మ్యాగీ మంచిది కాదు, వద్దు... అని వింటున్నా అప్పుడప్పుడు నెలకొకసారి తినేలా ఒక పేకెట్ కొనేదాన్ని మా పాప కోసం. వెజ్ ఆటా నూడుల్స్, ఓట్స్ నూడుల్స్ అంటూ ఏ రకం కొన్నా అవన్నీ కూడా మంచివి కాదనే ఆర్టికల్ ఒకటి చదివాకా, రెండేళ్ళుగా మ్యాగీ అనేది పూర్తిగా కొనడం మానేసి ప్లైన్(ఎగ్ లెస్)  నూడుల్స్ కొని పాపకు చేసి పెడుతున్నాను. మ్యాగీ కన్నా బెటర్ అయినా అది కూడా నెలకు ఓ రెండు సార్లు చేస్తాను. ఆ మధ్యన ఓ సూపర్ మార్కెట్లో ప్లైన్ న్మూడుల్స్ అడిగితే Veg.Hakka Noodles పేకెట్ ఇచ్చారు అదే ఉందని. 

ఈ నూడుల్స్ ప్లైన్ వాటి కంటే కాస్త లావుగా ఉంటాయంతే. టేస్ట్ కూడా వాటికన్నా ఇంకొంచెం బావున్నాయి. ప్లైన్ నుడుల్స్ తో కూడా తయారీకి క్రింద రాసిన సేం ప్రొసీజర్ ఫాలో అయిపోవచ్చు..

తయారీ:
* ముందు నూడుల్స్ మూడు రెట్లు నీళ్లలో తగినంత ఉప్పు వేసి ఉడకపెట్టి, స్ట్రైనర్ లో వార్చేసి, ఒక చెంచా నూనె వేసి కలిపి పక్కన ఉంచాలి.

* తర్వాత కూర ముక్కలు తరుక్కోవాలి. (ఇలాగని కాదు ఏ ఆకారంలో అయినా తరుక్కోవచ్చు :))

* ఫ్రైయింగ్ పేన్ లో ఒక చెంచా నూనె వేసి కూర ముక్కలు, తగినంత ఉప్పు వేసి మూత పెట్టేస్తే, ఐదు నిమిషాల్లో మగ్గిపోతాయి. (ఉప్పువల్ల ముక్కలు మెత్తబడి త్వరగా మగ్గుతాయి..i.e ఉడుకుతాయి)
* తర్వాత కూర ముక్కల్లో అరచెంచా వైట్ పెప్పర్(white pepper), ఒక చెంచా(medium spoon) సోయా సాస్ (soya sauce) వేసి రెండు, మూడు నిమిషాల తర్వాత ఉడికించి ఉంచిన నూడుల్స్ అందులో వేసి, నూడుల్స్ బ్రేక్ అవకుండా చెక్క గరిటెతో బాగా కలపాలి. 
* ఫ్రైయింగ్ పేన్ హేండిల్ పట్టుకుని కదిపినప్పుడు స్టిక్కీగా కాకుండా నూడుల్స్ పైకీ కిందకీ కదిలేలా ఉంటే బాగా కుదిరినట్లు.

* అన్నీ బాగా కలిసాయి అనిపించాకా, ఉప్పు చెక్ చేసి స్టౌ ఆపేయాలి.
* చివర్లో తినేవాళ్ల ఇష్టాన్ని బట్టి కాస్త టమాటో సాస్ వేసి సర్వ్ చెయ్యడమే.

శ్రావణమాసంతో పాటూ శెనగలు రావడం కూడా మొదలైపోయింది.. మరి వాటిని ఎలా చెల్లుబాటు చేస్కోవాలో ఆలోచించాలి కదా! 
శెనగలతో ఏమేమి చేయచ్చు అంటే..
* ముందు వాటిని మూటకట్టి మొలకలు తెప్పించాలి. అప్పుడు వాడుకుంటే ఆరోగ్యకరం.
* మొలకెత్తిన పచ్చి శెనగలు ఓ గుప్పెడుదాకా తినగలం :)
* ఉడకబెట్టుకుని ఉప్పు,కారం వేసుకుని ఇంకాసిని తినచ్చు.
* ఇంకా వంకాయ, క్యేబేజీ మొదలైన కరల్లో, ఉప్మాల్లో కాసిని శెనగలు వేసేస్తూ ఉండచ్చు.  
* శనగలతో 'పాఠోళీ' మంచి కూర. రెసిపీ అప్పుడేప్పుడో చెప్పేసాను కదా..( http://ruchi-thetemptation.blogspot.in/2010/09/blog-post.html )

* chole masala with white chana
* chana masala with black chana

ఇక ఇప్పుడు రెండు చిన్న రెసిపీలు చెప్తాను..

1) శెనగలు సాతాళింపు: 


* సాతాళించు అంటే నూనెలో వేయించడం అని అర్థం. శెనగలన్నీ సరిపోయేంత ఎక్కువ నూనె అక్కర్లేదు కానీ  వాయినానికి వచ్చే దోసిడు శెనగలకి ఒక చెంచా నూనె చాలు.

* ఒక చెంచా నూనెలో మినపప్పు, ఆవాలు,జీలకర్ర, కర్వేపాకు,ఎండు మిర్చి చిటికెడు ఇంగువ వేసి పోపు వేయించాలి. తర్వాత మొలకెత్తిన శెనగలు అందులో వేసి మూకుడుపై మూత పెట్టి అంది మీద కాసిని(అర గ్లాసుడు) నీళ్ళు పోయాలి. నాన్స్టిక్ పేన్ అయితే నీళ్ళు అక్కర్లేదు. క్లోజ్డ్ లిడ్ ఉంటుంది కాబట్టి.

* మధ్య మధ్య కలుపుతూ ఉంటే ఐదు నిమిషాల్లో శెనగలు వేగిపోతాయి. 

