చాలా కాలం నాకు జీరా రైస్ పెద్దగా నచ్చేది కాదు. ఒట్టి అన్నంలో జీలకర్ర వేసుకుని ఏం తింటాం? అదేమన్నా బిరియానీనా? అని తేలిగ్గా తీసిపారేసేదాన్ని. కానీ జీలకర్ర ఆరోగ్యానికి ఎంత మంచిదో తెలుసుకున్నాకా ఈ మధ్యన ఎక్కువగా వండుతున్నా. 

జీలకర్రలో కొన్ని ముఖ్య గుణాలు: అరుగుదలకి మంచిది, అజీర్ణాన్ని తగ్గిస్తుంది, ఆకలిని పెంచుతుంది, రక్తాన్ని శుధ్ధి చెయ్యగలదు, పాలిచ్చే తల్లులకి మంచిది. ఇవన్నీ తెలిసాకా రోజూ వండే కూరల్లో కూడా ఓ అరచెంచా జీలకర్ర పొడి వెయ్యడం మొదలెట్టా. పోపు కూరల్లో ఎలానూ జీలకర్ర వేస్తాం కదా, అదేమో క్వాంటిటీ కాస్త ఎక్కువ చేసా :-)

నేను చేసే జీరా రైస్ విధానం:
* పావుకేజీ బాస్మతీ రైస్(మామూలు అన్నంతో కూడా వండుకోవచ్చు) కుక్కర్లో ఉడికించాలి. ఒక గ్లాసు బాస్మతీ బియ్యం అయితే గ్లాసున్నర నీళ్ళు పోసి కుక్కర్లో పెట్టచ్చు. బియ్యం ఎలక్ట్రిక్ రైస్ కుక్కర్లో వండేట్లయితే సమానం లేదా గ్లాసుంపావు నీళ్ళు సరిపోతాయి.

* అన్నం అయ్యాకా మూత తీసి కాసేపు బయట పెడితే చల్లరి పొడిగా అవుతుంది.

* మూకుడులో రెండు చెంచాల నెయ్యి వేసి రెండుచెంచాల జీలకర్ర, సన్నగా తరిగిన ఉల్లిపాయ ముక్కలు, రెండు చితక్కొట్టిన వెల్లుల్లి, ఐదారు బరగ్గా పొడికొట్టిన మిరియాలు, ఐదారు జీడిపప్పు పలుకులు, కావాలంటే రెండు పచ్చిమిరపకాయలు వేసి పోపు వేయించాలి.
 

* ఉల్లిపాయలు కాస్త వేగాకా ఉడికిన బాస్మతీ రైస్ తెచ్చి వేగిన జీలకర్ర మిశ్రమంలో వేసి, బాగా కలపాలి.
 

* చెంచాన్నర లేదా తగినంత ఉప్పు వేసి మరో రెండు నిమిషాలు ఉంచి స్టౌ ఆపేయాలి.
 

* ఇందులోకి సైడ్ డిష్ క్రింద కూరలు చెసేకన్నా టమాటా పప్పు లేదా ఏదైనా వేరే ఏదైనా పప్పు కాస్ట స్పైసీగా చేసి జీరా రైస్ తో పాటూ సర్వ్ చేస్తే బావుంటుంది. క్రింద ఫోటో లోది టమాటా పప్పు.

Tips:

* కొందరు జీలకర్ర బదులు 'షాజీరా' వాడతారు. షాజీరా కి సువాసన ఎక్కువగా ఉంటుంది కానీ మామూలు జీలకర్రతో చేస్తేనే రుచి బావుంటుంది అనిపిస్తుంది నాకు.
* కొంతమంది ఉల్లిపాయ,వెల్లుల్లి వెయ్యరు. జీలకర్ర తో పాటూ బిరియాని ఆకు లేదా దాల్చిన చెక్క కలిపి వేయిస్తారు. మసాలా ఐటెంస్ ఆప్షనల్ కానీ జీరా రైస్ ఎంత ప్లైన్ గా ఉంటే అంత రుచిగా ఉంటుంది.

