చింతకాయలు దొరికే సీజన్ లో కొత్తిమీర, దోసకాయ, బీరకాయ, ఆనపకాయ మొదలైన అన్ని పచ్చళ్లలోకీ చింతపండు బదులు చింతకాయలనే వాడతాను నేను. చింతకాయల వల్ల పచ్చడికి డిఫరెంట్ టేస్ట్ వస్తుంది. చింతపండు కన్నా ఇదే మంచిది కూడానూ.

ఈ టపాలో "చింతకాయ - కొబ్బరికాయ పచ్చడి" ఎలాగో చూడండి..

కావాల్సినవి: 

*అర కొబ్బరిచిప్ప (కోరుకున్నా సరే, ముక్కలు చేసి గ్రైండ్ చేసినా సరే)

* మూడు నాలుగు పెద్ద చింతకాయలు (పచ్చివి)

(నాలుగే అయితే ఎక్కువ పులుపు ఉండదు)

* తగినంత ఉప్పు

* రెండు పచ్చిమిరపకాయలు

* కాసిని కొత్తిమీర రొబ్బలు(పచ్చివే) , కొత్తిమీర ఇష్టమైతే చిన్న కట్ట మొత్తం వేసుకోవచ్చు.

పోపులోకి: అర టీ స్పూన్ ఆవాలు, జీలకర్ర, టీస్పూన్ మినపప్పు, రెండు ఎండుమిరపకాయలు, చిటికెడు ఇంగువ, కాస్త కర్వేపాకు, చిటికెడు పసుపు.

తయారీ:

* ముందు ఒక చెంచా నూనెలో పైన చెప్పినవాటితో పోపు పెట్టేసుకోవాలి.

* తర్వాత పచ్చి చింతకాయలో గింజలు తీసేసి, అవీ కొబ్బరి ముక్కలూ , తగినంత ఉప్పు , పోపులో వేయించిన రెండు ఎండుమిరపకాయలు, రెండు పచ్చిమిరపకాయలు, కొత్తిమీర కలిపి మెత్తగా గ్రైండ్ చేసుకోవాలి.

* గిన్నెలోకి తీసాకా మిగిలిన పోపు కలిపి వడ్డించటమే.

* ఈ పచ్చడి దోశల్లోకీ, అన్నంలోకీ కూడా బావుంటుంది. 

* పెరుగు కాస్త పుల్లది ఉంటే మెంతిమజ్జిగ బావుంటుంది.

* పెరుగులో కాస్త ఉప్పు వేసి చిలికేసుకోవాలి.

* పోపులో : 

మినపప్పు,మెంతులు, జీలకర్ర, ఆవాలు,ఇంగువ,మిర్చి,కర్వేపాకు + ఒక చెంచా వాము కూడా వేసి బాగ వేగాకా 

*చిలికిన మజ్జిగలో ఈ పోపు వెయ్యాలి.

* మెంతులు ఇష్టపడనివారు పొపు అంతా వేగాకా అందులో పచ్చి మెంతిపిండి వేసుకోవచ్చు. మెంతిపిండి వేగాకా రంగుమారి కమ్మని వాసన వస్తుంది. అప్పుడు స్టౌ ఆపేయటమే.

* పైన కొత్తిమీర చల్లుకుంటే బావుంటుంది.

*ఇది ఇది మంచి appetizer. అన్నంలో కలుపుకోకపొయినా బౌల్ లో పోసుకుని సూప్ లాగ తాగేయచ్చు.

* వాము ఎసిడిటీని తగ్గిస్తుంది. డైజషన్ కి కూడా చాలా మంచిది. 

* మెంతులు వంటికి ,జుట్టుకీ, కొలెస్ట్రాల్ తగ్గించటానికీ కూడా మంచివి కాబట్టి తరచుగా మెంతిమజ్జిగ చేసుకోవటం ఆరోగ్యానికి మేలు.

కాకరకాయతో చేసే కూరలు ఇందాకటి టపాలో రాసాను కదా:
http://ruchi-thetemptation.blogspot.in/2012/11/blog-post.html

ఇప్పుడు కాకరకయతో రెండు రకాల పులుసులు:

1.కాకరకాయ బెల్లం పులుసు:

*  రెండు కాకరకాయలు చిన్నవిగా తరిగి ఉడికించాలి.

* మెంతులు,ఆవాలు,జీలకర్ర,ఇంగువ, కర్వేపాకు లతొ పోపు పెట్టి,అందులో ఒక ఉల్లిపాయ ముక్కలు చేసి కాస్త వేయించాలి.

* తర్వాత నిమ్మకాయంత చింతపండు నానబెట్టి రసం తీసి , అది + ఒక పెద్ద గ్లాసుడు నీళ్ళు(300ml) ఒక పెద్ద గిన్నెలో పోయాలి.

