వంటింట్లో కందిపప్పు వేయిస్తూంటేనే ఆ వాసనకి మా మావగారు వంటింట్లోకి వచ్చేసేవారు కండిపచ్చడి చేస్తున్నావా? అని. ఆయనకు ఎంతో ఇష్టం కందిపచ్చడి. ఆయన సూపర్ వంటల స్పెషలిస్ట్ కూడా. చిన్నతనంలో వాళ్ళ చెల్లెళ్లకూ, తమ్ముళ్ళకూ ఆయనే వండి పెట్టేవారుట. కందిపచ్చడి, టమాటో పచ్చడి ఆయన రోట్లో రుబ్బుతూంటే సగం రోట్లోనే ఖాళీ అయిపోయేవట. పైగా వాళ్లవన్నీ గుంటూరు కారాలు. మా పెళ్ళైన మొదట్లో పాపం అన్నీ తినేవారు కానీ తర్వాతర్వాత ఆయనకు ఫుడ్ రెస్ట్రిక్షన్స్ చాలా ఉండేవి. అందుకని ఆయన తినకూడరని ఆయనకు ఇష్టమైనవేమో వండేవాళ్లం కాదు. ఆయన కాలంచేసి నాలుగేళ్లవుతున్నా ఇప్పటికీ కందిపచ్చడి చేస్తే కళ్ళల్లో నీళ్ళు తిరుగుతాయి..!! ఆయనను తలవకుండా ఈ టపా కూడా రాయలేను మరి..


సరే, కొబ్బరి + కంది పచ్చడి లోకి వచ్చేస్తే... ఎర్రగా వేయించిన కందిపప్పు లో నానబెట్టిన చింతపండు, ఉప్పు, ఎర్ర మిరపకాయలతో వేయించిన పోపు కలిపి మెత్తగా గ్రైండ్ చేసి, ఘుమఘుమలాడే కందిపచ్చడి రెడి అయిపోతుంది కదా ! మా నాన్నమ్మ ఇదే కందిపచ్చడిలో కొబ్బరి కలిపి కొబ్బరి + కంది పచ్చడి చేసేది. అదీ చాలా బావుంటుంది. ఎలాగంటే..

ఒక కొబ్బరి చిప్ప (half coconut)
150gms కండిపప్పు
నిమ్మకాయంత నానబెట్టిన చింతపండు
రెండు పచ్చిమిరపకాయలు
పోపుకి: ఐదారు ఎండు మిరపకాయలు, ఒక చెంచా మినపప్పు, కొద్దిగా ఆవాలు, జీలకర్ర, చిటికెడు ఇంగువ, చిటికెడు పసుపు, కర్వేపాకు

* ముందుగా కందిపప్పు ఏమాత్రం మాడకుండా ఎర్రగా వేయించుకోవాలి. పచ్చడి రుచి అంతా ఈ వేయించటంలోనే దాగి ఉంటుంది. వేగిన కందిపప్పు  మిక్సీలో కాస్త తిప్పాలి.

*   కందిపప్పు   కాస్త నలిగాకా చింతపండు, కొబ్బరి(కొబ్బరిచిప్ప ముక్కలు చేసి గ్రైండ్ చేసుకున్నా సరే, లేక తురుముకున్నా సరే), ఉప్పు, పచ్చి మిర్చి, పోపులో వేగిన ఎండు మిరపకాయలు వేసి బాగా మెత్తగా గ్రైండ్ చేసుకోవాలి. పచ్చడి మరీ గట్టిగా అనిపిస్తే కాసిని నీళ్ళు పోసికోవచ్చు గ్రైండ్ చేసేప్పుడు.

* పచ్చడితో పాటూ గ్రైండ్ చేసే కన్నా పచ్చడి గిన్నెలోకి తీసాకా వేగిన పోపు పైన వేసి కలిపితే ఏ పచ్చడి అయినా బావుంటుంది.

