

కాకరకాయ ఒరుగులు

2011-03-21T19:31:00.003+05:30

ఎండబెట్టిన తరువాత వడియాల్లా అయిపోయే కూరముక్కలను "ఒరుగులు" అంటారు. దొండకాయ, వంకాయ, బెండకాయ, కాకరకాయ మొదలైన కూరలతో ఒరుగులు చేస్తారు. పండిన కూరలు ఉంటే వాటిని తరిగి ఉప్పు, కారం రాసి ఎండబెడితే అవి ఒరుగులైపోతాయి. పచ్చివి కూడా తరిగి ఎండబెట్టుకోవచ్చు. నేను ఒడియాలతో పాటూ ఈ ఒరుగులను కూడా చేస్తూంటాను. పప్పులో, పులుసుల్లో అప్పడాల స్థానంలో ఒరుగుల్ని రీప్లేస్ చేసుకోవచ్చు. ఇంట్లో ఎప్పుడన్నా కూర లేకపోతే వీటిని వేయించుకుని కూరలాగే అన్నంలో అద్దుకు తినేసేవాళ్ళం చిన్నప్పుడు.

నాకు ముఖ్యంగా కాకర, దొండ ఒరుగులు ఇష్టం. ఎండల్లోనే కాక మామూలు రోజుల్లో కూడా వీటిని చేస్కోవచ్చు. కానీ కొంచెం ఎక్కువ రోజులు ఎండబెట్టాలి అంతే. ఒక తడవ అయిపోగానే మళ్ళీ ఓ కేజీ కొనేసి అన్ని కాలాల్లోనూ ఒరుగులు చేసేస్కుంటూ ఉంటాను నేను. కాకరకాయ కూర తినలేనివాళ్ళు ఇలా ఒరుగుల్లా చేసుకుంటే చేదు రుచి తెలీకుండా తినవచ్చు.

చేసుకోవటం ఎలాగంటే: పచ్చివి కానీ పండువి కానీ కాకరకాయలు గుండ్రంగా తరుక్కుని ఉప్పు,కారం రాసి మంచి ఎండలో రెండు రోజులు బాగా ఎండబెట్టడమే. ఒరుగులు రెడీ. మరి మీరూ చేసేయండి.

stuffed capsicum

2011-03-04T16:53:00.010+05:30

నిన్న తృష్ణ టపా చూసిన వారందరూ వచ్చేసినట్లేనా ? ఇదిగో మళ్ళీ నిన్నటి ఫోటో ఇక్కడ పెట్టేసా.. ముందుగా చిన్నమాట...
* పొద్దున్న వండిన పప్పు ఏమైనా మిగిలిందా ఇంట్లో..?
* క్రితం వారం వాడాకా మిగిలిన స్వీట్ కార్న్ గింజలేమన్నా మీ ఫ్రిజ్ లో ఉన్నాయా?
* shells లోనే మొలకెత్తేసి బయటకు కనిపిస్తున్న పచ్చి బఠాణీలు మమ్మల్నికనైనా వాడేసెయ్ వాడేసెయ్ అని దీనంగా చూస్తున్నాయా?
ఇవన్నీ ఉంటే వెంఠనే stuffed capsicum చేయటానికి మీరు అర్హులు...:)

ఒకప్పుడు శాస్త్రోక్తంగా పనీర్ కొనుక్కొచ్చి, గ్రేట్ చేసి ఈ కూర చేయటానికి వాడేదాన్ని. ఇప్పుడు మరి హెల్త్ కాన్షియస్ అయిపోయాకా పనీర్,బటర్ వాడకం మానేసాం కాబట్టి అవిలేకుండా ఎలా వండాలో ఎక్స్పరిమెంట్లు చేస్తున్నానన్నమాట. పొటాటో కూడా ఉడకబెట్టినదైతే పర్వాలేదు తినొచ్చని చాలా చోట్ల రాస్తున్నారు కాబట్టి అది అప్పుడప్పుడూ వాడుతూ ఉంటాను. పచ్చిబఠాణిలు ఇంకా దొరుకుతున్నాయి కాబట్టి అవి నానబెట్టక్కర్లేకుండా ఫ్రెష్ వే వాడేయచ్చు. ఇక నిజంగా తయారీలోకి వచ్చేస్తే, ఇక్కడ రాసేది పైన ఫోటోలో నేను చేసిన కూర విధానం మాత్రమే అని సవినయంగా మనవి చేస్తున్నాను.

తయారీ:

* ముందుగా కేప్సికం పైన ముచిక ఉన్న వైపు కట్ చేసి లోపల గింజలు పార్ట్ తీసేయాలి. అప్పుడవి cup లాగ ఉంటాయి. అలా కట్ చేసిన కేప్సికమ్స్ ని పావు వంతు మునిగేలా నీళ్ళు పోసి బుల్లి కుక్కర్ లో(నా దగ్గరున్నది 2 ltrs కుక్కర్ ) పెట్టి విజిల్ రాబోతోందనగా తీసేయాలి. అలా అయితే మరీ మెత్తగా అయిపోతాయని డౌట్ ఉంటే కడాయీలో కూడా నీళ్ళు పోసి, మూత పెట్టి, కాస్త మెత్తబడ్డాయి అనిపించాకా తీసేసుకోవచ్చు. ఇప్పుడు కాస్త మెత్తబడ్డ కేప్సికం కప్స్ రెడి అయ్యాయి.

* ఒక ఒక పెద్ద బంగాళా దుంప లేక రెండు చిన్నవి తొక్కతీసేసి (బంగాళాదుంప మాత్రమే వండేప్పుడు తొక్క తీయకుండా ఉడకపెడితేనే పోషకాలు ఎక్కువ నిలుస్తాయి), చిన్న ముక్కలు తరిగి, వలిచిన పచ్చిబఠాణీలు(ఓ చిన్న టీ గ్లాసుడు) ఉప్పు వేసి కుక్కర్లో ఉడికించాలి. దింపిన తరువాత మెత్తగా ముద్దలా చేసుకోవాలి. చేసుకోకపోయినా పర్వాలేదు...:)

* ఇప్పుడు, ఒక ఉల్లిపాయ, టమాటా ముక్కలు తరిగి మూకుడులో వేయించాలి. అవి వేగుతుంటే 1/2 టీగ్లాస్ స్వీట్ కార్న్(ఉంటేనే) గింజలు అందులో వేయాలి. ఉల్లిపాయ ముక్కలు వేగాయనిపించాకా, ఇందాకా ఉడకపెట్టి ఉంచుకున్న పొటాటో, గ్రీన్ పీస్ ముద్ద అందులో వేసేయాలి. మీరిలా చెయ్యకండి కానీ నేనేమో ఇంట్లో పొద్దున్న వండిన ఆనపకాయ పప్పు ఉంటే అది బాగా మెత్తగా చేసేసి అది కూడా ఈ కర్రీ లో కలిపేసా.సాధారణంగా వేస్ట్ అయ్యేంత ఎక్కువ వండను కానీ పొద్దున్న వండిన పదార్ధాలు వేస్ట్ అవకుండా రాత్రికి రీమిక్స్ వంటలు చేయటంలో మన తర్వతే ఎవరన్నా...:)

* అప్పుడు ఈ కూరలో అర చెంచా ధనియాల పొడి, అర చెంచా గరం మసాలా పొడి, పావు చెంచా పసుపు, ఒక చెంచా కారం వేసి కూరంతా బాగా కలిపి అయిదు నిమిషాల తరువాత దింపేసుకోవాలి.

* ఈ కూరను ముందుగా మెత్తబరుచుకుని ఉంచుకున్న కేప్సికంస్ లోకి కూరాలి. పై ఫోటోలో లాగ. ఏదైనా మూకుడులో కాని నాన్స్టిక్ pan లో కానీ 2,3చెంచాల నూనె వేసి అందులో ఈ stuffed capsicums చక్కగా పట్టేలా సెట్ చేయాలి.

*కదలటానికి స్పేస్ లేకుండా ఉండే చిన్నపాటి మూకుడు/pan అయితే బాగుంటుంది. లేకపోతే కేప్సికంస్ పక్కకి ఒరిగిపోయి కూరంతా మిక్స్ అయిపోయే ప్రమాదం ఉండి.(ఓసారీ ఆ ప్రమాదము జరిగింది).

*ఓ ఐదు నిమిషాలు ఏదైనా మూత పెట్టి మాడకుండా చూస్కుంటూ దింపేసుకోవాలి.

* అందంగా కనబడటానికి పైన తరిగిన కొత్తిమీర, కాస్త తురిమిన కేరెట్ కోరు తో అలంకరించాలి.

*స్టఫ్ చేసాకా వండిన స్టఫింగ్ కూర ముద్ద ఇంకా ఉండిపోతే, ఓ అర గ్లాస్ మజ్జిగ/పెరుగు(డిఫరెంట్ టేస్ట్ కోసం) కలిపేసి మరోసారి పొయ్యిమీద వేడి చేసేసి అది కూడా సైడ్ డిష్ లాగ మరో బౌల్ లో సర్వ్ చేసేయచ్చు.

తినే పధ్ధతి:

* వీటిని అన్నంలో కానీ చపాతీ లోకి గాని తినొచ్చు.
* కేప్సికం టేస్ట్ నచ్చని వాళ్ళు పైన డొల్లంతా జాగ్రత్తగా ఒలిచి పక్కపెట్టేసి లోపల కూర హాయిగా తినేయచ్చు. అంత మాత్రానికి స్టఫ్డ్ కేప్సికం ఎందుకు? లోపలి కూరొకటీ విడిగా వండేయచ్చుకదా అని అడక్కూడదు మరి.
* ఏ కూరయినా సరే ఇష్టంగా తినేవాళ్ళు(నాలాంటివాళ్ళు) ఎదుటివాళ్ళు వలిచి పాడేసిన కేప్సికం డొల్లలు కూడా మన కంచంలోకి షిఫ్ట్ చేసేసుకుని హేపీగా తినేయచ్చు.

షరతు:
మరి మీరు స్టఫ్డ్ కేప్సికం వండుకున్నారో లేక లోపలి కూర మాత్రమే వండుతున్నారో మాత్రం నాకు చెప్పేయాలి.