* నెయ్య  వద్దనుకుంటే 1 sp.నూనె కూడా వేయచ్చు. అప్పుడు సర్వ్ చేసే ముందు రైస్ ప్లేట్ లో అరచెంచా నెయ్యి కలిపి ఇస్తే బావుంటుంది.

వాడుకలో మనం 'దద్దోజనం' అనే పెరుగన్నం అసలు పేరు 'దధ్యోజనం'. బయట 'curd rice' అని హోటల్స్ లో పెట్టేది చల్ల అన్నంతో, మిగిలిపోయిన అన్నంతో చేసేయచ్చు. కానీ మనకి గుడులలో పెడ్తారు కదా ప్రసాదంగా ఆ దద్దోజనం అంటే వేడి వేడి అన్నం అప్పటికప్పుడు వండి చేసేదే. ఎప్పుడైనా బిర్యాని, ఫ్రైడ్ రైస్ మొదలైన రైస్ ఐటెమ్స్ చేసినప్పుడు నేనీ దద్దోజనం చేస్తుంటాను. రెండూ కాస్త కాస్త తినేసి వంటిల్లు క్లోజ్ చేసేయచ్చని :)

కమ్మటి దద్దోజనం చేసుకోవాలంటే..
కావాల్సినవి:

* ఒక గ్లాస్ బియ్యం (nearly 150gms)
* రెండు గ్లాసుల కమ్మటి పెరుగు
(పెరుగు విజయా డైట్ మిల్క్ కాచి తోడుపెట్టినదైనా నీళ్ళు కలపకుడ్మా ఉంటే బాగుంటుంది. నే చేసినది డైట్ మిల్క్ పెరుగుతోనే))
* ఒక చెంచా నెయ్యి లేదా నూనె
* తురిమిన లేదా చిన్న చిన్న ముక్కలుగా చేసుకున్న అంగుళం అల్లం 
* తగినంత ఉప్పు 
* గుప్పెడు దానిమ్మ గింజలు
* పోపుకి: ఆవాలు,జీలకర్ర, మినపప్పు, ఇంగువ, కర్వేపాకు, చిటికెడు పసుపు, రెండు పచ్చి మిరపకాయలు, ఒక ఎండు మిర్చి, 


చేసే విధానం:
* గ్లాసు బియ్యానికి రెండున్నర లేదా మూడు గ్లాసుల నీళ్ళు పోసి కాస్త మెత్తని అన్నం వండాలి.పెరుగన్నం కదా అన్నం గట్టిగా ఉంటే బావుండదు.

*  చెంచా నెయ్యి/నూనెలో పైన చెప్పిన పోపు పదార్ధాలతో పోపు వేయించాలి. చివరన అల్లం ముక్కలు వేసి స్టౌ ఆపేయాలి. అల్లం ముక్కలకి ఆ వేడి చాలు. 

* పెరుగు నీళ్లు పొయ్యకుండా చిలికి తగినంత ఉప్పు కలపాలి. అన్నం చలారాకా అందులో  వేయించిన పోపు కలపాలి. తరువాత చిలికిన పెరుగు కలపాలి. 

* కొత్తిమీర ఇష్టం ఉంటే సర్వ్ చేసే ముందర కాసిని ఆకులు దధ్యోజనం పైన  చల్లచ్చు. 

* అన్నం,పెరుగు,ఉప్పు బాగా కలిసాకా సర్వ్ చేసే ముందు గుప్పెడు దానిమ్మకాయ గింజలు పైన చల్లితే రుచి బాగుంటుంది + దానిమ్మకాయ అరుగుదలకి చాలా మంచిది.

Tips:
* అన్నం వేడిగా ఉన్నప్పుడు పెరుగు కలిపితే పెరుగు విరిగినట్లు అయిపోయి రుచిలో తేడా వచ్చేస్తుంది.