* ఇప్పుడు వేగిన ఉల్లిపాయముక్కలు, ఉడికిన కాకరకాయ ముక్కలు అందులో వేసి మరగనివ్వాలి.

* అప్పుడు నిమ్మకాయంత బెల్లం తరుగు కూడా వేసి బాగా కలవనివ్వాలి.

* చివరలో రెండుచెంచాల బియ్యప్పిండి కాస్త నీళ్లల్లో పల్చగా కలుపుకుని అది పులుసులో పొయ్యాలి. దీనివల్ల పులుసు చిక్కబడుతుంది.

* కొత్తిమీర ఇష్టమైతే ఇందులో దింపేముందు వేసుకోవచ్చు.

*మొత్తమంతా మరో ఐదు నిమిషాలు మరగనిచ్చి దింపేసుకోవాలి.



2.కాకరకాయ పచ్చిపులుసు:

* రెండు కాకరకాయలు, ఒక ఉల్లిపాయ ముక్కలు చేసి వేయించి స్టౌ ఆపేయాలి. (వేపుడు లాగానే)

* తర్వాత నిమ్మకాయంత చింతపండు నానబెట్టి రసం, తగినంత ఉప్పు వేసి కలిపి, ఒక గ్లాసుడు నీళ్ళూ (nearly 300ml) వేగిన కూరలో పోయాలి. పొయ్యి మీద పెట్టకూడదు.

* ఆవాలు, మెంతులు, కాస్త జీలకర్ర, కర్వేపాకు, ఇంగువలతో పోపు పెట్టుకోవాలి.

* ఇందులో నిమ్మకాయంత బెల్లం కూడా తరిగి కలిపితే ఆహా ఏమి రుచి  :)

* ఇది easy + నా ఫేవొరేట్ !

కాకరకాయ చేదుగా ఉన్నా ఆరోగ్యానికి చాలా మంచిది. రక్తాన్ని శుధ్ధి చేయగలదు. ఇందులో ఇనుము ఉంటుంది. ఓ వారం రోజులు పరగడుపున ఒక ఔన్స్ కాకరకాయ రసం తాగితే ఎక్కువగా ఉన్న బ్లడ్ సుగర్ లెవెల్స్ కూడా కంట్రోలౌతాయిట.(ఇది చేయదలిస్తే మాత్రం ఎవరన్నా ఆయుర్వేదం డాక్టర్ ని అడిగి చేయండి) ఎన్నో ఔషథగుణాలున్న ఈ కూరను వారానికి ఓసారన్నా తింటే మంచిది. ఎక్కువ గింజపట్టని లేత కాకరకాయలతో ఏ కూర చేసినా అద్భుతంగా ఉంటుంది. కాకరకాయతో మాత్రమే చేసే కొన్ని రకాల కూరలు ఈ టపాలో:

1.కాకరకాయ శనగపప్పుకారం:

పావు కేజీ కాకరకాయలకి
రెండు పెద్ద చెంచాల శనగపప్పు, 
ఒక పెద్ద చెంచామినపప్పు, 
ఆవాలు, 
పావు చెంచా మెంతిగింజలు, 
ఐదారు(మీ కారం బట్టి) ఎండు మిర్చి కలిపి గ్రైండ్ చేసుకుని,

కాకరకాయలు అటు ఇటు చీరి వాటిల్లో ఈ పైన చెప్పిన పొడిని  కూరి నాన్స్టిక్ మూకుడులో మగ్గించండి. అంటే కాస్త నీళ్ళు పోసి,నూనె వేసి సిమ్ లో ఉడకనివ్వాలి.

లేదా కాకరకాయ ముక్కలు ఉడకపెట్టేసుకుని, తర్వాత నూనె వేసి, ఈ పొడి వేసి వేయించినా సరే.

2.కాకరకాయ మసాలా type1 :

*కాకరకాయ ముక్కలు నిలువుగా చీరి చింతపండు నీళ్ళలో ఉడకబెట్టేసుకోవాలి.

*రెండు చెంచాలు వేరుశనగ, రెండు చెంచాలు నువ్వులు  పొడిగా వేయించి    మెత్తగా పేస్ట్ చేసుకోవాలి.

* తర్వాత నూనెలో ఆవాలు, ఎండుమిర్చి కర్వేపాకు పోపు వేసి, 

*సన్నగా తరిగిన ఉల్లిపాయముక్కల్ వేసి వేగనివ్వాలి.