గోంగూర గ్రీన్ పచ్చడి

2011-02-28T12:15:00.002+05:30

"ఏమిటా..గోంగూర...శాకంభరీదేవీ ప్రసాదం..ఆంధ్ర శాకం..అది లేనిదే ప్రభువులు ముద్దైనా ముట్టరు. తెలిసిందా..!" అన్న "మాయాబజార్"సినిమా డైలాగ్ తెలియనివారు, గోంగూర అంటే ఇష్టం లేనివారు ఎక్కడో గానీ ఉండరనటం ఎంతమాత్రం అతిశయోక్తి కాదు. గోంగూర పచ్చడి నచ్చనివారుంటారా? డౌటే. ఉన్నా చాలా తక్కువమంది ఉంటారేమో. ఎందు మిరపకాయలు వేయించుకుని చేసే గోంగూర నిలవ పచ్చడి అందరిఖీ తెలిసినదే. కానీ అమ్మ(వాళ్ళ అత్తగారి దగ్గ నేర్చుకుని) ఇంకో రకంగా కూడా చేస్తూండేది. దాన్ని నేను గోంగూర గ్రీన్ పచ్చడి అనేదాన్ని. వారం కంటే నిలువ ఉండదు కానీ రుచి మాత్రం అమోఘంగా ఉంటుంది. ఎలాగో చూసేస్తారా?

నేను కారం బాగా తక్కువ తింటాను కాబట్టి నేను కేవలం నేనే చేసిన తయారీ పధ్ధతి మాత్రమే చెప్తాను. మీరు చేసుకునేప్పుడు పాళ్ళు ఎవరికివారే సరిచేసుకువాల్సినదని మనవి.

కావాల్సినవి:
బాగా కడిగి ఆరబెట్టిన గోంగూర ఆకులు (5కట్టలు వి)
పచ్చిమిరపకాయలు - 10
ఒక పెద్ద ఉల్లిపాయ (తెల్ల ఉల్లిపాయ అయితే టేస్ట్ ఇంకా బాగుంటుంది. నేనదే వాడతాను. మామూలు ఉల్లిపాయ కన్నా ఎక్కువ చలవ చేసే గుణం తెల్ల ఉల్లి కి ఉంది)
5,6 వెల్లుల్లిపాయలు
ఆకు వేయించటానికి తగినంత నూనె
తగినంత ఉప్పు
పోపుకు:
చిన్న చెంచాడు మెంతులు
రెండు చెంచాల మినపప్పు
అర చెంచా ఇంగువ

తయారీ:
* బాగా కడిగి ఆరబెట్టిన గోంగూరను తగినంత నూనెలో మాడకూండా కలుపుతూ బాగా వేయించుకోవాలి.
* వేగిన గోంగూర ఆకు ముద్ద పక్కన పెట్టి, ఆ కడాయీలో గానీ వేరే దాంట్లోనో కాస్తంత నూనె వేసి తరిగిన ఉల్లిపాయ ముక్కలు, పచ్చిమిరపకాయలు, వెల్లుల్లిపాయలు వేసి ఉల్లిపాయ ముక్కలు కాస్తంత మెత్తబడేదాకా కాసేపు వేయించాలి.
* తరువాత గోంగూర ముద్ద, వేగిన ఉల్లి,పచ్చిమిర్చి,వెల్లుల్లి మిశ్రమాన్ని కలిపి, తగినంట ఉప్పు వేసి గ్రైండ్ చేసుకోవాలి.
* ఆఖరున మెంతులు,మినపప్పు, ఇంగువ వేసి పోపు పెట్టుకుని గ్రైండ్ చేసిన గోంగూర ముద్దకు కలపాలి.
* ఉల్లిపాయలు వేస్తాం కాబట్టి ఇది వారం కన్నా నిలవ ఉండదు.
*వేడి వేడి వైట్ రైస్ లో లేదా మాకులా దంపుడుబియ్యంలో అయినా సరే కలుపుకుని తింటే...రుచి అమోఘంగా ఉంటుంది.

కందట్టు

2011-02-27T16:04:00.005+05:30

"కందట్టు" అంటే కంద దుంపతో అట్టు అన్నమాట. కందట్టు, బీరకాయ అట్టు రెండూ కూడా నాన్నగారి చిన్నప్పుడు మా తాతమ్మగారు(వాళ్ల అమ్మమ్మగారు) చేసేవారుట. గ్రైండర్ లేని కాలంలో రోట్లో (కంద ముక్కలు)రుబ్బి మరీ చేసేవారుట. ఎంత ఓపికో..

కావాల్సిన పదార్ధాలు:

కంద - 1/4kg
పచ్చిమిర్చి 3
చిన్న టీ గ్లాసులో సగం పెసరపప్పు
తగినంత ఉప్పు
చిటికెడు ఇంగువ

తయారీ:

* ముందుగా పెసరపప్పు నానబెట్టుకుని, నానాకా నీరు ఓడ్చేసి మిర్చి వేసి మెత్తగా రుబ్బుకోవాలి.(ఇది అట్టుకి బైండింగ్ ఏజెంట్ అన్నమాట)

* తరువాత విడిగా చిన్నగా తరుగుకున్న కంద ముక్కలను(పచ్చివే) కూడా కాస్తంత నీరు పోసి మెత్తగా రుబ్బుకోవాలి. రెండు కలిపి గ్రైండ్ చేస్తే కంద ముక్కలు మధ్య మధ్య ఉండిపోతాయి.

* గ్రైండ్ చేసుకున్న రెండు పదార్ధాలనూ, తగినంత ఉప్పునూ, చిటికెడు ఇంగువను వేసి ఓ గిన్నెలో బాగా కలపాలి.

* పెనం వేడెక్కాకా నెమ్మదిగా పిండిని అట్టులా వేయాలి. కంద జిగురుగా ఉంటుంది కాబట్టి పిండి అట్ల పిండిలా జారుగా ఉండదు. జాగ్రత్తగా పెనంపైన స్ప్రెడ్ చేసుకోవాలి. పెసరపప్పు ముద్ద కలిపాము కాబట్టి అట్టు సన్నగానే వస్తుంది. ఓ చిన్న చెంచాడు నూనె అట్టు చూట్టూ వేయాలి.

* ఇది చాలా నెమ్మదిగా కాలుతుంది. తక్కువ సెగ మీద కాస్తంత ఓపిగ్గానే కాల్చాలి.

* ఒక వైపు కాలాకా రెండో వైపు కూడా తిప్పుకుని కాలనివ్వాలి.

* ఈ అట్టును వేడి వేడి అన్నం లో తింటే చాలా బాగుంటుంది. విడిగా టిఫిన్ లా తినాలంటే అల్లప్పచ్చడో, కొబ్బరి చెట్నీనో అయితే బాగుంటుందేమో మరి.

నేను నిన్న రాత్రే మొదటిసారి కందట్టు చేసాను. బాగానే వచ్చింది. ఈ అట్టులోకి అల్లం, కొత్తిమీర, కేరెట్ కోరు వంటివి ఏడ్ చేస్తే ఎలా ఉంటుందో ఇంకా ప్రయోగం చెయ్యాల్సి ఉంది....:)

*** *** *** ***

కంద ఉపయోగాలు:

(ఇదివరకూ కంద బచ్చలి కూర టపాలో రాసాను. మళ్ళీ ఇక్కడ)

* దీనిలో మెగ్నీషియం, పొటాషియం, ఫాస్ఫరస్ కాక కాపర్,జింక్,సిలేనియం అనే ఖనిజాల ట్రేసెస్ కూడా ఉన్నాయి.

* omega 3 fatty acids చాలా ఎక్కువ కాబట్టి దినికి బాడ్ కొలెస్ట్రాల్ ను తగ్గించి, గుడ్ కొలెస్ట్రాల్ ను పెంచే గుణం ఉంది. అందువల్ల హైపర్టెన్షన్(హై బి.పి) ఉన్నవాళ్ళకు ఇది మంచిది.

* వేడి శరీరాన్ని చల్లబరిచే గుణం కూడా దీనికి ఉంది.

* ఫైబర్ చాలా ఎక్కువ కాబట్టి బరువును తగ్గించే గుణం ఉంది. సన్నబడాలనుకునే వాళ్ళు నిరభ్యంతరంగా ఇది తినచ్చు.

* హై ఫైబర్ వల్ల కాన్స్టిపేషన్ నుంచి కూడా రిలీఫ్ ను ఇవ్వగలదు కంద.

* పైల్స్ తో బాధపడేవారికి కూడా ఇది గొప్ప ఉపయోగకరం.

* దుంప కూర అనుకోకుండా డైయాబెటిక్ వాళ్ళు కూడా దీనిని హాయిగా తినచ్చు.

* కంద ఈస్ట్రోజన్ లెవెల్స్ పెంచుతుంది కాబట్టి స్త్రీల హార్మోనల్ బేలన్స్ కు ఇది చాలా ఉపయోగకరం. విటమిన్ B6 ఉండతమ్ వల్ల ప్రీ మెన్స్ట్రల్ సిండ్రోమ్ నుండి కూడా స్త్రీలకు రిలీఫ్ఫ్ ను అందించగలదు.

* అయితే దీనికి కూలింగ్ ఎఫెక్ట్ ఉండటం వల్ల సైనస్, ఆస్థ్మా, జలుబు శరీరం గలవారు డాక్టర్ సలహాతో మాత్రమే తినాలి.

* గర్భిణీ స్త్రిలు, పాలిచ్చే తల్లులు దీనిని తినకపోవటం మంచిది.

మెంతికూర-పనీర్ రైస్

2010-12-28T12:47:00.000+05:30

మామూలు బియ్యంతో చేసినది

వంటింట్లో ప్రయోగాలు చేసి చాలా కాలమైంది. ఏదన్నా చేద్దామని బుధ్ధి పుట్టింది. నాకు రకరకాల రైస్ వెరైటీస్, బిర్యానీలూ చేయటం, తినటం కూడా ఇష్టం. దంపుడు బియ్యం తినటం మొదలెట్టాకా రైస్ వెరైటీస్ చెయ్యటమే తగ్గింది. సరే ఓ రోజుకి ఎక్సెప్షన్ అనేసుకుని అప్పుడప్పుడూ ప్రయోగాలు చేస్తూంటాను. ఆ క్రమంలో మొన్నొక రోజున చేసినదే "మెంతికూర, పనీర్ రైస్". ఇది నాకు ఒక ఫ్రెండ్ చెప్పింది. నేనూ ఇదే మొదటిసారి వండటం. నాకయితే బానే వచ్చింది.