* ఉడకపెడితే మెత్తబదతాయి కానీ ఇలా చేయడం వల్ల శెనగలు మెత్తబడతాయి + క్రిస్పీగా ఉంటాయి కూడా.

* స్టౌ ఆపేసాకా వేగిన శనగలకి తరిగిన పచ్చి ఉల్లిపాయ ముక్కలు కలిపి, కొత్తిమీర చల్లి, ఓ నిమ్మ చెక్కపిండితే... రుచి అద్భుత:  :-)

* శనగలు బాగా క్రిస్పీగా కావాలనుకుంటే మూతలో నీళ్ళు పొయ్యకుండా ఓపెన్ గా ఫ్రై చెయ్యాలి. మరో స్పూన్ నూనె వెయ్యాలి. అంతకన్నా అక్కర్లేదు.

2) శెనగ వడలు:

కప్పుడు శెనగలు(సుమారు వందగ్రాములు)
రెండు పచ్చిమిరపకాయలు
అంగుళం అల్లం ముక్క
కాస్త కొత్తిమీర లేక పుదీనా(రెండిటికీ రెండు రకాల రుచి వస్తుంది)
ఒక మిడియం ఉల్లిపాయ ముక్కలు
రెండు చెంచాలు బియ్యప్పిండి


* ముందు శెనగలు, ఉప్పు, పచ్చిమిరపకాయలు, అల్లం, కొత్తిమీర/ పుదీనా కలిపి మెత్తగా మిక్సీలో తిప్పేసుకోవాలి. మెత్తబడటానికి కాసిని నీళ్ళు పోసుకోవచ్చు.
* తరువాత తరిగిన ఉల్లిపాయ ముక్కలు శెనగల ముద్దలో కలపాలి. 
* రెండు చెంచాల బియ్యప్పిండి కూడా ఈ ముద్దలో కలపాలి.
* చిన్న చిన్నగా ముద్దలు తీసుకుని వడల్లా నూనెలో వేయించుకోవడమే. 
* ఇవి వేడిగా తింటే క్రిస్పీగా బాగుంటాయి. చల్లారిపోతే మెత్తబడిపోతాయి.

3)vadas with mix of corn kernels
3/4cup black chana
1/3cup corn kernels

మా చిన్నప్పుడు ఎక్కువగా తిన్న ఈవినింగ్ స్నాక్ ఇది. ఈజీగా అయిపోతుందనేమో అమ్మ చేస్తూండేది. మహారాష్ట్రలో "కాందా పోహా" అని బ్రేక్ఫాస్ట్ గా ఇది ఎక్కువగా తింటూంటారు. అక్కడ హోటల్స్ లో కూడా ఇది ఒక ఐటెమ్ గా దొరుకుతుంది. మేం బొంబాయిలో ఉండగా మావారి ఆఫీసులో శనివారాలు బ్రేక్ఫస్ట్, లంచ్ పెట్టేవారు స్టాఫ్ కి . అప్పుడు రెగులర్ గా పొద్దున్న బ్రేక్ఫాస్ట్ "కాందా పోహా" ఉండేది వాళ్ళకి. తిని తినీ బోర్ కొట్టి ఇంక శనివారాలు ఆఫీసులో టిఫిన్ స్కిప్ చేసేస్తూ ఉండేవారు ఆయన. నాకు మాత్రం మహా ఇష్టం ఇది.


చెయ్యడం ఎలాగంటే:
 * ఒక పెద్ద గ్లాసు అటుకులు కాస్త పావు గ్లాసు నీళ్ళు చల్లి తడిపాలి. ఎక్కువ నీళ్ళు పోసేస్తే అటుకులు ముద్దయిపోయి పొడిపొడిగా ఉండవు. అటుకులు స్ట్రైనర్ లో పెట్టి పైనుండి నీళ్ళు పోస్తే ఎక్సెస్ వాటర్ ఏదైనా ఉన్నా చిల్లుల్లోంచి క్రిందకి పోతాయి.

* అలా తడిపిన అటులుల్లో ఉప్పు, పసుపు చల్లి కలిపి ఉంచాలి.

* ఒక మీడియం సైజు ఉల్లిపాయ చిన్న ముక్కలు తరిగి ఉంచాలి.

* మూకుడులో ఒక చెంచాల నూనె వేసి, ఆవాలు, జీలకర్ర, శనగపప్పు,మినపప్పు, వేరుశనగ గుళ్ళు, కర్వేపాకు,మిర్చి, ఇంగువ వేసి పులిహారకి మల్లే పోపు వేయించుకోవాలి.

*పోపు వేగాకా అందులో తరిగిన ఉల్లిపాయ ముక్కలు వేసి కాస్త వేగాకా స్టౌ ఆపేయాలి.

* తడిపి ఉంచిన అటుకులు అందులో వేసి బాగా కలిపి, ఒక చిన్న నిమ్మకాయ రసం తీసి అటుకుల పులిహారలో బాగా కలపాలి.

* కాస్త కొత్తిమీరతో అలంకరించి తినెయ్యడమే :)


బ్రేక్ఫాస్ట్, ఈవినింగ్ స్నాక్ లాగనే కాక రాత్రిపూట లైట్ గా భోజనం చెయ్యాలనుకున్నప్పుడు కూడా ఇది చేసుకోవచ్చు.
 

ఇదివరకూ మొక్కజొన్న వడలు, పొంగడాలు విడివిడిగా రెసిపీలు రాసాను . ఈసారి మొక్కజొన్నలతో పొంగడాలు చేయడం ఎలానో చెప్తానేం..!


