అప్పడాలు లేకుండా అన్నం తినరు మా ఇంట్లోవాళ్ళు ! రోజూ డీప్ ఫ్రైడ్ పాపడ్ అంటే నాకు చెయ్యటం ఇష్టం లేదు. మా చిన్నప్పుడు అమ్మ స్టౌ మీదే కాల్చేది అప్పడాలు. కానీ అలా చేస్తే నాకు సగం అప్పాడాలు మాడిపోయాయి. మైక్రోవేవ్ లో చక్కగా బాగా వస్తాయి. కానీ ఒక్క అప్పడాల కోసం మైక్రోవేవ్ కొనటం ఎందుకు? అనిపించి ఎలా ఎలా అని ఆలోచిస్తే.. ఈ ఐడియా వచ్చింది.. ఎవరికైనా ఉపయోగపడుతుందని ఇక్కడ రాస్తున్నాను.. 

ఫోటో లోది పుల్కాలు చేస్కుందుకు కొన్న చట్రం. దాని మీద అప్పడాలు పెట్టాలని ఐడియా వచ్చింది. మాడకుండా బాగా వచ్చాయి అప్పడాలు. దానికి హేండిల్ ఉంటుంది కాబట్టి వేడిని బట్టి పైకి కిందకీ హేండిల్ పట్టుకుని తిప్పచ్చు. 

ఇప్పుడింక ఆయిల్ ఫ్రీ అప్పడాలు చక్కగా రోజూ కాలుస్తున్నా..:)

మావిడల్లంతో మరొక సింపుల్ సలాడ్..

మొన్న చేసాను.. బాగా వచ్చింది.

* మావిడల్లం, కేరెట్, క్యాబేజీ మూడూ తురుముకోవాలి.

* కాస్త ఉప్పు, పచ్చిమిర్చి ఇష్టం లేకపోతే కారం చల్లి, చిన్న నిమ్మకాయ రసం పిండుకోవాలి. పెద్ద నిమ్మకాయాయితే అరచెక్క రసం చాలు.

* మొత్తం బాగా కలపాలి.

* చపాతీల్లోకి చాలా బావుంది ఇది. కూర లేకపోయినా ఈ సలాడ్ తో తినేయచ్చు చపాతీలు.

చూడటానికి అల్లం లాగానే ఉండే "మావిడల్లం"(Mango-Ginger) పసుపు జాతికి చెందిన దుంప. చలికాలంలో ఎక్కువగా దొరికే మావిడల్లం మామూలు రోజుల్లోఎక్కువ దొరకదు. ముఖ్యంగా ఈ ప్రాంతంలో. బెజవాడలో కూడా మాకు బాగా దొరికేది మావిడల్లం. బీట్రూట్, కేరెట్,పచ్చి మిరపకాయ, ముక్కలతో పాటు మావిడల్లం ముక్కలు చిన్న చిన్నగా తరిగి నిమ్మరసం,ఉప్పు కలిపి సలాడ్ లాగ చేసేది అమ్మ. బీట్రూట్ లేకుండా కేరెట్ తో కూడా కలిపి చేయచ్చు.

with beetroot & carrot

with carrot

అలాకాక అల్లం పచ్చడి చేసుకున్నట్లు పచ్చడి కూడా చేయవచ్చు. అది మరోసారెప్పుడైనా చెప్తాను. ఈసారి మావిడల్లంతో పులిహోర చెప్తాను. ఎలా ఉంటుందో అని రెండు మూడు సార్లు ప్రయత్నించాను. బాగా వచ్చింది. చెయ్యటం కూడా సులువే.

ఎలాగంటే:

* మామూలు పులిహోర పోపు(ఆవాలు,శనగపప్పు,మినపప్పు,కాస్త జీలకర్ర, కర్వేపాకు, ఎండుమిర్చి, పచ్చిమిరపకాయలు, అరచెంచా ఇంగువ, వేరుశనగపప్పు, పసుపు) వేయించేసి స్టౌ ఆపేయాలి. అప్పుడు తురిమిన మావిడల్లం కోరు ఆ పోపులో వేసి కలపాలి. ఆ వేడి సరిపోతుంది. మావిడల్లం కోరు మరీ పచ్చిది కాకుండా మరి వేగిపొకుండా ఉండాలన్నమాట.