కావాల్సిన పదార్ధాలు:

బియ్యం ఒక గ్లాస్
మెంతికూర రెండు కట్టలు(మీడియం సైజ్)
పనీర్ వంద గ్రాములు(ఇష్టముంటే 150gms కూడా వాడుకోవచ్చు.)
పచ్చిమిర్చి రెండు
అల్లం రెడంగుళాలు ముక్క
కొత్తిమీర ఒక చిన్న కట్ట
పుదీనా ఒక చిన్న కట్ట
పుల్లపెరుగు రెండు కప్పులు
అల్లం,వెల్లుల్లిపేస్ట్ రెండు స్పూన్లు
బిరియానీ మసాలా పౌడర్ ఒక స్పూన్ ( బిరియానీ పౌడర్ బదులు నేను "ప్రియబిరియానీ పేస్ట్" వాడుతూ ఉంటాను. ఆ టేస్ట్ బాగుంటుంది. ఇందులో ప్రయత్నించవచ్చు.)
నెయ్యి మూడు పెద్ద చెంచాలు
ఉల్లిపాయ ఒకటి(పెద్దది)
టమాటా ఒకటి(పెద్దది)
కొద్దిగా నూనె
ఉప్పు తగినంత

తయారీ:

* మెంతి, కొత్తిమీర, పుదీనా ఆకులు కాడలు లేకుండా తీసేసి కడిగి పెట్టుకోవాలి. కొత్తిమీర, పుదీనా ఆకులు గ్రైండ్ చేసుకుని ఉంచుకోవాలి.

* అల్లం,పచ్చిమిర్చి చీలికల్లాగ తరిగి ఉంచుకోవాలి. ఉల్లిపాయ.టమాటా కూడా తరిగి ఉంచుకోవాలి.

* చిలికిన పెరుగులో ఉప్పు, పసుపు, ఒక చెంచా అల్లంవెల్లుల్లి పేస్ట్ వేసి చిన్నగా తరుక్కున్న పనీర్ ముక్కలు అందులో వేయాలి. ఆ ముక్కలను అలా ఓ అరగంట పాటు నానబెట్టాలి.

* బిరియానీ రైస్ కాస్త నెయ్యి వేసి వండేసి, ఉప్పు కలిపేసి పొడిగా ఆరబెట్టుకోవాలి.

* ఒక పేన్ లో కానీ పెద్ద మూకుడులో కానీ నెయ్యి లేక నూనె వేసి మిర్చి, తరిగిన ఉల్లిపాయ ముక్కలు వేసి వేగనివ్వలి. తరువాత ఒక చెంచా అల్లం వెల్లుల్లి పేస్ట్ దాంట్లో వేయాలి. తరువాత కడిగి ఉంచుకున్న మెంతిఆకు అందులో వేయాలి. మాడకుండా కలుపుతూ ఉండాలి. మెంతిఆకు వేగాకా అందులో నానబెట్టిన పనీర్ ముక్కలు, బిరియానీ మసాల పౌడర్, గ్రైండ్ చేసుకుని ఉంచిన కొత్తిమీర-పుదీనా పేస్ట్, కావాలంటే ఒక చెంచా కారం వేసి అందులో ఒక గ్లాస్ నీళ్ళు పోసి బాగా మగ్గనివ్వాలి.

* పైన మిశ్రమం దగ్గర పడినట్లుగా అనిపించాకా ఇందాకా పొడిపొడిగా పెట్టుకున్న రైస్ అందులో కలపాలి. టేస్ట్ చూసి కావాలంటే, ఉప్పు కారాలు కలుపుకోవచ్చు. మిగిలిన నెయ్యి కూడా అందులో కలిపేయాలి.

* ఒక ఐదు పది నిమిషాలు మొత్తం రైస్ ను పొయ్యి మీడ లో ప్లేమ్ లో ఉంచి ఆ తరువాత దింపుకోవాలి. కొత్తిమీర, కాస్త గ్రేట్ చేసిన పనీర్ తో డేకరేట్ చేసి సర్వ్ చెయ్యాలి.

* ఇందులోకి మామూలుగా బిరియాలీల్లోకి చేసుకునే ఉల్లిపాయ,పెరుగు రైతా బాగుంటుంది. అందులో ఒక కేరెట్ కూడా గ్రేట్ చేసుకుని కలిపితే బాగుంటుంది.

* ఇది రెగులర్ బిరియానీ టైప్ కాదు కాబట్టి వెరైటీగా ఉంటుంది. పైన ఫోటోలో నేను చేసినది మామూలు బియ్యంతోనే. బాస్మతీ రైస్ తో అయితే టేస్ట్ ఇంకా బాగుంటుంది.

స్పాంజ్/స్టీం దోశ

2010-12-25T17:00:00.000+05:30

టిఫిన్స్ అన్నింటిలో రాజెవరూ అంటే నాకైతే దోశ. అయితే ఒకటే రకం కాదు ఏ రకమైనా సరే. రకరకాల దోశలు నేర్చుకుని ఎక్స్పరిమెంట్లు చేయటం నాకు సరదా. ఆ ప్రోసెస్ లో తెలుసుకున్న ఒక రకం ఈ స్పాంజ్ దోశ. దీన్నే "స్టీమ్ దోశ" అంటారేమో అని నాకో డౌట్.

ఈ స్పాంజ్ దోశ నేనెలా చేస్తానంటే:
మినపప్పు - 1 glass
అటుకులు - 3/4 glass
మెంతులు - 1 small spoon
కొద్దిగా నీటితోపాటూ చిలికిన పుల్ల మజ్జిగ - 2 glasses

* పైనవన్నీ కలిపి ఒక గిన్నెలో 6,7 గంటలు నానబెట్టాలి. తరువాత మెత్తగా గ్రైండ్ చేసుకోవాలి.

* తరువాత ఇష్టం ఉంటే అర చెంచా వంటసోడా పిండికి కలిపి పెనంపై అట్టు వేసుకోవాలి. (నాకు ఇష్టం ఉండదు. కానీ వాడితే దోశ ఇంకా బాగా ఉబ్బుతుంది)

* అయితే, ఈ అట్టును కదపకూడదు. పెద్ద గరిటతో వెయ్యటమే స్ప్రెడ్ అయ్యేలా వేసేసుకోవాలి. ఇలా..

అప్పుడూ పిండి క్రింద ఫోటోలోలా అవుతుంది.

* అప్పుడూ క్రింద ఫోటోలోలా ఏదైనా మూత పెట్టాలి.

*మధ్య మధ్య మూత తీసి చూస్తూ ఉండాలి. వేలికి పిండి అంటలేదు అన్పించాకా వెనక్కు తిప్పకుండా తీసేసుకోవటమే. ఇలా ఉంటుంది అది.

* దీన్ని మూత పెడతాము కాబట్టి, నూనె వాడము కాబట్టి స్టీం దోశ అంటే ఇదేనేమో అనీ, స్పాంజ్ లాగా బాగా మెత్తగా ఉంటుంది కాబట్టి నా ఉద్దేశంలో స్పాంజ్ దోశ అంటే కూడా ఇదే.

* నాన్ స్టిక్ పెనం కాకపోతే కాస్తంత నూనె వేసుకోవచ్చు.

పేరేదైతేనేం తినటానికి ఒక మంచి దోశ. నూనె అవసరం లేదు. చక్కగా ఏదైనా tomato కానీ నువ్వుల చెట్నీ లేదా కొబ్బరి పచ్చడితో తింటే సూపర్..!! (ఫోటోలో నేను చేసినది టమాటో,కొత్తిమీర కలిపి చేసిన చట్నీ)

శీతాకాలంలో బూడిదగుమ్మడి వడియాలు + అట్టు ?!

2010-12-14T14:16:00.000+05:30

ఆదివారం పొద్దున్నే నాన్నకు ఫోన్ చేసి నాన్నా, పొద్దున్నే వడియాలు పెట్టేసా అని ఆనందంగా చెప్పా. "ఏమిటే శీతాకాలంలో వడియాలు పెట్టే మొహం నువ్వూనూ..ఎండేదే? అన్నారు నవ్వుతూ. "మా కొత్త ఇంట్లో మేడ మీద బోలెడు ఎండ. మీ మనవరాలు రోజూ అమ్మా బోలెడు ఎండ వస్తోందే. ఏవన్నా వడియాలు పెట్టుకుందాం అని ఒకటే గొడవ." అన్నాన్నేను. మొన్నటి దాకా అపార్ట్మెంట్లో ఎండ మొహం కూడా తెలియక ఆరేసిన బట్టలు రెండురోజులకు ఆరటమే తెలుసు మాకు. అలాంటిది ఒక్కసారిగా ఈ కొత్తింట్లో స్వచ్ఛమైన, సహజమైన, చుర్రుమనే ఎండను చూడగానే మా ప్రాణాలు కుదుటపడటమే కాక నాట్యం చేయటం కూడా మొదలెట్టాయి.

ఇక పక్క వీధిలోని కూరల కోట్లో బూడిదగుమ్మడికాయలు చూసినప్పటి నుంచీ మనసు అటే లాగటం మొదలెట్టింది. ఎప్పుడో కాలేజీలో ఉన్నప్పుడు పెంచిన బూడిదగుమ్మడి పాదు, పండించిన పంచిన గుమ్మడి కాయలు, పెట్టిన వడియాలు అన్నీ గుర్తుకొచ్చేసాయి. ఓ శుభ ముహుర్తాన వెళ్ళి బేరమాడి ఒక బుల్లి బూడిదగుమ్మడికాయ కొనేసాను. ఇక శనివారం రాత్రి ముక్కలు తరిగేసాను.

వాటిని ఉప్పేసి మూటగట్టి నీళ్ళబిందె క్రింద పెట్టాను. చిన్నప్పుడు అమ్మ అయితే రోలు క్రింద పెట్టేది. మినపప్పు నానబెట్టి ఉంచాను. ఆదివారం పొద్దుటే ఇంగువ, పచ్చిమిర్చి,ఉప్పు వేసి పప్పు గ్రైండ్ చేసి ముక్కల్లో కలిపేసాను. మినప్పిండి నేను ఎక్కువ కలపను. ఈ వడియాలు గుల్లగా ఉంటేనే టేస్ట్ బాగుంటాయి. అమ్మ కొన్ని పచ్చి మిరపకాయలతోనూ, కొన్ని పండు మిరపకాయలతోనూ కలిపి పెట్టేది.