మా నాన్నగారు హార్ట్ పేషంట్. ఆయిల్ బాగా తక్కువ వాడాలి కాబట్టి సాయంత్రం స్నాక్స్ క్రింద మా అమ్మ ఇలా రకరకాల పొంగడాలు వేస్తూంటూంది. మొక్కజొన్నలతోనే కాక బొబ్బర్లు, సోయా బీన్ గింజలు, మొలకెత్తిన పెసలు మొదలైనవాటితో రోజుకో రకం పొంగడాలు చేస్తుంది అమ్మ. పొంగడాలు వేసే గుంటల్లో ఒక చుక్క ఆయిల్ వేయచ్చు. డీప్ ఫ్రైడ్ ఐటేమ్స్ అవాయిడ్ చెయ్యాలనుకునేవారు ఇలా మొలకెత్తిన గింజలతో పొంగడాలు చేసుకుంటే ఆరోగ్యకరం.

ఇప్పుడు కూరల మార్కెట్లో, షాపింగ్ మాల్స్ లో అన్ని సీజన్స్ లో మొక్కజొన్నలు దొరుకుతున్నాయి కాబట్టి మొక్కజొన్నతో లేదా ఇష్టమైన వారు స్వీట్ కార్న్ తో కూడా ఈ పొంగడాలు చేయచ్చు.

మొక్కజొన్న పొంగడాలకు కావాల్సినవి:

మొక్కజొన్న లేదా స్వీట్ కార్న్ గింజలు - ఒక కప్పు
చిన్న ఉల్లిపాయ - తరిగిన ముక్కలు 
చిన్న అల్లం ముక్క
రెండు పచ్చిమిరపకాయలు
చిన్న కట్ట కొత్తిమీర లేదా పుదీనా
రెండు చెంచాలు బియ్యప్పిండి 
తగినంత ఉప్పు

తయారీ:
* ముందుగా మొక్కజొన్న గింజలు, అల్లం, మిర్చి, కొత్తిమీర/పుదీనా, ఉప్పు కలిపి కాస్త నీళ్ళు కలిపి మెత్తగా మిక్సీలో గ్రైండ్ చేస్కోవాలి.
* ఆ పిండిలో ఉల్లిపాయ ముక్కలు, రెండు చెంచాలు బియ్యప్పిండి కలిపి, పొంగడాలు గుంటల్లో ఒక చుక్క నూనె వేసి, పిండిని వేసి మూత పెట్టాలి.
* మూడు నాలుగు నిమిషాల తరువాత పొంగడాలు వెనక్కు తిప్పాలి.
* రెండువైపులా బాగా కాలాకా స్టౌ ఆపేయాలి.
* కొత్తిమీర/పుదీనా + అల్లం వేస్తాం కాబట్టి చట్నీ ఏమీ లేకపోయినా ఉట్టినే తినేయచ్చు.

టిప్:

* మొక్కజొన్న లేతది కాక కాస్త ముదిరినదైనా పొద్దున్నే గింజలు వొలిచి నోళ్ళల్లో నానబెడితే సాయంత్రానికి నాని రుబ్బుతే పేస్ట్ అవుతాయి.

ఇదే రెసిపీ పైన రాసినట్లు మొలకెత్తిన పెసలతో/ సోయా / బొబ్బర్లు మొదలైన నానబెట్టిన గింజలతో చేసుకుంటే  టీ టైం స్నాక్ గా బావుంటాయి. ఆయిల్ ఫ్రీ ఫుడ్ తప్పనిసరిగా తినాల్సినవాళ్ళకి ఆరోగ్యకరం, ఉపయోగకరం.

Pasta in white Sauce without adding cream

ఓసారి ఓ బఫే లంచ్ కి వెళ్లినప్పుడు అక్కడ 'లైవ్ పాస్తా కౌంటర్' లో 'ఫుల్ క్రీమ్ పాస్తా' టేస్ట్ చూసినప్పటినుండీ అది చెయ్యమని మా అమ్మాయి పేచీ! మ్యాగీ వాళ్ళదో ఎవరిదో రెడీమేడ్ క్రీమీ పాస్తా(టూ మినిట్స్ మ్యాగీ లాంటిది) కొన్నాం కానీ అది బాలేదుట. హోటల్లో చేసినట్లే కావాలని గొడవ. సరే మరి తప్పుతుందా? పాస్తా కొనుక్కొచ్చా. ఆ పాస్తా రకాల్లో నాకన్నింటి కన్నా ఇలాంటివే నచ్చుతాయి.

రెసిపీ గూగులించి మొత్తానికి తయారు చేసా! అమ్మాయికీ, వాళ్ల నాన్నకీ బాగా నచ్చింది. మరి నాలా ఇప్పటిదాకా చెయ్యనివాళ్లెవరైనా ఉంటే ఇలా చేసేసుకోండి..

తయారీ:

* ముందుగా పాస్తా ని బోలెడు నీళ్ళలో.. అంటే ఒక కప్పు పాస్తా అయితే నాలుగు కప్పుల నీళ్లలో ఓ చెంచా ఉప్పు వేసి మరిగించాలి. పాస్తా ఉడికాకా చల్లటి నీళ్లతో వడబోసేసి ఒక చెంచా నునె వేసి కలిపి పక్కన పెట్టుకోవాలి. ఇలా చేస్తే ముద్దయిపోకుండా పొడిపొడిగా ఉంటుంది పాస్తా.(నూడుల్స్ లాగానే)

* తర్వాత ఓ కేరెట్, కాస్తంత స్వీట్ కార్న్ గింజల్ని కాస్త ఉప్పు వేసి ఓ ఐదు నిమిషాలు ఉడికించాలి. (కేప్సికమ్, కేబేజ్ సన్నగా తురుముకుని అవి కూడా ఉడికించవచ్చు) ముక్కలు మరీ మెత్తగా ఉడకనఖ్ఖర్లేదు. 

* తర్వాత ఓ చెంచా బటర్ లో ఈ కూరముక్కలు 2mins వేయించి పావు చెంచా మిరియాల పొడి వేసి పక్కన పెట్టాలి.