* ఏదన్నా డిష్ మీద కొత్తిమీర అలంకరించేప్పుడు కొత్తిమీరఆకులు కట్ట పడంగా కట్ చేసేస్తే అందమైన లుక్ పోతుంది. అందుకని కొత్తిమీర ఆకులపడంగా తుంపి వెయ్యాలి.

కావాల్సిన పదార్ధాలు:

బియ్యం: 300gms
వంకాయలు: 250gms
ధనియాలు : రెండు చెంచాలు
కొబ్బరి : పావుకప్పు (తురిమినది)
మినపప్పు: రెండు చెంచలు
శనగపప్పు: రెండు చెంచాలు
ఇంగువ : చిటికెడూ
దాల్చిన చెక్క: చిన్న ముక్క
లవంగాలు: మూడు
పసుపు : పావు చెంచా
ఉప్పు: తగినంత
జీడిపప్పు: 10
నూనె: మూడు చెంచాలు
నెయ్యి: రెండు చెంచాలు

క్రింద చెప్పిన పదార్ధాలన్నీ కలిపి మెత్తగా గ్రైండ్ చేసుకోవాలి:

* ధనియాలు, మినపప్పు, శనగపప్పు, దాల్చిన చెక్క, లవంగాలు, కొబ్బరి,7 లేక 8 ఎండు మిరపకాయలు, ఇంగువ కాస్తంత నూనెలో వేయించి మెత్తగా పొడికొట్టుకోవాలి లేదా గ్రైండ్ చేసుకోవాలి.

తయారీ:


* ముందుగా బియ్యాన్ని కడిగి, పులిహోరకు వండినట్లు కాస్త బిరుసుగా వండి చల్లారబెట్టి ఉంచాలి.

* వంకాయలు చిన్నగా తరిగి రెండు మూడు చెంచాల నూనెలో నూనెలో వేసి, ఉప్పు వేసి మూత పెడితే ముక్కలు త్వరగా మగ్గుతాయి.

* వేగిన కూరలో గ్రైండ్ చేసుకున్న మసాలపొడి వేసి,పసుపు వేసి బాగా బాగా కలపాలి.

* తర్వాత చల్లారిన అన్నం కూరలో వేసి బాగా కలుపుకోవాలి. అన్నం పొడిగా ఉంటే వాంగీబాత్ ముద్దవ్వకుండా ఉంటుంది.

* అన్నం, కూర బాగా కలిసాకా స్టౌ ఆపేయాలి.

* చివరగా నెయ్యిలో జీడిపప్పు వేయించాలి.

* జీడిపప్పు వేయించిన నెయ్యి వాంగీబాత్ లో కలిపేసి, పైన జీడిపప్పు + కొత్తిమీర కలిపి అలంకరించాలి.

మసాలా లేకుండా:

* ముందుగా ఒక గ్లాస్(nearly 150gms rice) అన్నం వండేసుకోవాలి.

* మూడు చెంచాల నూనె/నెయ్యిలో క్రింద ఐటెమ్స్ తో పోపు పెట్టుకోవాలి:
శనగపప్పు రెండు చెంచాలు,
మినపప్పు రెండు చెంచాలు,
ఆవాలు ఒక చెంచా,
జీలకర్ర ఒక చెంచా,
ఇంగువ పావు చెంచా,
కర్వేపాకు రెండు రొబ్బలు,
మూడు ఎండు మిరపకాయలు,రెండు పచ్చిమిరపకాయలు.

* బఠాణీ ఇష్టమైతే గుప్పెడు నానబెట్టుకుని ఉడికించుకోవాలి విడిగా

* చివరిగా ఒక చిప్ప తురిమిన కొబ్బరికోరు వేసి స్టౌ ఆపేయాలి.

* విడిగా పెట్టుకున్న అన్నంలో పైన వేయించిన పోపు వేసేసుకుని, బఠాణీ , తగినంత ఉప్పువేసి బాగా కలిపేసి దింపేసుకోవాలి.

* పది జీడిపప్పు పలుకులు విడిగా వేయించుకుని రైస్ పైన అలంకరించచ్చు.