ఇక ప్లేస్టిక్ కవర్ పెట్టుకెళ్ళి మాకోసమే అన్నట్లు డాబా మీద మధ్యలో ఉన్న సిమెంటు బెంచీ మీద వడియాలు నిర్విఘ్నంగా పెట్టేసాను. రెండు రోజుల్లో శుభ్రంగా వడియాలు రెడీ అయిపోతాయి.

ఇక కాస్తంత పిండి అట్టు వేసుకోవటానికి దాచాను. బూడిద గుమ్మడి వడియాలు నాకు చాలా ఇష్టం. అలానే ఈ వడియాల పిండితో వేసే అట్టు కూడా నాకు భలే ఇష్టం.అన్నం తినే ముందు వేడి వేడిగా వేసుకుంటే బాగుంటాయి.

ఇదిగో ఇలా ఒక బుల్లి అట్లు రెండు వచ్చాయి. వేస్తూ వేస్తూనే ఒకటి లాగించేసాను, పోటీకెవరూ లేరు కాబట్టి అన్నంలోకి ఒకటి వేసుకున్నా.

"పేటా" అని బూడిదగుమ్మడితో చేసిన స్వీట్ అమ్ముతారు. చాలా బాగుంటుంది. చిన్నప్పుడు నాన్న ఢిల్లీ వెళ్ళినప్పుడల్లా మా కోసం తెచ్చేవారు. అదండి నా శీతాకాలం బూడిదగుమ్మడివడియాల కథ. ఇంతకూ మీకూ వడియాలు కావాలా? అట్టు కావాలా?

కాలీఫ్లవర్ ఆవకాయ

2010-12-07T17:27:00.000+05:30

నా ఫేవరేట్ వెజిటబుల్ "కాలీఫ్లవర్". నాకు బోలెడంత ఇష్టం. పచ్చి కాలీఫ్లవర్ కూడా తినేంత. (అసలు నాకు నచ్చని కూరంటూ ఏదీ లేదు పాపం ఏమిటో..!) కాలీఫ్లవర్ తో రకరకాల కూరలు ప్రయోగాలూ చేస్తూందేదాన్ని. ఈ చలికాలంలో బాగా దొరికే కాలీఫ్లవర్ దొరికినంత కాలం మా ఇంట్లో ఎక్కువగా కొంటూండేవాళ్ళం. మా ఇంట్లో అమ్మ ఎప్పుడూ ఈ కాలీఫ్లవర్ దొరికితే కూరతో పాటూ కాసిని కాలీఫ్లవర్ ముక్కలతో టెంపరరీ ఆవకాయ కూడా పెడుతూ ఉండేది. నేను వంటింట్లో ప్రయోగాలు మొదలెట్టాకా రకరకాల కూరలతో ఈ టెంపరరీ ఆవకాయ ప్రయోగం చేసేదాన్ని. కేరెట్, బంగాళాదుంప, కాకరకాయ, బజ్జీ మిరపకాయలు, నాలుగైదు కూరలు కలిపి మిక్స్డ్ వెజిటబుల్ ఆవకాయ, చిన్న చిన్న మావిడికాయ పిందెలతో ఆవబద్దలు మొదలైనవి సక్సెస్ఫుల్ గా పెట్టేదాన్ని.

నిన్ననే నా కోసం కాలీఫ్లవర్ కూర చేసుకుంటూ కాసిని ముక్కలు పక్కన పెట్టాను నా మటుకు కాస్తంత ఆవకాయ చేసుకుందామని. ఇంట్లో ఎవరూ కాలీప్లవర్ గానీ, కాలీప్లవర్ ఆవకాయ గానీ తినరు మరి. ఇప్పుడిప్పుడే శ్రీవారికి, పాపకూ అలవాటు చేస్తున్నా. ఇంతకీ నోరూరించే బుల్లి డబ్బాడు కాలీఫ్లవర్ ఆవకాయ రెడీ చేసేసాను.

చాలామందికి తెలిసే ఉంటుంది. తెలీనివాళ్ళకు ఎలాగో చెప్పనా మరి..

(పదార్ధాల పాళ్ళు వేసే ముక్కలను బట్టి ఉంటుంది. అందుకని కొలత రాయటం లేదు.)
చిన్నగా తరిగిన కాలీఫ్లవర్ ముక్కలు
ఆవ పొడి, పచ్చికారం : సమానంగా
ఉప్పు పైవాటికి కాస్త తక్కువగా
నూనె తగినంత( మామూలుగా నేను వంటలోకి ఏ నూనె వాడినా టెంపరరీఆవకాయకు మాత్రం పప్పు నూనె వాడతాను. టేస్ట్ బాగుంటుంది అని)
ఒకటి, రెండు చెంచాల నిమ్మరసం(సగం పువ్వుకి ఒక నిమ్మకాయ చాలు)

ముందు ఆవ,కారం, ఉప్పు పొడివే బాగా కలుపుకోవాలి. తరువాత నూనె వేసి పిండి కలిసేలా కలుపుకోవాలి. తరువాత కాలీఫ్లవర్ ముక్కలు వేసి బాగా కలుపుకోవాలి. నిలవ ఉండటానికి నిమ్మరసం వాడతాం అన్నమాట. కొంతమంది కూర ముక్కలను ఆవకాయ కలిపే ముందు కొద్దిగా వేయిస్తారు. కానీ నాకు అలా నచ్చదు. త్వరగా ముక్కలు మెత్తగా అయిపోతాయి. నేనయితే పచ్చి ముక్కలతోనే ఆవకాయ పెడతాను. ఇది ఓ వారం రోజులకు సరిపడా అయితే బాగుంటుంది. అంతకన్నా ఎక్కువ నిలవ ఉంటే ముక్కలు బాగా మెత్తగా అయిపోయి టేస్ట్ కూడా మారిపోతుంది.

khakhra...a healthy snack !!

2010-12-06T16:04:00.000+05:30

ఇది నాకు చాలా ఇష్టమైన స్నాక్. మొదటిసారి నేనివి టేస్ట్ చేసినది బొంబాయిలో. ఆ తరువాత తినటం ఆపింది లేదు. భోజనంలో తనకు అప్పడాలు డీప్ ఫ్రై చేసి ఇచ్చినప్పుడల్లా నేను ఇవి తింటూంటాను. (నేను డీప్ ఫ్రైస్ తినను మరి. )

వీటిని గోధుమ పిండితో చేస్తారు. నూనె వాడరు. హెల్తీ స్నాక్స్ కాబట్టి అప్పడాలు, చిప్స్, భుజియా, జంతికల్లాంటి డీప్ ఫ్రైడ్ స్నేక్స్ లా భయపడుతూ కాకుండా హాయిగా తినొచ్చు.

ఖాఖ్రాల్లో రకాలు కూడా ఉంటాయి. methi khakhra, chilli garlic khakhra, masala khakhra etc. ఇది గుజరాతీ ఫుడ్ కాబట్టి మేము బొంబాయిలో ఉన్నప్పుడూ బ్రాండేడ్ కంపెనీలవే కాక లోకల్ కంపెనీలవి చిన్న చిన్న షాపుల్లో కూడా చాలా దొరికేవి. అన్నిరకాలూ టేస్ట్ బాగుండేవి కూడా. కానీ ఆంధ్రాలోకి వచ్చాకా బ్రాండెడ్ కంపెనీలవే, అదికూడా కాస్త పెద్ద సూపర్మార్కెట్లలోనే ఇవి దొరుకుతున్నాయి.

నాకు methi ఇష్టం కాబట్టి నేనెప్పుడూ methi khakhra నే కొంటూంటాను. ఈసారే కొత్త వెరైటీ "చిల్లి గార్లిక్" కొన్నా. అంత కారం నేను తినలేను కానీ నోరు మండుతూ ఈ ఖాఖ్రాలు ఖారం ఖారంగా భలే ఉన్నాయి. ఒకోసారి ఇలా ఉస్...ఉస్..అనుకుంటూ నోరు మండేలా ఉన్నవి తింటుంటే కూడా భలే మజాగా ఉంటుంది. మీరూ హెల్త్ కాన్షియస్ + ఇవి ఎప్పుడూ ట్రై చేసి ఉండకపోతే వెంఠనే కొనేయండి మరి. వీటిని అన్నంలోనే కాక సాయంత్రాలు టీ తో కూడా తినచ్చు.

కంద బచ్చలి కూర

2010-12-02T09:30:00.000+05:30

తొంభైఐదు శాతం గోదావరి జిల్లాలవారి పెళ్ళి భోజనాలలో "కంద బచ్చలి కూర" తప్పనిసరి ఉంటూంటుంది.(పనసపొట్టు కూరలాగే). ఇలా వండటానికి ఒక కారణం ఉంది. ఈ కూరలో ఎలాగైతే కంద,బచ్చలి తమ తమ ఐడెంటిటీ తెలీకుండా కలిసిపోతాయో, అదే విధంగా పెళ్ళి అనే పవిత్ర బంధంతో రెండు కుటుంబాలు ఒకటిగా కలసిపోవాలి అనేది ఇందులోని ఇంటర్నల్ మెసేజ్. ఇక ఈ కూర చేసేప్పుడు గుర్తుంచుకోవాల్సిన విషయం ఏంటంటే బచ్చలాకు ఆకు లాగ, కంద ముక్కలుగా కనబడకూడదు. మొత్తం చక్కని ముద్దలాగ మిక్స్ అయిపోవాలి ఇందాకటి మెసేజ్ మాదిరిగా.

పై ఫోటోలోని బచ్చలి తీగ(malabar spinach) మా కొత్త ఇంట్లో అదివరకెవరో వేసినది. ఇది తీగ బచ్చలి. సాధారణంగా మార్కెట్లో మనకు దొరికేదాన్ని మట్ట బచ్చలి అంటారు. అది పాలకూర,చుక్కకూరల్లాగే రెండంగుళాలు పొడవుగా దుబ్బుగా పెరిగే బచ్చలి. క్రింద ఫోటోలోలాగ.

