మార్కెట్ నుండి కూరలు తెచ్చాకా ముందర త్వరగా పాడయిపోయేవీ, పండిపోయే కూరలనీ వండేసుకుంటాం కదా! ఎంత జాగ్రత్తగా ఏరి తెచ్చుకున్నా దొండకాయలు త్వరగా పండిపోతూంటాయి. అలాంటివాటిని పడేయకుండా తీపి కూర వండేసుకోవచ్చు. పండిపోవడం అంటే మరీ ఎర్రగా, మెత్తగా అయిపోయినవి కాక ఆకుపచ్చదనం పోయి కాస్తఎరుపెక్కిన దొండకాయలు ఉంటాయి కదా..అవన్నమాట!! వాటితో కారంపెట్టి కూర  చేసినా పుల్లగా ఉంటాయి ముక్కలు. అందుకని మా చిన్నప్పుడు అమ్మ ఇలా తీపి వేసి వండేసేది. 'తియ్యగా' ఉంటే చాలు.. వదలకుండా తినేసేవాళ్ళం..:)


* ముందర తరిగేప్పుడే కాస్త పండిపోయినట్లున్న దొండకాయ ముక్కలు వేరే గున్నెలో వేసుకోవాలి.
* అవి కప్పుడు ముక్కలు ఉంటే అర కప్పు నీళ్ళు, పావు చెంచా ఉప్పు; 
రెండు కప్పులు ముక్కలు ఉంటే ఒక కప్పు నీళ్ళు, అర చెంచా ఉప్పు రెండు విజిల్స్ వచ్చేదాకా ప్రెషర్ కుక్ చెయ్యాలి.

సుమారు పావుకేజీ కూరకి:

* మూకుడులో ఒక చెంచా నూనె వేసి అర చెంచా శనగపప్పు, మినపప్పు, పావు చెంచా ఆవాలు, జీలకర్ర వేసి, రెండు ఎండు మిరపకాయలు, రెండు రొబ్బలు కర్వేపాకు, చిటికెడు ఇంగువ,పసుపు వేసి పోపు వేయించాలి.

* ఉడికిన ముక్కలు (నీళ్ళు ఉంటే వాటితో పాటే) పోపులో వేసేయాలి. చిన్న నిమ్మకాయంత బెల్లం తరుగు(తీపి బాగా ఇష్టమతే ఇంకాస్త వేసుకోవచ్చు) అందులో వెయ్యాలి. ఉప్పు మరికాస్త కావలిస్తే కలుపుకోవాలి.

* బెల్లం కరిగి, కూర ముక్కల్లో నీళ్ళు పూర్తిగా ఇగిరే వరకూ మధ్య మధ్య కూర కలుపుతూ ఉండాలి.

* కూరంతా దగ్గరపడి,ఉడికింది అనిపించాకా చివర్లో ఫ్రెష్ కొబ్బరి(ఫ్రెష్ అయితే బెటర్) కానీ, ఎండు కొబ్బరి పొడి గానీ రెండు చెంచాలు వేసి స్టౌ ఆపేయాలి.

* పండిన దొండకాయ ముక్కలు పుల్లగా ఉంటాయి కాబట్టి కూరలో ఇంక చింతపండు రసం లాంటివేమీ కలపక్కర్లేదు.

* తియ్యతియ్యగా,పుల్లపుల్లగా బావుంటుందీ కూర!

* తీపి వద్దనుకుంటే ఉడకపెట్టిన ముక్కలు పోపులో వేసేసి, కొబ్బరి కోరు వేసి కూడా వండుకోవచ్చు.

 మేం బొంబాయిలో ఉన్నప్పుడు "మేథీ థేప్లా" అని దొరికేది. కాస్త స్పైసీ గా ఉంటుంది. మెంతి ఆకులు, ధనియా పౌడర్, మిర్చి పౌడర్, పసుపు అవీ వేసి చేస్తారు. అలా కాకుండా ప్లైన్ గా ఏ పొడాలు కలపకుండా నేనిలా ప్లైన్ మెంతి చపాతీలు చేస్తూంటాను. పెద్ద మెంతికూర కట్టలు కాకుండా చిన్నమెంతి కట్టలు అమ్ముతారు కదా.. అవి వాడతాను. ఇవి మనం ఇంట్లో కూడా పెంచుకోవచ్చు. కుండీలో గుప్పెడు మెంతులు వేస్తే ఇలా చిన్నచిన్న మొక్కలు వస్తాయి.

మెంతి చపాతీ:

* చిన్న మెంతి కట్టలు రెండు బాగా కడిగి నీళ్ళు ఓడ్చేయాలి ఇలా..

* మామూలుగా మనం చపాతీకి కలుపుకునే పిండిలోనే ఈ కడిగిన చిన్న మెంతి ఆకులు కూడా వేసి పిండి కలుపుకోవాలి. చిన్న కట్టలే కాబట్టి తరగక్కర్లేదు.

* మామూలుగా చపాతి ఒత్తుకున్నట్లే ఒత్తేసి, కాల్చటమే. 

* చిన్న మెంతి కాబట్టి చేదు కూడా తెలీదు.

* పిల్లలకి కాస్త నెయ్యి వేసి చపాతీ కాలిస్తే ఇష్టంగా తింటారు.