 వైట్ సాస్ తయారీ:

* రెండు చెంచాల కార్న్ ఫ్లోర్, రెండు చెంచాల బటర్ లో( సాల్టెడ్ బటర్ కాకుండా ఫ్రెష్ బటర్ నెయ్యి అమ్మే దుకాణాల్లో దొరుకుతుంది. అదైతే మంచిది. నేను ఇంట్లో చేసిన వెన్న వాడాను.) నల్లబడకుండా రెండు నిమిషాలు వేయించాలి. 

* తర్వాత ఒక కప్పుడు పాలు(150gms) అందులో పోసి ఉండలు లేకుండా కలుపుతూ సాస్ చిక్కబడనివ్వాలి. మరీ ముద్దగా ఉంటే కాసిని నీళ్లు కలుపుకోవచ్చు. స్టౌ ఆపే ముందర అర చెంచా సాల్ట్, చిటికెడు పెప్పర్ వేసి బాగా కలపాలి.

* ఈ వైట్ సాస్ మిశ్రమాన్ని చల్లారాకా ఓమాటు వడబోసుకుంటే వైట్ సాస్ క్లియర్ గా ఉంటుంది ఉండలు లేకుండా. 

(ఇలా తయారైన సాస్ ను ఫ్రిజ్ లో పెట్టుకుని ఓ వారం లోపూ మరేదైనా కూరలోకి వాడుకోవచ్చు.)

*ఇప్పుడు ఉడికించి ఉంచిన పాస్తా, ఈ వైట్ సాస్, కూరముక్కలు అన్నీ కలిపి ఫ్రైయింగ్ పేన్ లో వేసి, అరచెంచా ఆరిగానో(Oregano) వేసి, ఓ రెండుమూడు నిమిషాలు బాగా కలిపి స్టౌ ఆపేయాలి. ఉప్పు తక్కువ ఉంటే కలుపుకోవాలి.
Oregano పుదీనా జాతికి చెందిన హెర్బ్. మంచి ఫ్లేవర్ ఉంటుంది. ఇదివరకు పీజ్జా చేసేప్పుడు కొనేదాన్ని నేను. ఆరిగానో లేకపోయినా పర్వాలేదు నాలుగు కొత్తిమీరఆకులు కాస్త సన్నగా తరిగి వేసేస్తే సరిపోతుంది :)

* తయారైన పాస్తాలో ఒక అర కప్పు అముల్ క్రీమ్ కలిపి సర్వ్ చేయండి. Heaven! అంతే!

చిలకడ దుంపలో విటమిన్ సి, విటమిన్ డి, విటమిన్ బి6; ఐరన్, మెగ్నీషియం మొదలైన మినరల్స్ ఉంటాయి. మిగతా దుంప కూరల్లో కన్నా వీటిల్లో పీచుపదార్థం ఎక్కువ. బరువు పెంచదు. ఇది రక్తంలో షుగర్ లెవెల్స్ ను కూడా తగ్గిస్తుంది అని నిపుణులు చెప్తున్నారు. ఎదిగే పిల్లలకు ఎముకలు, పళ్ళు బలంగా ఉండేందుకు ఇది సహాయపడుతుందిట. అందుకని వారంలో ఒకసారైనా ఈ దుంపలను ఆహారంలో చేర్చుకోగలిగితే మంచిది. 

చిలకడ దుంపలతో కూర, పచ్చడి, పులుసు కాక స్వీట్ కూడా చేసుకోవచ్చు. మా అత్తగారు చిలకడ దుంపలను ఉడకబెట్టి పాకంలో వేసేవారు. నేను ఆ రెసిపీని కాస్త మార్చి ఇలా తయారు చేస్తూంటాను.. ఎలాగంటే:

కావాల్సినవి:
* పావుకేజీ చిలకడ దుంపలు
* 100 or 150గ్రాముల బెల్లం
(తియ్యని దుంప కాబట్టి ఎక్కువ బెల్లం అక్కర్లేదు)
* అర కప్పు పాలు
* చిటికెడు కుంకుమపువ్వు
* చిటికెడు ఉప్పు
* రెండు చెంచాల నెయ్యి

చిలకడ దుంప స్వీట్ తయారీ:

* చిలకడ దుంపలను బాగా కడిగి తొక్క తీసి, గుండ్రంగా తరిగి ఉడకబెట్టాలి. (బంగాళాదుంప లాగ ఉడకబెట్టాకా తొక్క తీసి ముక్కలు చేయచ్చు).
* అయితే కుక్కర్లో ఒక్క విజిల్ రాగానే ఆపేయాలి. మరీ పేస్ట్ అయిపోతే బావుండదు.
* అరకప్పు గోరువెచ్చని పాలల్లో కుంకుమపువ్వు వేసి ఉంచాలి.
* బెల్లం తురుముకుని, ముకుడులో కప్పుడు నీళ్లలో కరిగించి, కాస్త పాకం వచ్చేదాకా కలపాలి.
* అందులో ఉడికిన చిలకడదుంప ముక్కలు వేసి బాగా ఉడకనివ్వాలి.(పేస్ట్ అవ్వకుండా చూడాలి).
* ముక్క తీయ్యబడ్డాకా, కుంకుమపువ్వు వేసిన పాలు,నెయ్యి అందులో పోసి అడుగంటకుండా కలపాలి.

* మొత్తం బాగా దగ్గరపడ్డాకా స్టౌ ఆపేయడమే.
* ఈ స్వీట్ చల్లారాకా కన్నా వేడివేడిగా తింటేనే రుచి!