ఇలాకాక తీగ లాగ పెరిగి, పందిరి వేసుకునేంత పెద్దగా ఎదిగేది తీగ బచ్చలి. పైన మొదటి ఫోటోలోదన్నమాట. మా నాన్నమ్మకు బచ్చలికూరంటే ప్రాణం, కూరలబ్బాయి వస్తే అతని దగ్గర ఉన్న బచ్చలంతా తనే కొనేసేది. ఈ మహా బచ్చలి తీగను చూసేసరికీ మహా సరదా పుట్టేసి ఆ బచ్చలితో పప్పు, బజ్జీలు, మజ్జిగ పులుసు, పచ్చడి(మిగతా వంటకాల కన్నా నాకు ఇది నచ్చుతుంది) వగైరా వగైరాలు చేసేసాను. మరి ఫ్రీగా ఆకుకూర రోజూ ఎదురుగా కనిపిస్తూంటే వండకుండా ఉండగలమా? ఇక ఇంకా ఏం మిగిలి ఉన్నాయి అంటే "కంద బచ్చలి" కూర గుర్తుకు వచ్చింది. పైగా టివీలో మొన్నొక రోజు ఒకావిడ "కార్తీక మాసంలో మేము తప్పనిసరిగా కంద బచ్చలి కూర తింటాం.." అని చెప్పారు. ఇదెప్పుడూ నేను వినలేదు. అయినా తినేస్తే ఓ పనైపోతుంది కదా అని బయటకు వెళ్ళి "కంద" కొనుక్కువచ్చా.

కంద(elephant yam) మొక్క క్రింద ఉన్న ఫోటోలోలా ఉంటుంది. దాని క్రింద వేరు ఇలా కంద దుంపలా ఉంటుంది. మా ఇంట్లో కూర కాకుండా కందతో కందట్టు వేస్తారు. దాని గురించి చేసినప్పుడు ఫోటోతో సహా రాస్తాను...:) "పోలాల అమావాస్య" కు కంద మొక్కకు చేసే పూజ గురించి ఇక్కడ అదివరకూ రాసాను.

ఇక కంద బచ్చలి కూర ఎలా చెయ్యాలంటే.. ముందుగా బచ్చలాకులు కడిగి పెట్టుకోవాలి. తర్వాత కందని తొక్కు తీసి ముక్కలుగా తరిగి పెట్టు కోవాలి. క్రింది విధంగా.

తయారీ:

* కంద ముక్కలు, బచ్చలి ఆకులు కలిపి కాస్తంత చింతపండు రసం, అర చెంచా పసుపు, తగినంత ఉప్పు వేసి కుక్కర్లో ఉడికించుకోవాలి.

* నీరు తగినంత పొసుకుంటే ఉడికాకా వార్చాల్సిన పని ఉండదు. పోషకాలు పోవు.

* ఉడికిన పదార్ధాన్ని ముద్దగా ఎనిపేసుకుని(మేష్ చేసుకుని) పక్కన పెట్టుకోవాలి.

* మూకుడులో ఒక పెద్ద చెంచడు నూనె తీసుకుని అందులో ఆవాలు, మినపప్పు, కాస్త ఎక్కువ శనగపప్పు, కాస్తంత జీలకర్ర, రెండు ఎండు మిర్చి, ఒకటి రెండు పచ్చిమిర్చి, కర్వేపాకు,ఇంగువ వేసి పోపు పెట్టుకోవాలి.

* పోపులో కావాలంటే వేరుశనగపప్పు కూడా వేసుకోవచ్చు.

* బాగా వేగిన పోపులో ఉడికిన కంద,బచ్చలి మిశ్రమాన్ని వేసి బాగా కలిపి దింపేయాలి.

* కూర కాస్త చల్లారాకా ఒక చెంచాడు(కూర అరకేజీ దాకా ఉంటే) ఆవ పొడి(పచ్చి ఆవపొడి) వేసి బాగా కలుపుకోవాలి.

*వేడి చేస్తుందేమో అనుకునేవారు ఆవ వేయటం మానేసుకోవచ్చు.

*వేడి వేడి అన్నంలో నెయ్యి లేక కమ్మని పప్పు నూనె వేసుకుని ఈ కూర తింటే...ఆహా! అనుకోకుండా ఉండలేరనే నా అభిప్పిరాయం.

బచ్చలి ఉపయోగాలు:

* ఇందులో విటమిన్ ఏ, సీ,ఐరన్ మరియు కాల్షియం కూడా ఉంటాయి.

* కేలొరీస్ తక్కువ, ప్రోటీన్ ఎక్కువ ఉంటుంది.

* ముఖ్యంగా సోల్యబుల్ ఫైబర్ ఎక్కువ ఉంటుంది.

* కొన్ని ప్రాంతాల్లో ఉదకబెట్టి గ్రైండ్ చేసిన ఈ బచ్చలాకు పేస్ట్ ను సూప్స్ చిక్కగా చేయటానికి కూడా వాడతారట.

కంద ఉపయోగాలు:

* దీనిలో మెగ్నీషియం, పొటాషియం, ఫాస్ఫరస్ కాక కాపర్,జింక్,సిలేనియం అనే ఖనిజాల ట్రేసెస్ కూడా ఉన్నాయి.

* omega 3 fatty acids చాలా ఎక్కువ కాబట్టి దినికి బాడ్ కొలెస్ట్రాల్ ను తగ్గించి, గుడ్ కొలెస్ట్రాల్ ను పెంచే గుణం ఉంది. అందువల్ల హైపర్టెన్షన్(హై బి.పి) ఉన్నవాళ్ళకు ఇది మంచిది.

* వేడి శరీరాన్ని చల్లబరిచే గుణం కూడా దీనికి ఉంది.

* ఫైబర్ చాలా ఎక్కువ కాబట్టి బరువును తగ్గించే గుణం ఉంది. సన్నబడాలనుకునే వాళ్ళు నిరభ్యంతరంగా ఇది తినచ్చు.

* హై ఫైబర్ వల్ల కాన్స్టిపేషన్ నుంచి కూడా రిలీఫ్ ను ఇవ్వగలదు కంద.

* పైల్స్ తో బాధపడేవారికి కూడా ఇది గొప్ప ఉపయోగకరం.

* దుంప కూర అనుకోకుండా డైయాబెటిక్ వాళ్ళు కూడా దీనిని హాయిగా తినచ్చు.

* కంద ఈస్ట్రోజన్ లెవెల్స్ పెంచుతుంది కాబట్టి స్త్రీల హార్మోనల్ బేలన్స్ కు ఇది చాలా ఉపయోగకరం. విటమిన్ B6 ఉండతమ్ వల్ల ప్రీ మెన్స్ట్రల్ సిండ్రోమ్ నుండి కూడా స్త్రీలకు రిలీఫ్ఫ్ ను అందించగలదు.

* అయితే దీనికి కూలింగ్ ఎఫెక్ట్ ఉండటం వల్ల సైనస్, ఆస్థ్మా, జలుబు శరీరం గలవారు డాక్టర్ సలహాతో మాత్రమే తినాలి.

* గర్భిణీ స్త్రిలు, పాలిచ్చే తల్లులు దీనిని తినకపోవటం మంచిది.

బీరకాయ అట్టు

2010-09-30T21:35:00.000+05:30

బీరకాయ అట్టు మా తాతమ్మగారు(నాన్న అమ్మమ్మగారు) మా చిన్నప్పుడు చేసేవారు. తరిగిన బీరకాయ ముక్కలూ, నానబెట్టిన గుప్పెడు బియ్యాన్ని కలిపి, పచ్చిమిర్చి వేసి రోటిలో రుబ్బి అట్టులా వేసి అన్నంలో (కూర బదులు) నెయ్యి వేసి, ముద్దలు చేసి తినిపించేవారు. ఆ రుచి నాలిక మీదే ఉంటుంది ఇప్పటికీ. వంటలో అంత గొప్ప చెయ్యి ఆవిడది. చాలా ఓర్పుగా, నిదానంగా చేసుకోవాల్సిన అట్లు ఇవి. రుచి మాత్రం అమోఘం. నాకు బాగా ఇష్టం.

పెద్దయ్యాకా తాతమ్మలా బీరకాయ అట్టు చేద్దామని చాలా సార్లు ప్రయత్నించి విఫలమయ్యాను....:) చిన్నప్పుడు తెలీదు మరి ఇలా వంటలు వండుతానని. లేకపోతే నాన్నమ్మ దగ్గర అడిగి రాసుకున్నట్లే తాతమ్మ దగ్గర కూడా చిట్కాలు రాసుకుని ఉండేదాన్ని. ఆవిడ నేను ఎనిమిదవ తరగతిలో ఉన్నప్పుడు కాలం చేసారు. ఇక నేను నా సొంత బుర్ర ఉపయోగించి బీరకాయ అట్టుపై ప్రయోగాలు చేసాను. కాస్తంత బియ్యం నానబెట్టి గ్రైండ్ చెయ్యటం, అది మెత్తగా అవక, అట్టు సరిగా రాక తిప్పలు పెట్టేది.

అప్పుడు తెలివిగా బియ్యానికి బదులు బియ్యప్పిండి ని వాడాను. ఈసారి పిండి బానే వచ్చింది కానీ అట్టు విరిగిపోయింది. ఆ తరువాత నేను పరిశోధనలవల్ల తెలుసుకున్నది ఏమిటంటే బీరకాయలో నీరు ఉంటుంది కాబట్టి ముక్కల్ని గ్రైండ్ చేసేప్పుడు నీళ్ళు పొయ్యకూడదు. ముద్ద తయారయ్యాకా కూడా అట్టు లాగ రూపాంతరం చెందటానికి ఒక బైండింగ్ ఏజెంట్ కావాలి. అది బియ్యమే కానఖ్ఖర్లేదు. ఏదో ఒక పిండి పదార్ధం బీరకాయముక్కలను అట్టు రూపంలో బైండ్ చెయ్యటానికి ఉండాలి అంతే.

ఇక అప్పటినుంచీ బియ్యప్పిండికి బదులు నానబెట్టిన పెసరపప్పు లేక గోధుమపిండి లేక జొన్న పిండో లేక శనగపిండో కలిపేసి అట్టు వెయ్యటం మొదలుపెట్టాను...:) కాకపోతే ఏ పీండి అయినా బీరకాయ రుచి పోకుండా తగుమాత్రంలోనే కలపాలి. Just అట్టు విరగకుండా అన్నమాట. so, మీరు కూడా రకరకలు ట్రై చెసి ఏ రుచి బాగుంటే ఆ రుచితో i.e ఆ పిండితో continue అయిపొండి.

విధానం:

* బీరకాయల్ని పైన చూపిన విధంగా సన్నటి చెక్కు తీసి, మిగిలిన తొక్కుతో కలిపి ముక్కలు చేసుకోవాలి.