*తర్వాత అందులో ఇందాకా చేసుకున్న వేరుశనగ నువ్వుల పేస్ట్, ఒక చెంచా అల్లంవెల్లుల్లి పేస్ట్ , కారమ్(కావలిస్తే), ఉప్పు, పసుపు (పావు చెంచా) వేసి, కాసిని నీళ్ళు పోసి, మొత్తంమ్ముద్ద బాగా ఉడికాకా,

*అందులో ఉడికిన కాకరకాయ ముక్కలు వేసి ఐదు నిమిషాల తర్వాత దింపేసుకోవాలి.

3.కాకరకాయ మసాలా 2:

కాకరకాయ ముక్కలు చింతపండు నీళ్ళలో ఉడకపెట్టి ఉంచాలి.

రెండు ఉల్లిపాయ,రెండు టమాటా గ్రైండ్ చేసుకోవాలి. 

అల్లం వెల్లుల్లి ముద్ద ఒక చెంచా తీసుకోవాలి. వీటితో పాటే రెండు లవంగాలు, అంగుళం దాల్చిన చెక్క కలిపి గ్రైండ్ చేసేసుకోవాలి.

మూకుడులో నూనె వేసి పైన చేసుకున్న ముద్దలు రెండూ బాగా వేగనిచ్చి,

తర్వాత కాకరకాయ ముక్కలు వేసి ఐదు నిమిషాలు ఉడికాక దింపేసుకోవాలి.


4. కాకరకాయ పెసరపప్పు:

* ఐదారు కాకరకాయలు

* ఒక చిన్న టీగ్లాసుడు పెసరపప్పు ఒకటి, ఒకటిన్నర గంటలు నానబెట్టుకోవాలి.

* నానిన పెసరపప్పుని ఉప్పు, రెండుమూడు పచ్చిమెరపకాయలు, చిటికెడు ఇంగువ వేసి గ్రైండ్ చేసుకోవాలి.
(ఇదే పెసరపప్పు పచ్చడి. అన్నంలో తింటే చాలా బావుంటుంది)

* కాకరకాయలు నాలుగువైపులా చీరి(కట్ పెట్టి) ఈ ముద్ద అందులో కూరి రెండుమూడు కాయల చప్పున వేయించుకోవాలి.

* డీప్ ఫ్రై వద్దనుకుంటే మూకుడులో(నాన్స్టిక్ ప్రిఫర్డ్ :))  అన్నీ కలిపి స్టౌ సిమ్ లో పెట్టి వేయించుకోవచ్చు.



5.ఉల్లికారం:

కాకరకాయ ముక్కలు చింతపండు నీళ్ళలో ఉడకపెట్టి ఉంచాలి.

మూడు ఉల్లిపాయలు, కారమ్ (మీ అనుసారం), చిటికెడు ఇంగువ కలిపి గ్రైండ్ చేసేసుకుని,

ఈ ముద్దను నూనెలొ బాగా వేగనిచ్చి, తర్వత కాకరకాయ ముక్కలు కలిపి ఐదు నిమిషాల తర్వాత దింపేసుకోవటం.

ఇది చిన్న కాకరకయలు దొరికితే కాయపడంగా కూడా చేసుకోవచ్చు.


 6.కాకరకాయ వేపుడు 1:

కాకరకాయ వేపుడు (ఉల్లిపాయ వేసి గాని వెయ్యకుండా గానీ) వేగిపోయాకా పైన ఉప్పు, కారం చల్లేప్పుడు కాస్త శనగపిండి చల్లి మరొ ఐదు నిమిషాల తర్వత దించుకుంటే బావుంటుంది.

7.కాకరకాయ వేపుడు 2:

కాకరకాయ ముక్కలు గుడ్రంగా స్లైసెస్ లాగ తరుక్కుని, వేరుశనగగుళ్ళు,కర్వేపాకు కలిపి వేయించుకుంటే బావుంటుంది.


8. కాకరకాయ కొబ్బరి తీపి కూర:

*పావుకేజీ కాకరకాయలు
*ఒకచిప్పకొబ్బరి కోరు
*ఏభైగ్రాములు బెల్లంతరుగు
*చిన్న నిమ్మకాయంత చింతపండు నానబెట్టి గుజ్జు తీసుకోవాలి.

* కాకరకాయ ముక్కలు స్లైసెస్ లాగ గుండ్రంగా తరుక్కోవాలి.(ఎలాగైనా తరుగచ్చు. తియ్య కూరకి గుండ్రంగా అయితే బావుంటాయి)

* కాకరకాయ ముక్కలు చింతపండు గుజ్జు, కాస్త ఉప్పు వేసి మెత్తగా ఉడికించుకోవాలి.

* మూకుడులో శనగపప్పు,మినపప్పు,ఆవాలు,జీలకర్ర,కర్వేపాకు పోపు వేసి అందులో కొబ్బరి కోరు వేసి ఒక నిమిషం వేయించాలి.