ఎప్పుడో కాని దొరకని జున్ను అంటే ఇష్టం ఉండని వారుంటారా? (సాధారణంగా ఉండరు గానీ ఉంటారు.. కొందరు తెలుసు నాకు :)) ఆవు లేదా గేదె ఈనిన తరువాత ఇచ్చే మొదటి మూడు రోజుల తాలూకూ పాలనూ జున్ను పాలు అంటారు. కేనుల్లో తెచ్చి పాలు పోసేవాళ్ళ దగ్గర అడిగితే ఆవు/గేదె ఈనినప్పుడు జున్నుపాలు తెచ్చి పెడతారు. మొదటిరోజు పాలు అయితే ఒకటికి ఒకటి చప్పున మామూలు పాలు కలిపి జున్ను వండుతారు. రెండవరోజు, మూడవ రోజు పాలు అయితే డైరెక్ట్ గా వండేస్తారు.

జున్ను పాలు 

జున్ను తయారీ ఎలాగంటే:

* జున్ను పాలు అర లీటరు ఉంటే, అవి మొదటి రోజువైతే మరో అరలీటరు మామూలు పాలు కలపాలి.

* రెండవరోజు, మూడవ రోజు పాలు అయితే అవి చాలు

* అలా కలిపిన లీటరు పాలకి మూడొందల గ్రాముల బెల్లం తరుగు వేసి, బెల్లం కరిగేదాకా బాగా కలపాలి. మీ రుచికి సరిపడా ఎక్కువ గానీ తక్కువ గానీ బెల్లం వేసుకోవచ్చు .

* బెల్లం బాగా కలిసాకా పాలు వడపొయ్యాలి. బెల్లంలో ఏదన్నా తుక్కు ఉంటే వచ్చేస్తుంది.

* అప్పుడు జున్నుపాలలో పది మిరియాలు బాగా పొడి గొట్టి కలపాలి.
* కొంతమంది ఏలకులు,మిరియాలు కలిపి పొడిచేస్తారు. నేను మిరియాలొక్కటే వేస్తాను. లేదా ఏలకులు. రెండూ కలపను.

* ఇప్పుడు ప్రెషర్ కుక్కర్లో గ్లాసుడు(300lm) నీళ్ళు పోసి, జున్నుపాలు ఉన్న గిన్నెను అందులో పెట్టాలి. కుక్కర్ కి విజిల్ పెట్టకుండా పొయ్యి సిమ్ లో ఉంచి ఒక ఇరవై నిమిషాలు తర్వాత స్టౌ కట్టెయ్యాలి.

* కుక్కర్ మూత తీసి జున్ను లో చాకు గుచ్చి చూడాలి. చాకుకి ఏమీ అంటకపోతే జున్ను తయారయిపోయినట్లే. చాకుకి ఏదన్నా పాలలా అంటితే మరో ఐదుపదినిమిషాలు పొయ్యి మీద ఉంచి ఆపేయాలి.

* తయారైన జున్నుని ఫ్రిడ్జ్ లో పెట్టుకోవచ్చు. వారం రోజుల దాకా పాడవ్వదు.

బెల్లం వేసిన జున్ను

పంచదార జున్ను

'జున్నుపాలు' లేని జున్ను: 

జున్ను పాలు లేకుండా కూడా జున్ను చేస్తారు. బజార్లో అమ్మే 'జున్ను పౌడర్' తో కాదు. కండెన్స్డ్ మిల్క్ తో. 
 ఒక కప్పు హోల్ మిల్క్, 
 అర కప్పు కండెన్స్డ్ మిల్క్, 
పంచదార లేదా బెల్లం తరుగు అరకప్పు, 
 మిరియాల పొడి లేదా ఏలకులు అరచెంచా, 
ఇవన్నీ కలిపేసి పైన చెప్పిన జున్ను లాగే కుక్కర్లో ఓ అరగంట ఉడికించాలి. 
కొందరు ఈ మిక్స్ లో ఒక egg కూడా గిలకొట్టి వేస్తారు. అసలు జున్ను రుచి దీనికి రాదు కానీ ఇది కూడా బానే ఉంటుంది.

వర్షాలు ఎక్కువైయ్యాయి కదా.. ఇక మరి వేడివేడిగా బజ్జీలూ, పకోడీలూ, జంతికలు, చెక్కలు, పుణుకులు మొదలైనవి తినాలనిపింస్తుంది అందరికీ. కానీ శెనగపిండి మంచిది కాదు వాడద్దు అని ఆరోగ్యసూత్రం! ఎందుకు అంటే అరుగుదల తక్కువ, గ్యాస్ ప్రోబ్లం ఉన్నవాళ్ళకి, డయాబెటిక్ పేషంట్స్ కీ కూడా మంచిది కాదు అంటారు. సో, శెనగపిండి వాడకుండా వర్షాకాలపు సాయంత్రాలు స్నాక్స్ కి ఏ పిండి వాడచ్చు, ఏం చేయచ్చు అని ఎక్స్పరిమెంట్లు చేస్తున్నా నేను. అందులో ఒకటి జొన్నపిండితో పకోడి.

ముందర ఉల్లిపాయ పకోడికి కావాల్సినవి చూద్దాం:
* ఒక కప్పు జొన్నపిండి
* అర కప్పు బియ్యప్పిండి
* గుప్పెడు పుట్నాలపప్పు
* ఒక ఇంచ్ అల్లం, రెండు పచ్చిమిరపకాయలు
* ఓ చెంచా వాము 
* ఓ గుప్పెడు పల్లీలు(అక్కర్లేకపోతే మానేయచ్చు కూడా)
* తగినంత ఉప్పు
* రెండు పెద్ద ఉల్లిపాయలు సన్నగా తరిగినవి
* వేయించటానికి తగినంత నూనె

తయారీ:
* పుట్నాలపప్పు, అల్లం, పచ్చి మిర్చి కలిపి గ్రైండ్ చెయ్యాలి. పొడిగానే వస్తుంది.
* అలానే పల్లీలు కూడా ఒక్కసారి (ఓ అరనిమిషం) పొడిగా మిక్సిలో తిప్పి తీసేయాలి. పలుకులుగా అన్నమాట.
* ఒక బేసెన్ లో జొన్నపిండి,బియ్యపిండి, గ్రైండ్ చేసిన పుట్నాల పిండి, వాము, పల్లూ పలుకులు, ఉల్లిపాయ ముక్కలు వేసి  ఏదన్నా స్పూన్ తో బాగా కలపాలి.