* ఒక పెద్ద బీరకాయకు(nearly 300gms) --
-- రెండు పచ్చిమిరపకాయలు,
-- కాస్త కొత్తిమీర
-- గుప్పెడు నానబెట్టిన పెసరపప్పు
-- గుప్పెడు బియ్యప్పిండి

(ఈ రెండు పిండిలు బదులు పైన నేను రాసిన ఏ పిండి అయినా తగుమాత్రంలో ట్రై చెయండి)

మొత్తం కలిపి గ్రైండ్ చేసుకోవాలి. దాంట్లో ఒక చెంచా జీలకర్ర వేయాలి.
ఇలా ఉంటుంది ఆ పిండి --

అప్పుడు ఆ పిండిని పెనం మీద వేసుకోవాలి. ఇలా --

ఈ అట్లను స్టౌ తగ్గించే వేసుకోవాలి. లేకపోతే మాడిపోతాయి.
ఇవి మరీ పెద్దగా, సన్నగా రావు ఇవి. అందుకని చిన్న సైజ్ లోనే వేసుకోవాలి. low flame వల్ల టైం పడుతోందని, ఒకోసారి విరిగిపోతున్నాయని, నేను బీరకాయఅట్లను బుల్లి బుల్లిగా వెయ్యటం మొదలుపెట్టాను. ఇలా --

బేబీ బీరకాయట్లు అన్నమాట. చిన్నగా ఉంటాయి, లేట్గా వేగుతాయి, పోటీ వచ్చేవారు కూడా ఎవరూ లేరు కాబట్టి ఒక వాయి అయ్యే లోపూ ముందర వేసిన ప్లేట్ నేనే ఖాళీ చేసేస్తాను...:)

మా ఇంటికి వెళ్ళినప్పుడు మాత్రం నేనూ, అన్నయ్య కలిపి శాస్త్రోక్తంగా బిరకాయ అట్లు చేసుకుని తాతమ్మను తలుచుకుంటూ, ఆహ ఏమి రుచి అనుకుంటూ తినేస్తాము...!!
వీటికి చట్నీ ఏమీ అఖ్ఖర్లేదు. అన్నంలో కానీ ఉట్టిగా గాని తినేయచ్చు.
అదీ బీరకాయ అట్టు కథ. బాగుందా ??

బీరపొట్టు పప్పు

2010-09-28T15:14:00.000+05:30

బీరకాయ...ఇష్టమైన కూరల్లో ఒకటి !! బీరకాయతో భలే భలేగా బోలెడు రకాలు వండుకోవచ్చు. బీరకాయతో పప్పు(ముద్దగానూ, పొడిగానూ కూడా), పచ్చడి, బజ్జీలు, బీరకాయ అట్టు(ఇది చాలా ఇష్టం నాకు), బీరకాయ+మెంతికూర మొదలైనవి. ఇక కూరల సంగతికొస్తే బీరకాయ ఉల్లికారం, బీరకాయ శనగపప్పు కారం, బీరకాయ పోపు కూర, బీరకాయ బంగాళాదుంప మొదలైనవి చేసుకోవచ్చు. ఇవన్నీ అందరికీ తెలుసున్నవే.

ఇక బీరపొట్టుతో:
ఇక బీరపొట్టుతో కూడా చాలా రకాలు వండుకోవచ్చు. బీరపొట్టు పచ్చడి, పొడికూర, తియ్యగా మెంతులు వేసిన పొడికూర, కొత్తిమీర కలిపి పచ్చడి etc. మా ఇంట్లో బీరకాయ వండితే తప్పక మా అమ్మ పొట్టు విడిగా ఉంచి పైన రాసిన వాటిల్లో ఏదో ఒక రకం తప్పక చేసేది. ఇవన్నీ కూడా అందరికీ తెలిసినవే.

బీరపొట్టుతో పప్పు కూడా చాలా బాగుంటుంది. అదే నేనిప్పుడు రాయబోయేది. మా అమ్మమ్మ కుంపటి మీద చేసిన "బీరపొట్టు పొడి పప్పు" అమ్మావాళ్ళంతా చాలా ఇష్టంగా తినేవారుట.

బీరపొట్టు పప్పుకు కావాల్సిన పదార్ధాలు:
* మూడు,నాలుగు బీరకాయల పొట్టు బాగా మెత్తగా కాకుండా బరుగ్గా గ్రైండ్ చేసుకోవాలి. అంటే పచ్చడికి చేసుకున్నటు పేస్ట్ చేసేయకూడదు.
పొట్టును క్రింద బొమ్మలో చూపినట్లు ముందు సన్నగా ఈనెలు తీసేసి, తరువాత బాగా దళసరిగా బీరపొట్టు తీసి ఉంచాలి.

"బీరపొట్టు"

* చిన్న టీ గ్లాసుడు కందిపప్పు.
* పచ్చి మిర్చి ఒకటి, ఎండుమిర్చి ఒకటి( ఎక్కువ కారం కావాలంటే ఇంకా వేసుకోవచ్చు)
* పోపు కోసం- ఆవాలు,జీలకర్ర,మినపప్పు, చిటికెడు ఇంగువ, ఓ కర్వేపాకు రొబ్బ.
*రుచికి సరిపడ ఉప్పు, చిటికెడు పసుపు.
* ఒక స్పూన్ నూనె.
విధానం:

పొడిపప్పు:
కందిపప్పును ఓ అరగంట నానబెట్టి ఆ తరువాత మూకుడులో పోపు వేసి, తరువాత పొడి పొడిగా గ్రైండ్ చేసుకున్న బీరపొట్టు ముద్ద, నానబెట్టిన కందిపప్పు అందులో వేసి 11/2 టీ గ్లాస్ నీళ్ళలో నీరు పోసి, చిటికెడు పసుపు వేసి, కందిపప్పు ఉడికేదాకా పొయ్యిమీద ఉంచాలి. పప్పు మరీ మెత్తగా అయిపోకూడదు. ఇది అన్నంలోకి బాగుంటుంది.

ఇది మెత్తటి పప్పు

మెత్తటి పప్పు:
* కుక్కర్లో కందిపప్పు ఉడికించేసుకోవాలి. అది మెత్తగా మేష్ చేసేసుకోవాలి.
* తరువాత మూకుడులో పోపు పెట్టుకుని, దాంట్లో పొడి పొడిగా గ్రైండ్ చేసుకున్న బీరపొట్టు ముద్ద వేసి, 1/2 టీ గ్లాస్ నీళ్ళలో అదంతా మెత్తబడనివ్వాలి.
* ఆ తరువాత ఉడికిన పప్పు అందులో కలిపి, రెండు మూడు నిమిషాల తరువాత దింపేసుకోవాలి.
* పప్పుతో పాటే బీరపొట్టును కూడా కుక్కర్లో పెట్టవచ్చు కానీ అది ఐడెంటిటీ కోల్పోయి అదేమిటో తెలియకుండా అయిపోతుంది. విడిగా వండటం వల్ల, బీరపొట్టును పొడి పొడిగా గ్రైండ్ చేయటం వల్ల టేస్ట్ కొత్తగా ఉండి బాగుంటుంది.
* ఇది అన్నం లోనే కాక చపాతీల్లోకి కూడా బాగుంటుంది.

*** *** **** ***

అంతర్జాలంలో ఒకసారి నాకు ఇందిర అనే ఒక "బీరకాయ అభిమాని" తన బ్లాగులో రాసిన బోలెడు రకాల బీరకాయ రెసిపీలు కనబడ్డాయి. ఆసక్తి ఉంటే "ఇక్కడ" చూడండి.

***** ***** *****

బీరకాయ లో ఏముంది:

* పీచు పదార్ధం ఎక్కువ ఉంటుంది కాబట్టి తేలిగ్గా జీర్ణం అవుతుంది.
* నీరు శాతం ఎక్కువ ఉంటుంది. క్రొవ్వు, కొలెస్ట్రాల్ రెండూ తక్కువే.
* విటమిన్ సి, జింక్,రిబొఫ్లావిన్, ఐరన్, మాంగనీస్, మెగ్నీషియం మొదలైన మినరల్స్ ఉన్నాయి.
* శరీరాన్ని చల్లబరిచే గుణం ఉంది కాబట్టి శరీరంలో వేడి ఎక్కువ ఉన్నవారికి మంచిది.

సగ్గుబియ్యం చేతి అట్టు

2010-09-20T21:50:00.000+05:30

అట్లు చాలా రకలు ఉన్నాయి. వాటిల్లో చేతి అట్లు ఒక రకం. పిండి కొంచెం గట్టిగా కలుపుకుని చేతితో(చెయ్యి కాలకుండా) పెనం మీద వేసే అట్టుని "చేతి అట్టు" అంటాము. అలా చేసుకునే చేతి అట్లలో ఒకటి సగ్గుబియ్యం అట్టు. సగ్గుబియ్యంతో ఒడియాలు,పరమాన్నం, హల్వా, కిచిడీ, వడలు మొదలైనవి ఎప్పుడూ చేసుకునేవే. ఈ సగ్గుబియ్యం అట్టు నా ఫ్రెండ్ దగ్గర నేర్చుకున్నాను. నాకు బాగా నచ్చుతుంది. స్టార్చ్ ఎక్కువ ఉంటుంది కాబట్టి వెయిట్ కాన్షియస్, డయాబెటిక్ అయితే వాడటం మంచిది కాదు. అయితే ఈ అట్టులో బంగాళాదుంపలు కలుపుతాం కాబట్టి పిల్లలకు మంచి ఎనర్జీ నీ ఇస్తుంది. నెలకోసారి సరదాగా ట్రైచేయచ్చు.

క్రింద బొమ్మలోనిది పెండలం మొక్క. ఈ మొక్క తాలూకూ వేరులే పెండలం దుంపలు. (చిలకడ దుంపల్లాగ). ముదురు గోధుమరంగులో సన్నగా పొడుగ్గా ఉంటాయి. వాటిల్లోంచి సగ్గుబియ్యం తయారు చేస్తారు. పెండలం(tapioca) నుంచి తయారుచేయబడిన సగ్గుబియ్యాన్ని tapioca pearls అంటారు.