కొబ్బరి వెయ్యని కందిపచ్చడికి ఒక టిప్:


* గ్రైండ్ చేసేప్పుడు రెండు మూడు వెల్లుల్లి రేకులు వేసుకుంటే ఉత్తి కంది పచ్చడి మరి మరీ రుచికరంగా ఉంటుంది.

నారింజకాయ
నిన్నుచూడగానే
నోరూరుతుంది
తొక్కతీసి తింటే
అబ్బబ్బ పులుపు
తిననే తినను...

అంటూ చిన్నప్పుడు పాడుకునేవాళ్ళం కదా..! 
నారింజకాయ చాలా పుల్లగా ఉంటుంది. బాగా పండితే తియ్యగా మారితుంది. సిటీల్లో అరుదుగా దొరికే ఈ నారింజకాయ చెట్టు ఒకటి అన్నయ్య వాళ్ల ఫ్రెండ్ ఇంట్లో ఉందిట. ఏవో మాటల్లో "ఆ కాయలేమిటో తెలీవు. ఏంచేసుకోవాలో తెలీక పడేస్తూ ఉంటాం" అన్నాడట అతను.. అయ్యో మేం వాడతాం..చెట్టుకెన్నుంటే అన్నీ పట్టుకురా అని అన్నయ్య నారింజకాయలు తెప్పించి నాకూ ఇచ్చాడు.

నారింజకాయతో చేసే "నారింజకాయ కారం" చాలా బావుంటుంది. రెండు రకాలుగా దీనిని చేయచ్చు..

మొదటిరకం:


* ఒక నారింజకాయ ఉంటే రెండు పెద్ద చెంచాలు నూనె వేడి చేసుకోవాలి.

* కాగిన నూనెలో పావుచెంచా ఇంగువ వేసి కాగాకా, మూడు చెంచాలు మెంతిపిండి వెయ్యాలి. తర్వాత మూడు చెంచాల కారం కూడా వేసి స్టౌ ఆపేయాలి. ఆ వేడికి కారం కూడా వేగుతుంది. ఇది చల్లర్చాలి.

* విడిగా ఒక గిన్నెలో నారింజకాయలు రసం తీసి,(రసం తీసేప్పుడు చెయ్యి తగలకుండా చూసుకోవాలి.లేకపోతే రసం చేదు వచ్చేస్తుంది) అందులో తగినంత ఉప్పు(కారానికి సమానంగా), ఒక చెంచా పచ్చి ఆవ పొడి(పచ్చిదే) వేసి బాగా కలిపిన తర్వాత కాచి చల్లార్చిన మెంతిపిండి మిశ్రమం అందులో కలపాలి.

రెండవరకం:
* రెండు చెంచాలు మినపప్పు
* రెండు చెంచాలు ఆవాలు
* నాలుగు చెంచాలు మెంతులు
* పది పన్నెండు ఎండు మెరపకాయలు
-- ఇవన్నీ కలిపి కాస్త నూనెలో వేయించి, చివరలో పావుచెంచా ఇంగువ కూడా వెయ్యాలి. చల్లారాకా మెత్తగా గ్రైండ్ చేసుకోవాలి.

తర్వాత నారింజకాయ రసం తీసుకుని, అందులో ఈ గ్రైండ్ చేసుకున్న మిశ్రమం వేసి, తగినంత ఉప్పు వేసుకుని మొత్తం బాగా కలుపుకోవాలి.

ఇదేవిధంగా నిమ్మకాయ కారం కూడా చేసుకోవచ్చు.

వేడి వేడి అన్నంలో ఈ నారింజకాయ కారం కలుపుకుని, కాస్తంత నెయ్యి వేసుకుని తింటే... అమృతం అంటే ఇదేనేమో అనిపించకమానదు !!

చలికాలం అయిపోతోంది కానీ ఇంకా లేత ముల్లంగి దొరుకుతోంది. ముల్లంగి వాసన నచ్చక కూరగా కానీ పచ్చడిగా కానీ  తినలేనివారు ముల్లంగి తురుముకుని చపాతీ చేసుకోవచ్చు.