* పిండిలన్నీ బాగా కలిసాకా, అప్పుడు కాసిని నీళ్ళు చిలకరిస్తూ ముద్దగా మళ్ళీ కలపాలి.

* ఇలా కలిపిన పిండిని కాస్త కాస్తగా కాగిన నూనెలో వేయించటమే. 

జొన్నపిండితో ఉల్లి పకోడీలు రెడీ అయిపోతాయి :)

బచ్చలాకుతో పకోడి:

బచ్చలాకుతో బజ్జీ చేస్తారు కదా; తోటకూర, పుదీనా పకోడీలకి వేసినప్పుడు బచ్చలాకు పకోడి ఎందుకు చేయకూడదు అని ఐడియా వచ్చి ట్రై చేసా. బానే ఉన్నాయి తినటానికి. ఈ ఉల్లిపాయలు కలిపిన జొన్నపిండిలోనే బచ్చలాకు తరిగి వేసేసా. కాబట్టి ఇందులో ఉల్లిపాయ వేసినా బాగుంటుందన్నమాట. 

ఈ పిండితో వేసినవి నచ్చుతాయో లేదో అనుకున్నా, బాగున్నాయని ఇంట్లోవాళ్ళు కూడా తినేసారు :) తేడా తెలియకపోతే మంచిదే కదా!

డ్రై ఫ్రూట్స్ ఎక్కువ తింటే కొలెస్ట్రాల్, వెయిట్ ప్రాబ్లంస్ రీత్యా మంచిది కాదు కానీ మనకు దొరికే ఐదారు రకాల డ్రైఫ్రూట్స్(బాదం, పిస్తా, అంజీర్, జీడిపప్పు, కిస్మిస్, ఆక్రోడ్)  రోజుకి తలొకటి తింటే ఆరోగ్యానికి, ముఖ్యంగా ఎదిగే పిల్లలకీ, ప్రెగ్నెంట్ లేడీస్ కీ ఎంతో మంచిది. ఇవన్నీ డ్రై ఫ్రూట్ లడ్డులో కలుస్తాయి కాబట్టి రోజుకి ఒకటి తినచ్చు. అదీ ఖజ్జూరాలతో చేసినదయితే ఇంకా మంచిది. ఖజ్జూరాలతో అయితే పూర్తిగా నేచురల్ షుగర్స్ ఉపయోగించినట్లే.


 డ్రై ఫ్రూట్స్ తో చేసిన లడ్డూ రెండు రకాలుగా చేస్తారు.  బెల్లం పాకంతో లేదా ఖజ్జూరాలతో.  పిల్లలైనా, పెద్దలైనా రోజుకి ఒకటి తింటే మంచి పోషకాలు అందుతాయి. బలకరం. బయట కొనేకంటే ఇంట్లోనే తయారుచేస్కుంటే ఎలా ఉంటుంది? అని ఐడియా వచ్చింది మాకు. వెంఠనే ప్రయత్నాలు మొదలెట్టి ఆఖరికి సక్సెస్ఫుల్ గా పూర్తి చేసాను. తయారీకి ఓ అరగంట సమయం పడుతుంది. 


కావాల్సినవి:

1) 1/2 kg ఖజ్జూరాలు( lion dates అయితే బెటర్) 
(తీపి తక్కువ ఉండాలి అంటే 300,350gms వాడినా చాలు.నేను తక్కువే వాడాను)
2) 100 gm పిస్తా
3) 100 gm జీడిపప్పు
4) 100 gm అంజీర్
5) 100 gm బాదాం
6) 50 gm కిస్మిస్
7) 50 gm ఆక్రోడ్
8)1 చెంచా ఏలకుల పౌడర్
 9)1 చెంచా గసగసాలు
10) edible gum(నార్త్ ఇండియన్స్ gaund అంటారు) ఒక చెంచాడు.
11)రెండు చెంచాల నెయ్యి
12) 1/2 చెంచా జాజికాయ (nutmeg) పౌడర్ - optional
      (జాజికాయ ఇంట్లో ఉంటే ఓ అరచెంచా పౌడర్ కొట్టుకోవడమే)
13) 100 gm ఎండు కొబ్బరి పొడి - optional

edible gum(gaund) ఇలా ఉంటుంది. సూపర్ మార్కెట్లలో, కిరాణా షాప్స్ లో దొరుకుతుంది. 

దీనిని కొంచెం నెయ్యిలో(పావు చెంచా) వేయిస్తే పాప్కార్న్ లాగ పెద్దవవుతాయి. మాడకుండా కలుపుతూ వేగగానే స్టౌ ఆపేసి, చల్లారాకా పొడి చేసి ఉంచాలి దీనిని. లడ్డూలు చుట్టడానికి ఇది బైండింగ్ ఏజెంట్ అన్నమాట.

ముందస్తు తయారీ:

1) ముందు డ్రై ఫ్రూట్స్ అన్నీ విడి విడిగా ఒక్కసారి గ్రైండ్ చేసుకోవాలి. పొడి అవ్వకుండా, పలుకులు కనబడేలా ఒకటి రెండు సార్లు తిప్పితే చాలు. అంజీర్ చిన్న చిన్న ముక్కలు కట్ చేసి తిప్పాలి. అంజీర్ తో పాటే కిస్మిస్ వేసేయచ్చు.
2) జాజికాయ, ఏలకులు విడివిడిగా పౌడర్ కొట్టి ఉంచుకోవాలి.
3) గసగసాలు కావాలంటే పొడి చేసుకోవచ్చు లేదా డైరెక్ట్ గా వాడుకోవచ్చు.
4) edible gum పైన చెప్పినట్లు వేయించి, పొడి చేసుకోవాలి.
5) ఖజ్జూరాలు గింజ తీసేసి కాస్త గోరువెచ్చని నీటిలో కడిగేసి గ్రైండ్ చేసి ఉంచాలి. ఇది కూడా ఓమాటు తిప్పితే సరిపోతుంది. మరీ ముద్దగా అక్కర్లేదు.