ఒక సంగతి:

బంగాళాదుంపలు తినకూడదన్నది ఒక అపోహ. ఇవి మధుమేహం ఉన్నవారు తప్ప, మిగిలిన వాళ్ళందరూ తినదగిన పౌష్టికాహారం. ఉడికించిన వాటిల్లో కార్బోహైడ్రేట్స్,విటమిన్ బి,సీ,ఇంకా కొన్ని ప్రోటీన్లు ఉంటాయి. నూనెలో వేయించితేనే అది హానికరం.పప్పు దినుసుల్లో కన్నా ఎక్కువ తేమ బంగాళాదుంపల్లో ఉంటుంది,అందువల్ల పప్పుదినుసులలో కన్న తక్కువ కేలరీలు వీటిల్లో ఉంటాయి.ఉడికించిన బంగాళాదుంపముక్కలు, ఉప్పు, ఉల్లిపాయ ముక్కలు వేసుకుని నిమ్మరసం,కొత్తిమీర చల్లుకుని సాయంత్రాలు టీ టైం లో తినచ్చు. అయితే,తొక్కతీసి ఉడికించినా,తొక్క బ్రేక్ అయ్యేలా ఎక్కువ ఉడికించినా వీటిలోని పోషకాలన్నీ నశిస్తాయి. ఈ సంగతి నేనొక పుస్తకంలో చదివి తెలుసుకున్నది.

సగ్గుబియ్యం అట్టుకు కావాల్సిన పదార్ధాలు:

* ఒక కప్పు సగ్గుబియ్యం (రెండు కప్పుల నీటిలో 3-4 గంటలు నానబెట్టాలి.

* 3 మీడియం సైజు బంగాళాదుంపలు (ఉడకపెట్టుకుని తొక్కు తీసుకున్నవి)

* సన్నగా తరుక్కున్న పచ్చిమిర్చి (కారం అవసరమైతే)

* అంగుళం(1/2 inch ) అల్లం తురుముకోవాలి

* సన్నగా తరుక్కున్న రెండు ఉల్లిపాయలు

* రెండు చెంచాల బియ్యప్పిండి లేదా శనగపిండి(మిశ్రమం దగ్గరపడటానికి)

* ఒక చెంచా జీలకర్ర

* తగినంత ఉప్పు

* అట్టు కాల్చటానికి ఒకోదానికీ 1/2 చప్పున నూనె

తయారీ:

* పైని పదార్ధాలన్నింటినీ(నూనె తప్ప) కొద్దిగా నీరుతో కలుపుకోవాలి క్రింద చూపిన విధంగా.

* పెనం కాలాకా, పిండిని పెనం మీద గుండ్రంగా పరచాలి క్రింది విధంగా. చేతిని నీటితో తడిపుకుని అట్టు వేస్తే త్వరగా చెయ్యి కాలకుండా వెయ్యగలుగుతాము.

చుట్టుతా ఒక అరచెంచా నూనె వేసి, రెండు మూడు నిమిషాల తరువాత అట్టు వెనకకు తిప్పుకోవాలి.

* చాలా రుచిగా ఉండే ఈ అట్లను ఏ చట్నీ తోనైనా తినవచ్చు. చల్లని సాయంత్రాలు లేదా ఎవరైనా అతిధులు వచ్చినప్పుడు చేసుకుంటే వెరైటీగా బాగుంటాయి. హెవీ టిఫిన్ కాబట్టి ఎక్కువ అట్లు వేయక్కర్లేదు... :)

శనగలతో పాఠోళీ

2010-09-02T20:45:00.000+05:30

శ్రావణమాసం వచ్చిందంటే నోములు, పేరంటాలు, వాయినాలు శనగలు...! ఆ శనగలతో వడలు, వాటిని పొగచడం, పాఠోళీ, చోలే కూర మొదలైన రకలన్నీ ఇంట్లో చేసేవారు. అన్నింటికన్నా నాకు బాగా ఇష్టమైనది పాఠోళీ.

ఈ వంటకానికి ఈ పేరు ఎలా వచ్చింది వగైరా వివరాలు తెలీదు కానీ అది చేయటమ్ మాత్రం నేర్చుకున్నాను.

పాఠోళీ చేసే విధానం:

* ఇది పెద్ద (తెల్ల)శనగలు కాకుండా నల్లగా, చిన్నగా ఉండే శనగలతో చేసుకుంటేనే రుచిగా ఉంటుంది.

* మొలకెత్తిన లేక నానబెట్టిన శనగలు ఉంటే సరే, లేకపోతే ముందురోజు రాత్రి శనగలు నానబెట్టుకోవాలి.

* పచ్చి శనగలు, పచ్చిమిర్చి, అల్లం, ఉప్పు బాగా మెత్తగా గ్రైండ్ చేసుకోవాలి. కొద్దిగా నీళ్ళు చల్లుకోవచ్చు రుబ్బేటప్పుడు కానీ మరీ పేస్ట్ లా అవకూడదు.

(ఎవరు తినగలిగే కారానికి తగినన్ని పచ్చిమిర్చి వాళ్ళు వేసుకోవాలి. నేనయితే పావుకేజీ శనగలకు 4 పచ్చిమిర్చి వేస్తాను.)

* పావుకేజీ శనగలకు రెండు పెద్ద ఉల్లిపాయలు చిన్నగా తరుగుకోవాలి. ఎత్తుకి ఎత్తు ఉల్లిపాయలు వేస్తే రుచి అని చెప్పేది అమ్మ.

* ఆవాలు, మినపప్పు, జీలకర్ర, ఇంగువ, కర్వేపాకు, చిటికెడు పసుపు వేసి పోపు వేగాకా తరిగిన ఉల్లిపాయముక్కలు వేసి వేయించాలి.

(శనగలతో కూర కాబట్టి పోపులో శనగపప్పు వేయనక్కరలేదు. కావాలంటే వేసుకోవచ్చు.)

* తరువాత గ్రైండ్ చేసుకున్న శనగల ముద్దను వేగిన ఉల్లిపాయముక్కల్లో వేసి కూర అడుగంటకుండా,మాడకుండా కలుపుతూ ఉండాలి.

* కాసేపటికి కూరంతా పొడిపొడిగా అవుతుంది.

* బాగా వేగింది అనిపించాకా దింపేసుకోవటమే. దగ్గర ఉండి మాడిపోకుండా ఎంత బాగా వేయించగలిగితే అంత రుచి ఈ కూర.

* వేడి వేడి అన్నంలో తినటానికి చాలా బాగుంటుంది.

* పాఠోళీ తయారీకి నూనె మాత్రం కాస్త ఎక్కువే పడుతుంది.

ఇవి పచ్చి సనగలు:

బొంబాయిలో పచ్చి శనగలు బాగా అమ్ముతారు. మేము వెళ్ళిన కొత్తల్లో అవేమిటో తెలిసేవికాదు. తర్వాత నేను కూడా కొని కొన్ని వంట ప్రయోగాలు చేసాను.

*******************************

నల్ల శనగల్లోని పోషకాలు + ఉపయోగాలు:

* వీటిలో ఫోలేట్, ప్రోటీన్, కార్బొహైడ్రేట్లు ఉంటాయి.

* వీటిలో ఫైబర్(పీచుపదార్ధం) ఉంటుంది, కొవ్వు తక్కువగా ఉంటుంది కాబట్టి డయాబెటిస్ ఉన్నవారు కూడా తినవచ్చు.

* కేల్షియం, జింక్, ఐరన్, మెగ్నీషియం, ఫోస్ఫరస్ మొదలైన మినరల్స్ కూడా వీటిల్లో ఉంటాయి.

* రక్తం లోని కొలెస్ట్రాల్ ను కూడా ఇవి తగ్గించగలవని ఇటీవలి పరిశోధనల్లో ఋజువైందట.

* ఈ శనగలను ఉడకపెట్టుకుని తింటే కడుపు నిండినట్లనిపిస్తుంది + మంచి ఎనర్జీను ఇస్తాయి.

అరటి దూట( Banana stem ) చేసే మేలు - కొన్ని వంటలు

2010-08-17T11:23:00.000+05:30

అరటి దూట తో చేసే వంటకాలు నాకెంతో ఇష్టం. ముఖ్యంగా అరటి దూట పెరుగుపచ్చడి. రోజూ దూట దొరికితే రోజూ తినేంత. సిటీల్లో అరటి దూట దొరకటం కొంచెం కష్టమైన పనే. అయినా దొరికినప్పుడల్లా కనీసం వారానికి రెండు,మూడుసార్లు అయినా తినటం చాలా ఆరోగ్యకరం.
దూట తినటం వల్ల ప్రయోజనాలు ఏమిటంటే --
1) దీనిలో పీచు పదార్ధం(ఫైబర్) ఎక్కువ ఉండటం వల్ల అరుగుదలకు చాలా ఉపయోగపడుతుంది.
2) పిచు పదార్ధం ఎక్కువ ఉండటం వల్ల అధిక బరువు తగ్గించటానికి కూడా దూట బాగా ఉపయోగపడుతుంది.
3) దీనిలోని పొటాషియం, విటమిన్ B6 శరీరంలో హీమోబ్లోబిన్ , ఇన్సులిన్ మొదలైన రసాయనాలను ఉత్పత్తి చేస్తాయి. పొటాషియం శరీరంలోని కండరాలు సరిగా పనిచేయటానికి, బ్లడ్ ప్రషర్ ను అదుపులో ఉంచటానికీ బాగా దోహదపడుతుంది.
4) దూటకు శరీరాన్ని చల్లబరిచే గుణం ఉంది.

ఒక గ్లాసు దూట రసం పొద్దున్న,సాయంత్రం త్రాగటం వల్ల ఉపయోగాలు :1) లేత అరటి దూట రసం tuberculosis తాలూకు బ్యాక్టీరియను సంహరిస్తుంది.
2) అన్నిరకాల మూత్ర సంబంధిత వ్యాధులనూ, యూరినరీ ఇన్ఫెక్షన్స్ నూ దూట రసం బాగా తగ్గిస్తుంది.
3) అరటిదూట రసం అన్నిరకాల కిడ్నీ రాళ్ళను కరిగిస్తుందని అంటారు. గాల్ బ్లాడర్ లోని రాళ్ళను కూడా కరిగిస్తుందని అంటారు.
అయితే ఈ రసాన్ని బూడిదగుమ్మడికాయ రసంతో కలిపి తీసుకోవటమ్ వల్ల ఎక్కువ ప్రయోజనాలు ఉంటాయిట.