* మావిడల్లం తురుము ఎంత అంటే.. ఒక గ్లాసు అంటే సుమారు 150gms బియ్యానికి 50gms మావిడల్లం తురుముకోవాలి.

* ఇప్పుడు ఉడికి చల్లారిన అన్నంలో పోపు, సరిపడా ఉప్పు, అవసరమైతే మరికాస్త పసుపు వేసి కలిపేసాకా నిమ్మరసం పిండాలి.

* అంటే చింతపండు పులిహోరలో మాములు అల్లం తురుము వేసినట్లుగా, నిమ్మకాయపులిహోరలో మావిడల్లం తురుము కలపాలన్నమాట :) 

* మరి చింతపండు పులిహోరలో  మావిడల్లం తురుము కలిపితేనో...? నేను ట్రై చెయ్యలేదు. మీరు చేసాకా బాగుంటే చెప్పండి..:-)

ఈ చలికాలంలో చిక్కుడు కాయలు బాగా వస్తాయి కదా. వాటితో రెండు కూరలు.. ఇవి చాలామంది చేసుకునేవే.. తెలియనివాళ్ళు ఉంటే చేసుకుంటారని రాస్తున్నా.

సింపుల్ చిక్కుడుకాయ కూర:

* చిక్కుడుకాయలు కడిగి,  పురుగు లేకుండా వలిచి చూసుకుని మధ్యకి తుంపుకోవాలి.

*  ఆ ముక్కల్ని చిన్న కుక్కర్లో కాస్త ఉప్పు వేసి ఉడికించాలి. ముక్కలెన్ని ఉంటాయో దానికి సగమ్ నీళ్ళు పోస్తే చాలు.

* ఒకే ఒక్క విజిల్ వచ్చాకా ఆపేయాలి. ఎక్కువ కూతలు వస్తే ముక్కలు పేస్ట్ అయి కూర ముద్దగా అయిపోతుంది.

* కడాయిలో ఒకటి,రెండు చెంచాల నూనె వేసి ఈ ముక్కలు అందులో వేసేసి, ఐదు నిమిషాల తర్వాత కాస్త ఉప్పు, కారం(వెల్లుల్లి ఉన్న 'మసాల కారం' అయితే బావుంటుంది) చల్లి దింపేసుకోవటమే. పోపు కూడా అక్కర్లేదు. 

* ఈ కూర అన్నంలోకీ, చపాతీల్లోకీ కూడా చాలా చాలా బావుంటుంది.



వంకాయ-చిక్కుడుకాయ:

* వంకాయ, చిక్కుడికాయ రెండు సమానంగా తీసుకోవాలి.

* తెల్లవంకాయలు అయినా పర్వాలేదు, పొడుగు వంకాయలైనా పర్వలేదు.

* పావుకేజి కూరకి చిన్న నిమ్మకాయంత చింతపండు నానబెట్టి, ఆ రసం + తగినంత ఉప్పు, చిటికెడు పసుపు  కూరముక్కల్లో వేసి ఉడకబెట్టాలి. (గిన్నెడుముక్కలు ఉంటే వాటికి మూడు వంతులు నీరు పొయాలి).

* కుక్కర్లో పెడితే రెండు, మూడు విజిల్స్ రావచ్చు.

* ఈ కూరకి ఉడికించే ముక్కలు పై ఫోటొలో లాగ పొడిపొడిగా ఉండచ్చు, లేదా ఎక్కువ నీళ్ళు పోసి కాస్త ముద్దగా కూడా ఉడకపెట్టుకోవచ్చు.

* రెండు అంగుళాలు  అల్లం ముక్క, మూడు పచ్చిమిరపకాయలు తొక్కి ఉంచాలి. గ్రైండ్ చేసేకన్నా తొక్కితేనే బావుంటుంది.. మధ్య మధ్య అల్లం ముక్కలు తగులుతూ :)

* ఆవాలు,మినపప్పు, శనగపప్పు, కర్వేపాకు పోపు వేసి వేగాకా ఇందాకా తొక్కుకున్న అల్లం పచ్చిమిర్చి  ముద్ద వేసి రెండు నిమిషాలయ్యాక ఉడికిన కూర ముక్కలు ఇందులో వేసి కూర బాగా దగ్గర పడ్డాకా ఆపేయటమే.