ముల్లంగి వల్ల ఆరోగ్యానికి ఎన్నో ఉపయోగాలు ఉన్నాయి. అవేమిటో క్రింద లింక్ లో చూడవచ్చు:
http://en.petitchef.com/recipes/health-benefits-of-mooliradish-fid-418423

తయారీ:

* ముందుగా లేత ముల్లంగి ఇలా తురుముకోవాలి.

* ముల్లంగి వాసన నచ్చకపోతే, ఆ తురుములో కాస్తంత ఉప్పు వేసి ఐదు నిమిషాలు అట్టే పెట్టి, ఆతర్వాత  ముల్లంగి తురుముని గట్టిగా పిండేసి, గోధుమపిండిలో కలపాలి.

* రెండు గ్లాసుల గోధుమపిండికి, ఒకటిన్నర గ్లాసుల ముల్లంగి తురుము వేసి చపాతీ పిండి కలుపుకోవాలి. ఇలా..

* కలుపుకున్న పిండిని వీలయినంత త్వరగా వత్తేసుకోవాలి. ఎక్కువ సేపు ఉంచితే ముల్లంగిలో ఉన్న తేమ వల్ల పిండి బాగా మెత్తగా అయిపోతుంది.

* వీలయినంత సన్నగా చపాతీ వత్తుకుని, పెనం మీద చపాతీ చూట్టు పావు చెంచా నూనె వేసి మీద చపాతీ కాల్చుకోవాలి.

* రుచికరమైన ముల్లంగి చపాతీలు ఏదైనా ఆకుకూరపప్పుతో కానీ, ఏదైనా కూరతో కానీ తినవచ్చు.

మా చిన్నప్పుడు అమ్మ చేసే ఈ బ్రెడ్ ఉప్మా మాకు బాగా నచ్చేది. పోటీలు పడి ప్లేట్ ఖాళీ చేసేవాళ్ళం.

ఈ  ఉప్మా చేయటం చాలా సులువు కూడా.

కావాల్సినవి:

ఒక చిన్న బ్రెడ్ పేకేట్
ఒక పెద్ద ఉల్లిపాయ
నాలుగు వెల్లుల్లు రేకులు
ఒక కేరెట్
కాస్త కొత్తిమీర

పోపుకి:
ఆవాలు, జీలకర్ర, మినపప్పు, శనగపప్పు, చిటికెడు ఇంగువ, పావు చెంచా పసుపు, తగినంత ఉప్పు,కర్వేపాకు, రెండు పచ్చి మిర్చి, ఒక ఎండు మిర్చి.


చేసే విధానం:


* రెండు చెంచాల నూనెలో పోపు వేయించాలి. అందులో చితక్కొట్టిన వెల్లుల్లిరేకులు, తరిగిన ఉల్లిపాయ ముక్కలు వేసి కాసేపు వేయించాలి.

* ఉల్లిపాయ ముక్కలు మెత్తబడ్డాకా, కేరెట్ తురుముకున్నది లేదా చిన్న ముక్కలు గానీ చేసి ఉల్లిపాయ ముక్కలతో కలిపి రెండు నిమిషాలు వేయించాలి.(పైన ఫోటోలోని ఉప్మాలో  నేను కేరెట్ బదులు గాజర్ వాడాను)

* ఉల్లిపాయలు వేగాకా, చిన్న చిన్న ముక్కలుగా చిదిమిన బ్రెడ్ ముక్కలు అందులో వేసి, పసుపు, కాస్తంత ఉప్పు వేసి బాగా కలపాలి. బ్రెడ్ ముక్కలు గట్టిగా ఉంటే కాస్తంత నీళ్ళు చిలకరిస్తే మెత్తబడతాయి.

* నాలుగైదు నిమిషాలు అడుగంటకుండా బాగా కలిపిన తరువాత కొత్తిమీర చల్లి దించేసుకోవాలి.

* నోరూరించే బ్రెడ్ ఉప్మా రెడీ. ఇది మిల్క్ బ్రెడ్ తోనే కాక, వీట్ బ్రెడ్ లేదా బ్రౌన్ బ్రెడ్ తో కూడా చేసుకోవచ్చు !!