* ఇది సింపుల్గా అయిపోయేది. బజార్లో ఈ మధ్యన కొబ్బరిపాలు అమ్ముతున్నారు. రుచి కావాలనుకునేవారు బియ్యం ఉడికేప్పుడు కాస్త నీరు తగ్గించుకుని ఆ కొబ్బరిపాలు కలిపి కుక్కర్లో పెట్టుకుంటే బాగుంటుంది.

***********************************

మసాలాతో కొబ్బరన్నం:

మసాలా దినుసులు:
1 అంగుళం దాల్చిన చెక్క,
2,3 ఏలకులు,
2,3 లవంగాలు,
ఒక పెద్ద ఉల్లిపాయ తరిగినది,
అల్లం వెల్లుల్లి పేస్ట్ ఒక చెంచా
బఠాణీ ఇష్టమైతే గుప్పెడు నానబెట్టుకుని ఉడికించుకోవాలి విడిగా,
ఒక చెక్క కొబ్బరి కోరు,


విధానం:
* దాల్చిన చెక్క,ఏలకులు,లవంగాలు వేయించి గ్రైండ్ చేసుకోవాలి.
తర్వాత కాస్త నూనెలో ఉల్లిపాయ ముక్కలు కూడా వేయించుకుని, రెండూ కలిపి ఒక గ్లాసు(nearly 150gms rice) బియ్యం + కొబ్బరికోరు కూడా వేసేసి కుక్కర్లో ఉడికించాలి. మాములుగా రైస్ ఉడికేంత టైం చాలు.

* పది జీడిపప్పు పలుకులు విడిగా వేయించుకుని రైస్ పైన అలంకరించచ్చు.

*బజార్లో ఈ మధ్యన కొబ్బరిపాలు అమ్ముతున్నారు. రుచి కావాలనుకునేవారు బియ్యం ఉడికేప్పుడు కాస్త నీరు తగ్గించుకుని ఆ కొబ్బరిపాలు కలిపి కుక్కర్లో పెట్టుకుంటే బాగుంటుంది.



* ఉల్లిపాయ,టమాటో ముక్కలతో చేసిన రైతా ఇందులోకి బావుంటుంది.

మొన్నొకరోజు మా కజిన్ ఫోన్ చేసి "రుచి.. లో రైస్ ఐటెమ్స్ రాయట్లేదేం? నీ బ్లాగ్ లో పెట్టిన ఒకే ఒక రైస్ రెసిపి(మెంతికూర రైస్) ప్రయోగం చేసాను. చాలా బాగా వచ్చిందని" చెప్పింది. విని నేనూ చాలా సంతోషించాను. నేను అదివరకూ " రైస్ వెరైటీస్" బాగా చేసేదాన్ని. ఎక్కడెక్కడో రాసుకుని వచ్చి రోజుకో రకం రైస్ వెరైటీ ప్రయోగం చేసి ఇంట్లోవాళ్ళతో తినిపించిన రోజులు ఉన్నాయి..:) ఇప్పుడు దంపుడుబియ్యం మొదలెట్టాకా వైట్ రైస్ తినటం, ప్రయోగాలు చేయటం చాలా తగ్గిపోయింది. సరే నేను ఎక్కువ తినకపోతేనేం అప్పుడప్పుడు వచ్చినవి రాస్తే చదివేవారు చేసుకుని తింటారు కదా అని అప్పుడప్పుడు రైస్ వెరైటీలు రాయాలని నిర్ణయించుకున్నానన్నమాట !

ఇవాళ "పుదీనా రైస్" గురించి రాస్తాను.