తయారీ:

1) కాస్త పెద్ద మూకుడులో రెండు చెంచాల నెయ్యి వేసి డ్రై ఫ్రూట్స్ ముక్కలన్నీ మూడు నాలుగు నిమిషాలు కలుపుతూ వేయించాలి.
2) అప్పుడు జాజికాయ పొడి, ఏలకుపొడి, గసగసాల పొడి, ఎండు కొబ్బరి పొడి వేసి బాగా కలుపుతూ వేయించాలి.
3) తర్వాత ఖజ్జూరాల ముద్ద వేసి అడుగంటకుండా మరో మూడు నిమిషాలు కలపాలి.
4) స్టౌ ఆపేసిన వెంఠనే edible gum పొడి వేసి మరోసారి అంతా మిక్స్ చెయ్యాలి.
5) మొత్తం మిశ్రమం కాస్త చల్లరాకా చేత్తో ఉండలు చుట్టుకోవటమే. మధ్యలో వేడి తగ్గి ఉండ రావట్లేదనిపిస్తే ఓసారి పొయ్యి మీద డ్రై ఫ్రూట్ మిశ్రమాన్ని వేడి చేసుకుంటే ఉండ అవుతుంది. ఆరాకా లడ్డూలు గట్టిపడిపోతాయి.
6) రుచికరమైన డ్రైఫ్రూట్స్ లడ్డూలు తినటానికి రెడీ!

ఈ బ్లాగ్ లో పెట్టే ఏ రెసిపి అయినా, ప్రయోగం అయినా నేను వండి రుచి చూసిన తర్వాతే టపాలో రాస్తూంటాను. ఇవాళ బ్లాగ్మిత్రులు జయ గారి కోసం "Pan Cake" రెసిపీ వెతికి నేను మొదటిసారి ప్రయోగం చేసాను. మా పాపకూ నచ్చింది. 

కావాల్సిన పదార్థాలు:

* ఒక కప్పు మైదా
* ఒక egg
* చిటికెడు ఉప్పు
* అర స్పూన్ బేకింగ్ పౌడర్
* చిటికెడు వంట సోడా
* రెండు చెంచాల పంచదార
* అర కప్పు పాలు
* ఒక చెంచా వెన్న 
*కాస్తంత తేనె

తయారీ:

* పొడులన్ని కలిపి ఈ గిన్నెలోకి జల్లించాలి. అప్పుడు అన్నీ బాగా కలుస్తాయన్నమాట.

* అందులో ఒక egg, అరకప్పు పాలు వేసి అన్నీ కలిపి బాగా గిలకొట్టాలి. ఇలా:

* పెనం వేడెక్కాకా వెన్న(బటర్) రాసి అందిపై గరిటెతో పిండి వెయ్యాలి. పెనంపై వేసాకా ఇక పిండి కదపకూడదు.

* వేగాకా రెండో వైపుకి తిప్పాలి.

* కప్పుడు పిండికి మూడు నాలుగు పేన్ కేక్స్ అవుతాయి.

* అవన్నీ తేనె రాసుకుని విడివిడిగా తినచ్చు లేదా ఒకో ఫేన్ కేక్ కీ తేనె రాసుకుంటూ ఒకదానిపై ఒకటి పెట్టి అన్నీ కలిపి కట్ చేసుకుని తినచ్చు. ఇలా..

తయారు చేసే విధానం ఇక్కడ చదవవచ్చు..
http://trishnaventa.blogspot.in/2009/11/blog-post.html




సర్వ్ చేసేప్పుడు అలంకరించటానికి కేరెట్, ఉల్లిపాయ,కొత్తిమీర ఇలా తురుముకుంటే బావుంటుంది. ఫోటోలో కర్రిలో బఠాణీ బదులు స్వీట్ కార్న్ గింజలు వేసాను..

కావాల్సినవి:

* మామూలు మొక్కజొన్నలు గింజలు వలిచినవి  రెండు కప్పులు 
* స్వీట్ కార్న్ గింజలు అరకప్పు (ఇవి ఎక్కువ వేస్తే మరీ తియ్యగా అయిపోతాయి వడలు)
* మూడు పచ్చిమిరపకాయలు
* అంగుళం అల్లం ముక్క
* కడిగిన పుదీనా ఆకులు ఒక కప్పుడు(ఒక చిన్న కట్ట అనుకోవచ్చు)
* తగినంత ఉప్పు

తయారీ:

* పైన చెప్పిన మొక్కజొన్న గింజలు, స్వీట్ కార్న్ గింజలు, మిర్చి, అల్లం, పుదీనా ఆకులు, ఉప్పు అన్ని కలిపి మెత్తగా గ్రైండ్ చెసుకోవాలి. మెత్తగా అవటానికి కాసిని నీళ్ళు పోయచ్చు. ( నీళ్ళు ఎక్కువయితే వడలు రావు, నూనె కూడా పీల్చేస్తాయి.)

*పుదీనా ఇష్టం లేకపోతే కొత్తిమీర కలిపి గ్రైండ్ చేసుకోవచ్చు.

* గ్రైండ్ చేసిన పిండి మరి జారుగా అయిపోతే కాస్త కార్న్ ఫ్లోర్(మొక్కజొన్న పిండి) కలపితే పిండి గట్టిగా అవుతుంది.

* మూకుడులో నూనె కాగాకా వడల్లా చేత్తో వత్తుతూ వడలు వేయించటమే. 