* కూర పోపు పెట్టాకా తీసిన ఫోటో ఎంత వెతికినా కనబడలేదు..:(

ఎండాకాలంలో మామూలు ఊరగాయలతో పాటూ ముక్కలు బాగ ఎండుతాయని నిమ్మకాయ, దబ్బకాయ, టమాటా మొదలైన ఊరగాయలు పెట్టుకుంటాము కదా, ఎండ లేకపోయినా కూడా స్టౌ మీద మగ్గించి టమాటా నిలవ పచ్చడి చేసుకోవచ్చు. ఎండబెట్టి పెట్టిన ఊరగాయంత నిలవ ఉండకపోయినా, ఇదీ నెలా రెండునెలలు నిలవ ఉంటుంది.

కావాల్సినవి:
కేజీ టమాటాలు
వంద గ్రాములు నూనె
వంద గ్రాములు చింతపండు
వంద గ్రాములు కారం
ఏభై గ్రాములు మెంతిపొడి(కొన్నది లేక పొడిగా మెంతులు వేయించి గ్రైండ్ చేసినది)
తగినంత ఉప్పు (సుమారు 75-100 gms మధ్య)
చెంచా ఇంగువ
చెంచా పసుపు
పోపుకి  చెంచా ఆవాలు

తయారీ:
* టమాటాలు కడిగి పొడిగా ఉండేలా తుడిచి, ముక్కలు చేసి ఏభైగ్రాములు నూనె వేసి వేయించాలి.  పైన మూతపెడితే త్వరగా మగ్గుతాయి ముక్కలు.

* ఆ ముక్కలు కాస్త మగ్గాకా, చింతపండు చిన్నచిన్న ముక్కలు చేసి టమాటా ముక్కల్లో వెయ్యాలి. ముక్కలు మెత్తపడి దగ్గర పడుతుండగా మూత తీసేసి, రసం అంతా ఇగరనివ్వాలి.

*  రసం అంతా ఇగిరి టమాటా ముక్కలు బాగా దగ్గరపడ్డాకా స్టౌ ఆపేయాలి.

* ఈ మిశ్రమం చల్లారాకా తగినంత ఉప్పు కలిపి గ్రైండర్ లో మెత్తగా గ్రైండ్ చెయ్యాలి. మెత్తబడిపోతాయి కాబట్టి ఒక్క తిప్పు చాలు.

* మూకుడులో నాలుగైదు చెంచాల నూనె వేసి అందులో ఆవాలు, ఇంగువ పోపు వేయించాలి.

* తర్వాత మెంతిపొడి వేసి బాగా ఎర్రగా వేగనివ్వాలి.

* తర్వాత కారం కూడా వేసి మిగిలిన నూనె కూడా పోసి స్టౌ ఆపేయాలి.  కారం వేగటానికి ఆ వేడి చాలు.

* తర్వాత గ్రైండ్ చేసిన టమాటా ముద్ద అందులో కలిపేయాలి. వేడి మీద అదే మూకుడులో కలిపేయచ్చు.

* చల్లారాకా తడి తగలకుండా సీసాలో దాచుకుంటే నెలా, రెండునెలలు నిలవ ఉంటుంది.

రెండో రకం టమాటా పచ్చడి:
* పైన చెప్పినట్లుగా మెంతిపొడి, కారం వేగిన మూకుడిలో టమటా ముద్ద కలిపేసాకా, అది చల్లార్చి, అందులో ఓ డభ్భై గ్రాములు పచ్చి ఆవపిండి కలపాలి.
ఊరగాయలాగ అన్నమాట.

* ఇందులో వెల్లుల్లిపాయలు కూడా వేసుకోవచ్చు. టమాటా ముక్కలు వేగేప్పుడే వెల్లుల్లి కలిపి వేయించేసి, గ్రైండ్ చెసేస్తే రుచి బావుంటుంది.