ఉసిరి దొరికే సీజన్ అయిపోతూంటే ఇప్పటికి కుదిరింది రాయడానికి..! రుచి సంగతి ఎలా ఉన్నా ఔషధగుణాలు పుష్కలంగా ఉన్న ఉసిరికాయను ఏడాది పొడువునా తినగలిగేలా నిలవచేసి పచ్చడి చేసుకునే పధ్ధతి మన పెద్దవాళ్ళు మనకు చెప్పారు. ఆవకాయ కన్నా ఉసిరిపచ్చడి శ్రేష్ఠం. ఉరిసితొక్కు నిలవ ఉంచి, అప్పుడప్పుడూ అంత తొక్కుతో పచ్చడి చేసుకు రోజూ భోజనంలో మొదటి ముద్దలో తింటే ఎంతో మంచిదిట. కనీసం మనం మొదట తినే పప్పులో అయినా నంచుకుంటే ఆరోగ్యానికి మేలు. 

ఉసిరి కొనేప్పుడు కూడా కార్తీకమాసంలో దొరికే ఉసిరికాయలు కొనాలిట. వాటిల్లో ఔషధగుణాలు ఇంకా ఎక్కువగా ఉంటాయిట. పచ్చడి తర్వాత చేసుకున్నా కార్తీకమాసం అయ్యేలోపూ ఉసిరికాయలు కొని ఫ్రిజ్ లో పెట్టేస్తుంటాను నేను. సరే, ఇప్పుడు ముందు ఉసిరి తొక్కు నిలువ ఉంచేదెలాగో చెప్తానేం...

ఉసిరి తొక్కు నిలువ చేయడం:

* ముందర ఉసిరికాయలు కడిగి, తుడిచి, తడి ళేకుందా ఆరబెట్టాలి.

* తర్వాత చిన్న చిన్న ముక్కలు చెయ్యాలి. ఇలా..

* ముక్కలు గ్రైండర్ లో వేసి ఊరగాయలకు వాడే రాళ్ల ఉప్పు, పసుపు వేసి మెత్తగా తిప్పుకోవాలి. పావుకేజీ ఉసిరికాయలకు రెండు గుప్పెళ్ళు ఉప్పు, రెండు చెంచాల పసుపు వేయచ్చు.

అలా గ్రైండ్ చేసిన ఉసిరి తొక్కు ఇలా ఉంటుంది..

* ఇది ఒక సీసాలో కానీ పింగాణీ జాడీలో కానీ వేసి తడి తగలకుండా మూత పెట్టాలి. కావాల్సినప్పుడల్లా కాస్త కాస్త తీసి పచ్చడి చేసుకోవచ్చు.

ఉసిరి పచ్చడి:

* సుమారు టీ గ్లాసుడు ఉసిరి తొక్కును పచ్చడికి తీసుకుంటే నాలుగు ఎండు మిరపకాయలు, నాలుగు పచ్చిమిరపకాయలు, ఒక మీడియం సైజు కట్ట కొత్తిమీర తీసుకోవాలి.

* ఒక చెంచా నూనెలో మినపప్పు, ఆవాలు, ఇంగువ, ఎండు మిర్చి వేసి వేగాకా ఒక చెంచా మెంతిపొడి వేసి, మెంతిపొడి బాగా ఎర్రగా వేగాకా స్టౌ ఆపేయాలి. అప్పుడు కడిగి, తరిగిన కొత్తిమీర ఆ వేడి పోపులో వెయ్యాలి. కాస్త మగ్గినట్లు అవుతుంది.

*  వేగిన ఎండు మిర్చి, కొత్తిమీర, పచ్చిమిరపకాయలు గ్రైండర్ లో వేసి ఒకసారి తిప్పాకా , ఉసిరి తొక్కు కూడా అందులో వేసి మొత్తం కలిసేలా మిక్సీ మరోసారి తిప్పాలి.

* నిలవ ఉంచేప్పుడు ఉప్పు వేస్తాం కాబట్టి, ఇంకా ఉప్పు అవసరం అనుకుంటే రుచి చూసి తగినంత కలుపుకోవాలి.

* ఇలా చేసుకున్న పచ్చడి కూడా నాలుగైదు నెలలు పాడవకుండా ఉంటుంది.

---------------------------

ఉసిరి ఆవకాయ:

* ఉసిరికాయలు ముక్కలు చెయ్యకుండా కాయలకు మధ్య మధ్య చాకుతో గాట్లు పెట్టి, మూకుడులో రెండు చెంచాల నూనె వేసి కాస్త మగ్గించాలి. కాయలు కాస్త మెత్తబడ్డాయి అనుకున్నాకా ఆపేయాలి. ఇలా చేస్తే ముక్కలు త్వరగా ఊరతాయి. 

* ఆవకాయ పాళ్ళలో ఆవపొడి, కారం, ఉప్పు (౧:౧:౧) తీసుకుని ఊరగాయ పెట్టేసుకొవడమే.

రెండవరకం:

* ఇందులో కాస్త మెంతిపిండి కలుపుతారు. ప్రొసిజర్ ఇదివరకూ దబ్బకాయ ఊరగాయ  చెప్పాను.. అలానే..! దబ్బకాయ ముక్కలకు బదులు మగ్గించిన ఉసిరికాయలు చల్లారాకా, అవి పిండిలో కలుపుతాం. అంతే!

* ముక్కలుగా కోసి అవకాయ పెట్టుకున్నా ముక్కలు చెంచాడు నూనెలో మగ్గిస్తే బావుంటుంది.