తరగటం కొద్దిగా కష్టమైన పని అయినా అరటిదూట వల్ల శరీరానికి జరిగే మేలు అనంతం కాబట్టి వీలైనంత ఎక్కువగా తినటం ఎంతో ఆరోగ్యకరం.
ముందుగా దూటను తరిగే పధ్ధతి:

పైన చూపిన విధంగా చక్రాలాగ తరుక్కుని, తరువాత చిన్న చిన్న ముక్కలుగా తరుక్కోవాలి.
వీటిని పల్చటి మజ్జిగ నీళ్ళలో వేసి ఉంచుకోవాలి. లేకపోతే నల్లబడిపోతాయి.

ఇక దీనితో తయారయ్యే వంటకాలు కొన్ని..

దూట కూర :(1.ఆవ పెట్టి)

"అరటిదూట ఆవకూర చేయటం వస్తే బోలెడు ఓర్పు ఉన్నట్లు లెఖ్ఖ..." అని శ్రీరమణగారి బంగారుమురుగు కధలోని బామ్మగారు చెప్తారు.
చిన్నగా తరిగిన అరటి దూట ముక్కలను తగినన్ని నీళ్ళలో ఉప్పు వేసి ఉడకబెట్టుకోవాలి. (ఉడికాకా నీళ్ళు వార్చకుండా సరిపోయేటన్నే పోసుకోవాలి.)
ఉడికాకా ముక్కలలో కొద్దిగా నీరు ఉన్నా తడిలేకుండా వార్చేసుకోవాలి.
తరువాత తగినంత నూనెలో ఆవాలు, మినపప్పు, శనగపప్పు, కొద్దిగా జీలకర్ర, ఎండు మిరపకాయలు, కర్వేపాకు,ఇంగువ వేసి పోపు పెట్టుకోవాలి.
కూర చల్లారిన తరువాత, కొద్దిగా పచ్చిఆవ పొడి(బజారులో దొరుకుతుంది లేదా పచ్చి ఆవాలను గ్రైండ్ చేసుకోవచ్చు.) చల్లి బాగా కలుపుకోవాలి.

దూట కూర :(౨.కొబ్బరి వేసి)

కూర పైన చెప్పిన విధంగానే చేసుకోవాలి. ఆవ బదులు పోపు పెట్టేప్పుడు తురుముకున్న పచ్చి కొబ్బరి వేసి కలుపుకోవాలి. అందులో ఉడికిన దూట ముక్కలు వేసి రెండు నిమిషాల తరువాత దింపుకోవాలి.

దూట కూర (౩.చింతపండు రసంతో):

ముందు నిమ్మకాయంత చింతపండు గోరువెచ్చనినీళ్ళలో నానబెట్టి రసం చిక్కగా తీసి ఉంచుకోవాలి.
తరువాత పైన చెప్పిన విధంగా పోపు పెట్టేసుకుని, చిటికెడు పసుపు, కాస్తంత చింతపండు రసం వేసి, అందులో ఉడికిన దూట ముక్కలు వేసి బాగా కలిపాకా దింపుకోవాలి. దీనిలో పచ్చికొబ్బరి కోరు కూడా వేసుకోవచ్చు.

దూట - పెసరపప్పు పొడి కూర (౪):

చిన్నగా తరిగిన అరటి దూట ముక్కలను, ముక్కలకు సగం క్వాంటిటీలో పెసరపప్పును తగినన్ని నీళ్ళలో ఉప్పు వేసి ఉడకబెట్టుకోవాలి. పెసరపప్పు బద్దగానే ఉండాలి. ముద్ద అవ్వకుండా చూసుకుంటూ ఉండాలి. పొడి పొడిగా ఉడికాకా దింపేసుకోవాలి.
ఆవాలు, మినపప్పు, కొద్దిగా జీలకర్ర, ఇంగువ, పచ్చిమిర్చి,ఎండుమిర్చి (రెండూ తినే కారాన్ని బట్టి),కర్వేపాకు, చిటికెడు పసుపు వేసి,అందులో ఉడికిన దూట ముక్కలు, పెసరపప్పు మిక్స్ వేసి రెండు నిమిషాల తరువాత దింపుకోవాలి.

దూట పెరుగు పచ్చడి :

కమ్మని పెరుగు ఒక కప్పు కాసిని నీళ్ళలో చిలికి ఉంచాలి. ఉప్పు కలపాలి.
తరువాత తరిగిన దూట ముక్కలను (పచ్చివే) చిలికిన పెరుగులో కలపాలి.
ఆవాలు, మినపప్పు, మెంతులు, కర్వేపాకు, పచ్చిమిర్చి, కొద్దిగా జీలకర్ర, ఇంగువ వేసి పోపు పెట్టుకోవాలి.
(ఆవ ఇష్టం ఉంటే) దీనిలో కొద్దిగా పచ్చిఆవ పొడి కలుపుకుంటే చాలా బాగుంటుంది.
మెంతులు ఇష్టం లేకపోతే పోపులోనే చిటికెడు మెంతిపొడి వేసి బాగా వేగాకా(ఎర్రబడ్డాకా) పెరుగులో కలుపుకోవచ్చు.

Green Tea అద్భుతాలు

2010-06-18T11:34:00.000+05:30

మనం నిత్యం తాగే "టీ" ముఖ్యంగా నాలుగు రకాలు. వైట్, గ్రీన్, బ్లాక్, వూలాంగ్ (బ్లాక్ డ్రాగాన్ టీ). ఈ టీ ఆకులన్నీ Camellia sinensis అనే టీప్లాంట్ నుంచే వస్తాయి. కాకపోతే ఆకులను "స్టీమ్ చేయటం", "ఫెర్మెంట్ చేయటం"(oxidation), "ఎండబెట్టడం" మొదలైన ప్రోసెసింగ్ విధానంలో తేడా వల్ల వాటికి ఆ యా పేర్లు, ప్రత్యేకమైన రుచులు వచ్చాయి. మిగిలిన టీలన్నింటిలోకీ "బ్లాక్ టీ" కొద్దిగా స్ట్రాంగ్ గానూ, ఎక్కువ కెఫీన్ ను కలిగి ఉంటుంది.

ప్రస్తుతం నేను చెప్పబోయేది ఆరోగ్యకరమైన "గ్రీన్ టీ" గురించి. చైనా లో పుట్టిన ఈ గ్రీన్ టీ ఈ మధ్యనే ప్రపంచవ్యాప్తంగా ఎంతో ఎక్కువ ప్రాముఖ్యత సంపాదించుకుంది. అతి తక్కువగా ఫెర్మెన్ట్ చేయబడ్డ టీ ఆకులు ఇవి. గ్రీన్ గ్రీన్ టీ కూడా చాలా వరైటీలు ఇప్పుడు లభ్యమౌతున్నాయి. గత కొన్ని సంవత్సరాలుగా జరుగుతున్న వైద్య పరమైన రీసర్చ్ లు, ప్రయోగాల వల్ల గ్రీన్ టీకు సంబంధించిన ఎన్నో ప్రయోజనాలూ, ఉపయోగాలూ కనుగొనబడ్డాయి. గ్రీన్ టీ తాగటo వల్ల చేకూరే ఆరోగ్యపరమైన కొన్ని ఉపయోగాలు:

* గ్రీన్ టీలో EGCG (Epigallocatechin Gallate) అనే శక్తివంతమైన anti-oxident ఉంది. (anti-oxidents శరీరంలోని రోగనిరోధక శక్తిని పెంచి, ఆరోగ్యాన్ని కాపాడతాయి)

* రెగులర్ గా గ్రీన్ టీ త్రాగేవారికి "హార్ట్ డిసీజెస్" వచ్చే అవకాశాలు తక్కువ ఉంటాయి.

* కొన్నిరకాల కేన్సర్లను రాకుండా నివారించగలిగే శక్తి ఈ టీ లో ఉంది.

* అధిక బరువును తగ్గిస్తుంది.

* రోజూ గ్రీన్ టీ తాగటం వల్ల అధిక కొలెస్ట్రాల్ లెవెల్స్ తగ్గుతాయి.

* బేక్టీరియాను నివారించే సామర్ధ్యం ఉండటం వల్ల ఇన్ఫెక్షన్స్ ను రానివ్వకుండా చేయటమే కాక పళ్ళ ను కూడా సురక్షితంగా ఉంచగలుగే శక్తి గ్రీన్ టీకు ఉంది.

* గ్రీన్ టీ చర్మ రక్షణకు, సౌందర్యపోషణకు కూడా ఉపయోగకరం అని శాస్త్రవేత్తలు కనుగొనటమ్ వల్ల మార్కెట్లో గ్రీన్ టీ తో తయారు చేసిన సబ్బులు, షాంపూలూ, డియోడరెంట్ళు, క్రీమ్లు కూడా లభ్యమౌతున్నాయి.

మరి ఇన్ని ఉపయోగాలున్న గ్రీన్ టీ ను రోజూ తాగటం మొదలెట్టేయండి. నేను రెండు సంవత్సరాల నుంచీ రోజూ మధ్యాహ్నాలు తాగుతున్నాను. మార్కెట్లో దొరికే గ్రీన్ టీబ్యాగ్స్ కన్నా , గ్రీన్ టీ ఆకులను కొనుక్కుంటే మనకు కావాల్సిన ఫ్లేవర్స్లో త్రాగచ్చు.

గ్రీన్ టీ తయారీ:
* ఒక కప్పు నీళ్ళు బాగా మరగబెట్టి దింపుకోవాలి.
* తరువాత ఒక చిన్న చెంచాడు గ్రీన్ టీ ఆకులను అందులో వేసి 1,2 నిమిషాలు మూత పెట్టి ఉంచాలి.
* ఫ్లేవర్ కోసం ఆకులతో బాటుగా పావు చెంచా నిమ్మరసం, పంచదార బదులు తేనె కలుపుకుంటే ఆరోగ్యకరం.
* రెండు నిమిషాల తరువాత వడబోసుకుని త్రాగేయటమే..!

ఫ్లేవర్స్:

* నిమ్మరసంతో బాటుగా రెండు మూడు పుదీనా ఆకులను కూడా వేసుకుంటే అమోఘంగా ఉంటుంది.
* నిమ్మరసంతో పుదీనాకు బదులు చిన్న అల్లం ముక్క తొక్కి వేసుకున్నా బాగుంటుంది.
* నిమ్మరసం వాడకపోయినా పుదీనాకు బదులు నాలుగు తులసి ఆకులు కూడా వాడవచ్చు.