* వేయించాకా టిష్యూ పేపర్ మీద వేస్తే మంచిది. 

* బయటనుండి వచ్చేవాళ్ళ కోసమైతే పిండి గ్రైండ్ చేసుకుని ఉంచి, అప్పటికప్పుడే వేసి పెట్టండి. ముందరే వడలు తయారయిపోతే మాత్రం ఎవరైనా వచ్చేలోపే చేసినవి ఖాళీ అయిపోతాయి.. too tempting మరి :-)

చక్కగా బయట వాన పడుతోంది కదా.. మరి రకరకాల బజ్జీలు వేసేసుకుందామా...


వాము ఆకుల బజ్జీలు

మిర్చి బజ్జీలు

తమలపాకు, బచ్చలాకు బజ్జీలు (బచ్చలిఆకుని మడిచినందువల్ల అలా ఉన్నాయి బజ్జీలు)

ఇదివరకూ రాసినవి కొన్ని పోస్ట్ లింక్స్:
సొయా వడలు మొక్కజొన్న వడలు:
అరటిపువ్వు వడలు:
కేబేజి పకోడి :

నిన్ననే మొదటిసారి చేసిన ఈ రెండు ఎక్స్పరిమెంట్లు బాగా వచ్చాయి.

చక్కిలాలు:
బియ్యం నానపెట్టి గ్రైండ్ చేసి జల్లించి, అందులో మినప్పిండి కలిపి చేసేవి ఒకరకమైన చక్కిలాలు. అలా కాకుండా మైదా పిండి, పెసరపప్పులతో చేసే మరో రకం ఉందిట. చాలా మందికి తెలిసే ఉండచ్చు, నాకు ఈమధ్యనే కొత్తగా తెలిసింది.

కావాల్సినవి:
1/4kg మైదా
100 gms పెసరపప్పు
రెండు చెంచాలు నువ్వులు
రెండు చెంచాలు వాము
తగినంత ఉప్పు
వేయించటానికి సరిపడా నూనె

విధానం:

* ముందర 100 gms పెసరపప్పు ఒక గ్లాసుడు నీళ్ళలోకుక్కర్లో ఉడకపెట్టేసి, జారుగా ఉండేలా మేష్ చేసి ఉంచికోవాలి.

* తర్వాత మైదా పిండిని కూడా ఓ గిన్నెలో వేసి, కుక్కర్ అడుగున నీళ్ళు పోసి, మామూలుగా కుక్కర్ అడుగున పెట్టే చిల్లుల ప్లేట్ పెట్టి, అందిమీద ఈ మైదాపిండి ఉన్న గిన్నె పెట్టాలి. నీళ్లు పొయ్యకుండా. మూత అక్కర్లేదు. విజిల్ పెట్టకుండా ఓ పావుగంట అలా ఉంచాలి పొయ్యి మీద. తర్వాత స్టౌ ఆపేసి, చల్లారాకా పిండిని ఏదన్నా గరిటతో పిండి పొడిపొడిగా ఉండేలా కదపాలి. ఇలా పిండి కుక్కర్లో పెట్టడం వల్ల జంతికలు క్రిస్పీగా వస్తాయిట.

* తర్వాత జారుగా మేష్ చేసిపెట్టుకున్న పెసరపప్పుని ఈ మైదా పిండిలో పోస్తూ జంతికల పిండిలా ముద్ద కలుపుకోవాలి. అది మరీ ముద్దగా ఉండకూడదు. గట్టిగాను ఉండకూడదు. పిండి కలిపేప్పుడే ఉప్పు,కారం,వాము,నువ్వులు వేసి ముద్ద కలపాలి. జారుగా ఉన్న పెసరపప్పు తప్ప ఇక నీళ్ళు కలపకూడదు పిండికి.

* అప్పుడు జంతికల గొట్టంలో ఈ పిండి వేసి ఏదైనా ప్లాస్టిక్ కవర్ మీద చక్కిలాలు చుట్టుకోవాలి. క్రింద ఫోటోలోలాగ.

* ఐదారు చుట్టుకుని, కాగిన నూనెలో వేయించుకోవాలి. అవి అయ్యాకా మళ్ళీ ఐదారు చుట్టుకోవాలి. అన్నీ ఒకేసారి చుట్టేస్తే ఎండిపోతాయి.

* అంతే. చక్కని రుచికరమైన చక్కిలాలు రెడీ !

===========================================

చెక్కలు:

బియ్యప్పిండిలో వేడినీళ్ళూ కలిపి చెక్కలు చెయ్యాలని ప్రయత్నిస్తే రెండుమూడు సార్లు ఫ్లాప్ అయ్యింది. మర్నాటికి మెత్తబడిపోయేవి. ఈసారి చన్నీళ్ళు కలిపి చేసాను. బాగా వచ్చాయి.

చేయటానికి కావాల్సినవి:

* ఒక గ్లాసు బియ్యప్పిండి
* రెండు పచ్చిమిర్చి, చిన్న అల్లం ముక్క, కర్వేపాకు మెత్తగా తొక్కేసుకోవాలి లేదా గ్రైండ్ చేసుకోవాలి.
* రెండు చెంచాల వెన్న
* వేయించటానికి తగినంత నూనె.
* ఉప్పు తగినంత.

తయారీ:

* గ్లాసు బియ్యప్పిండి, తగినంత ఉప్పు, వెన్న, తొక్కుకున్న ముద్ద కలిపి నీళ్ళతో కట్టిగా ముద్ద కలుపుకోవాలి. చపాతీ ముద్దలాగ ఉండాలి.

* కలిపిన పిండి లోంచి చిన్న ఉండ చేసుకుని, ప్లాస్టిక్ కవర్ మీద చేత్తో స్ప్రెడ్ చేస్కోవాలి.

* వాటిని కాగిన నూనెలో వేసి వేయించుకోవటమే. చక్కని చెక్కలు తయారయిపోతాయి.