కావల్సినవి:


* బాస్మతిబియ్యం గాని/ మామూలు బియ్యం గానీ రెండు కప్పులు(ఎలక్టిక్ రైస్ కుక్కర్ కు ఇచ్చే ప్లాస్టిక్ కప్పు కొలత)

* ఒక పెద్ద కట్ట కానీ రెండు మీడియం సైజు కట్టలు వలిచిన పుదీనా ఆకు(పైన
ఉదాహరణకి ఇచ్చిన కప్పైతే ముప్పావు కప్పు రుబ్బిన ముద్ద అవ్వాలి)

* మూడు మిర్చి సన్నగా పొడుగ్గా కట్ చేసుకోవాలి.(ఎక్కువకారం కావాలంటే ఇంకొన్ని ఎక్కువ మిరపకాయలు వేస్కోవాలి)

* రెండు లవంగాలు, ఒక ఇంచ్ దాల్చిన చెక్క

* ఒక పెద్ద చెంచా అల్లం,వెల్లుల్లి పేస్ట్(నచ్చకపోతే మానేయచ్చు)

*రెండు మూడు చెంచాల నూనె

* కావాలంటే అరచెక్క నిమ్మరసం



తయారీ:

* ముందు బియ్యం వండేసుకుని ముద్దల్లేకుండా పొడిగా విడదీసుకుని ఉంచాలి. (కావాలంటే ఒక చెంచా నెయ్యి వేసుకోవచ్చు.)

*వలిచిన పుదీనా ఆకు (పచ్చిదే) కాస్త నీళ్ళు పోసుకుని గ్రైండ్ చెసుకోవాలి. ముద్ద గట్టిగా కాకుండా జారుగా ఉండాలి. క్రింద ఫోటోలోలాగ. 
 

* మూకుడులో నూనె వేసి అందులో దాల్చిన చెక్క, లవంగాలు వేసి కాస్త వేగాకా అల్లం వెల్లుల్లి పేస్ట్, తరిగిన పచ్చిమిర్చి ముక్కలు వేసుకోవాలి.


* అది వేగాకా రుబ్బిన పుదీనా ఆకు ముద్ద కలిపి అందులో ఉన్న నీరంతా బాగా ఇగర నివ్వాలి. క్రింద ఫోటోలోలాగన్నమాట.

* తరువాత వండి ఆరబెట్టిన అన్నం కొంచెం కొంచెం వేస్తూ, మొత్తం కలిసేలాగ బాగా కలపాలి. క్రింద ఫోటోలోలాగ. పుదీనారైస్ రెడీ !!


 

* ఇందులో కావాలంటే స్టౌ పైనుండి దింపిన తరువాత నిమ్మరసం కలుపుకోవచ్చు. లేకపోయినా తినేయచ్చు.

                                                       మామూలు బియ్యంతో చేసినది





వంటింట్లో ప్రయోగాలు చేసి చాలా కాలమైంది. ఏదన్నా చేద్దామని బుధ్ధి పుట్టింది. నాకు రకరకాల రైస్ వెరైటీస్, బిర్యానీలూ చేయటం, తినటం కూడా ఇష్టం. దంపుడు బియ్యం తినటం మొదలెట్టాకా రైస్ వెరైటీస్ చెయ్యటమే తగ్గింది. సరే ఓ రోజుకి ఎక్సెప్షన్ అనేసుకుని అప్పుడప్పుడూ ప్రయోగాలు చేస్తూంటాను. ఆ క్రమంలో మొన్నొక రోజున చేసినదే "మెంతికూర, పనీర్ రైస్". ఇది నాకు ఒక ఫ్రెండ్ చెప్పింది. నేనూ ఇదే మొదటిసారి వండటం. నాకయితే బానే వచ్చింది.

కావాల్సిన పదార్ధాలు:

బియ్యం ఒక గ్లాస్
మెంతికూర రెండు కట్టలు(మీడియం సైజ్)
పనీర్ వంద గ్రాములు(ఇష్టముంటే 150gms కూడా వాడుకోవచ్చు.)
పచ్చిమిర్చి రెండు
అల్లం రెడంగుళాలు ముక్క
కొత్తిమీర ఒక చిన్న కట్ట
పుదీనా ఒక చిన్న కట్ట
పుల్లపెరుగు రెండు కప్పులు
అల్లం,వెల్లుల్లిపేస్ట్ రెండు స్పూన్లు
బిరియానీ మసాలా పౌడర్ ఒక స్పూన్ ( బిరియానీ పౌడర్ బదులు నేను "ప్రియబిరియానీ పేస్ట్" వాడుతూ ఉంటాను. ఆ టేస్ట్ బాగుంటుంది. ఇందులో ప్రయత్నించవచ్చు.)
నెయ్యి మూడు పెద్ద చెంచాలు
ఉల్లిపాయ ఒకటి(పెద్దది)
టమాటా ఒకటి(పెద్దది)
కొద్దిగా నూనె
ఉప్పు తగినంత