* ఇది కూడా తడి తగలకుండా ఉంచితే నెలా, రెండునెలలు నిలవ ఉంటుంది.

అసలు నాకూ చిన్నప్పటి నుండీ ఒక డౌటు.. హోటల్లొ కూడా మసాలా దోశలో మసాలా ఏమీ ఉండదు కదా..మరి దాన్ని మసాలా దోశ అని ఎందుకు అంటారు? అని !

అమ్మా "మసాలా దోశ " కావాలి అని పిల్ల రోజూ అడుగుతోంది.. ఇడ్లీ పిండి అయ్యాకా చేస్తాలే అని చెప్పా. నిన్న రాత్రి పప్పు నానబెట్టి ఇవాళ వేసిపెట్టా.  ఈసారి మామూలుబియ్యం లేదా దంపుడు బియ్యం కాకుండా ఉప్పుడు బియ్యం నానబెట్టా.

ఈ దోశ కి కావాల్సినవి:

* గ్లాసుంపావు మినపప్పు ,
* రెండు గ్లాసులు ఉప్పుడు బియ్యం,
* అర గ్లాసు ఓట్స్,
* చెంచాడు శనగపప్పు లేదా చెంచాడు మెంతులు
(దోశ క్రిస్ప్ గా కావాలంటే శనగపప్పు, మెత్తగా కావాలంటే మెంతులు వేసుకోవాలి)


* పైన చెప్పిన ఐటెమ్స్ అన్నీ ముందురోజు రాత్రి నానబెట్టేసుకుని పొద్దున్నే మెత్తగా రుబ్బుకోవాలి. తగినంత ఉప్పు వేసి బాగా కలిపి అట్లు వేసుకోవటమే.

కూరకి: బఠాణీ, కేరెట్, బంగాళాదుంప ఉడకపెట్టి, పోపులో ఉల్లిపాయ వేసి వేగాకా, ఉడికిన కూరముక్కలు వేసి బాగా కలిపేసుకుంటే కూర రెడి అవుతుంది.

అది అట్టు మీద ఇలా వేసి తినిపెట్టమని ఇంట్లోవాళ్లకి ఇచ్చేయటమే :-)

సోయాబీన్ ఇడ్లీకి  కావాల్సినవి:

ఒక గ్లాసు సోయాబీన్ గింజలు
రెండు గ్లాసులు ఇడ్లీ రవ్వ

తయారీ:
* మినపప్పు నానబెట్టినట్లు సోయాబీన్ గింజల్ని రాత్రి నానబెట్టుకోవాలి. పగలైతే గింజలు ఓ ఎనిమిది గంటలు నానేలా చూసుకోవాలి.

* ఇడ్లీ రవ్వ మూడు నాలుగు గంతలు నానితే చాలు.

* నానిన సోయాబీన్ గింజల్ని ఇడ్లీలకి మినపప్పు రుబ్బినట్లే మెత్తగా రుబ్బుకొవాలి.

* నానిన ఇడ్లీ రవ్వ గట్టిగా పిండుతూ రుబ్బిన సోయాబీన్ పిండిలో కలపాలి.

* మామూలు ఇడ్లీలు వేసినట్లే ఇడ్లీ ప్లేట్లలో సోయాబీన్ పిండి వేసి అవిరిపై ఉడికించుకోవటమే. 

* పదిహేను ఇరవై నిమిషాల్లో మెత్తని ఇడ్లీలు రెడీ అవుతాయి.

* సోయాబీన్ ఇడ్లీలను టమాటో గానీ మరే ఇతర చెట్నీతో గానీ వడ్డించవచ్చు.

note:ఈ పిండి నిలవ ఉంచలేదు నేను. ఉండకపోవచ్చు కూడా.. కాబట్టి ఎప్పటికప్పుడు కాస్త చేసుకోవటమే మంచిదేమో.

*** 

వెజిటబుల్ ఇడ్లీ:



మామూలు మినప్పిండి ఇడ్లీలు ప్లేట్ లో వేసేప్పుడు అందులో కాసిని కేరెట్,బీన్స్ ముక్కలు చిన్న చిన్నగ తరిగి వెయ్యటమే..:)

అవి ఉడికాకా ఇలా ఉంటాయి..:-)