తయారీ:  


* మెంతి, కొత్తిమీర, పుదీనా ఆకులు కాడలు లేకుండా తీసేసి కడిగి పెట్టుకోవాలి. కొత్తిమీర, పుదీనా ఆకులు గ్రైండ్ చేసుకుని ఉంచుకోవాలి.
 
* అల్లం,పచ్చిమిర్చి చీలికల్లాగ తరిగి ఉంచుకోవాలి. ఉల్లిపాయ.టమాటా కూడా తరిగి ఉంచుకోవాలి.
 
* చిలికిన పెరుగులో ఉప్పు, పసుపు, ఒక చెంచా అల్లంవెల్లుల్లి పేస్ట్ వేసి చిన్నగా తరుక్కున్న పనీర్ ముక్కలు అందులో వేయాలి. ఆ ముక్కలను అలా ఓ అరగంట పాటు నానబెట్టాలి.
 
* బిరియానీ రైస్ కాస్త నెయ్యి వేసి వండేసి, ఉప్పు కలిపేసి పొడిగా ఆరబెట్టుకోవాలి.
 
* ఒక పేన్ లో కానీ పెద్ద మూకుడులో కానీ నెయ్యి లేక నూనె వేసి మిర్చి, తరిగిన ఉల్లిపాయ ముక్కలు వేసి వేగనివ్వలి. తరువాత ఒక చెంచా అల్లం వెల్లుల్లి పేస్ట్ దాంట్లో వేయాలి. తరువాత కడిగి ఉంచుకున్న మెంతిఆకు అందులో వేయాలి. మాడకుండా కలుపుతూ ఉండాలి. మెంతిఆకు వేగాకా అందులో నానబెట్టిన పనీర్ ముక్కలు, బిరియానీ మసాల పౌడర్, గ్రైండ్ చేసుకుని ఉంచిన కొత్తిమీర-పుదీనా పేస్ట్, కావాలంటే ఒక చెంచా కారం వేసి అందులో ఒక గ్లాస్ నీళ్ళు పోసి బాగా మగ్గనివ్వాలి.
 
* పైన మిశ్రమం దగ్గర పడినట్లుగా అనిపించాకా ఇందాకా పొడిపొడిగా పెట్టుకున్న రైస్ అందులో కలపాలి. టేస్ట్ చూసి కావాలంటే, ఉప్పు కారాలు కలుపుకోవచ్చు. మిగిలిన నెయ్యి కూడా అందులో కలిపేయాలి.
 
* ఒక ఐదు పది నిమిషాలు మొత్తం రైస్ ను పొయ్యి మీడ లో ప్లేమ్ లో ఉంచి ఆ తరువాత దింపుకోవాలి. కొత్తిమీర, కాస్త గ్రేట్ చేసిన పనీర్ తో డేకరేట్ చేసి సర్వ్ చెయ్యాలి.
 
* ఇందులోకి మామూలుగా బిరియాలీల్లోకి చేసుకునే ఉల్లిపాయ,పెరుగు రైతా బాగుంటుంది. అందులో ఒక కేరెట్ కూడా గ్రేట్ చేసుకుని కలిపితే బాగుంటుంది.
 
* ఇది రెగులర్ బిరియానీ టైప్ కాదు కాబట్టి వెరైటీగా ఉంటుంది. పైన ఫోటోలో నేను చేసినది మామూలు బియ్యంతోనే. బాస్మతీ రైస్ తో అయితే టేస్ట్ ఇంకా బాగుంటుంది.