* తర్వాత ఉడికిన కాకరకాయ ముక్కలు, బెల్లంతరుగు వేసి ఐదునిమిషాలు స్టౌ సిమ్ లో ఉంచి తరువాత ఆపేయాలి.

----------
* 9: 
మా అన్నయ్య ఓరోజున కాకరకాయ కొత్తిమీర కారం ఎందుకు చెయ్యకూడదు? అని పరిశోధన చేసాడు. బానే ఉంది. కాకరకాయ అంటే బాగ ఇష్టంమున్న ఎవరన్నా ఆసక్తి ఉంటే ఇది కూడా ట్రై చేయచ్చు.
కొత్తిమీర,పచ్చిమిర్చి కలిపి గ్రైండ్ చే్సి,  కాస్త నూనెలో ఉడికిన కాకరకాయముక్కలు,ఈ ముద్ద వేసి మగ్గించటమే.

------

10.
కుంపటి మీద కాకరకాయలు కాల్చి కూడా కూర చేస్తారు. నేనెప్పుడూ చేయటానికి ప్రయత్నించలేదు. ఎప్పుడన్నా చేస్తే అది కూడా రాస్తా :)

కూరలో, ఉప్మాలో కర్వేపాకు వస్తే ఏరి పారేయకుండా తినేవాళ్ళెంత మంది? "పోపులో కర్వేపాకులా ఏరిపారేసారు!" అనే నానుడి కూడా ఉంది..:) చిన్నప్పుడు నేనూ కర్వేపాకు ఏరేసేదాన్ని. కానీ కర్వేపాకులోని ఔషథగుణాలు, ఉపయోగాలు తెలిసాకా ఎప్పుడూ కర్వేపాకును ఏరిపారేయలేదు. ఏ విధంగా కర్వేపాకుని ఎక్కువగా వాడచ్చో కనుక్కుని ఆ విధంగా వాడటం మొదలుపెట్టాను. కర్వేపాకు ఎప్పుడూ తాజాగా ఉన్నది వాడితే ఎక్కువ ఉపయోగకరం.

కర్వేపాకులో ఇనుము, కేల్షియం, ఫోలిక్ ఏసిడ్, ఏంటీఆక్సిడేంట్లు మొదలైనవి ఉన్నాయి. కర్వేపాకు శరీరంలోని చెడ్డ కొలెస్ట్రాల్ ను తగ్గించగలదు; జుట్టు పెరిగేలా, తెల్లబడకుండా చెయ్యగలదు; రక్తంలోని గ్లూకోజ్ లెవెల్స్ తగ్గించగలదు; జీర్ణ శక్తిని పెంచగలదు.... ఇలా ఎన్నో ఉపయోగాలు ఉన్నాయి. కర్వేపాకు ని గురించి మరిన్ని ఉపయోగాలు ఇక్కడ చూడండి:

http://www.diethealthclub.com/health-food/curry-leaves-health-benefits.html

కర్వేపాకుతో నేను కర్వేపాకుపొడి, కర్వేపాకు పచ్చడి, కర్వేపాకు రైస్ చేస్తుంటాను. ఇవాళ కర్వేపాకుతో పచ్చడి గురించి చెప్తానేం.. మిగిలిన రెండూ మరోసారి.

కావాల్సినవి:

* లేత కర్వేపాకు - రెండు గ్లాసులు  (250-300 ml నీళ్ళు పట్టే గ్లాసన్నమాట)

* చిన్న నిమ్మకాయంత నానబెట్టిన చింతపండు

*పోపులోకి : మినపప్పు, ఆవాలు, జీలకర్ర, చిటికెడు ఇంగువ, ఆరు,ఏడు ఎండుమిరపకాయలు 

*తగినంత ఉప్పు

* రెండు మూడు చెంచాల నూనె

* మూడు, నాలుగు చెంచాల బెల్లం తురుము- optional (తీపి పచ్చడి కావాలనుకుంటేనే)

తయారీ:

* ముందుగా కర్వేపాకు శుభ్రంగా కడిగి ఆరబెట్టాలి. నీళ్ళు ఓడటం తగ్గితే చాలు.

* రెండు చెంచాల నూనెలో కర్వేపాకు మాడకుండా వేయించాలి.

* పోపు కూడా విడిగా వేయించేసుకోవాలి.

* వేగిన ఆకు చల్లరాకా, కర్వేపాకు + నానబెట్టిన చింతపండు + ఎండు మిరపకాయలు, salt కలిపి మెత్తగా గ్రైండ్ చెయ్యాలి.

* తీపి కావాలనుకునేవారు కాస్తంత బెల్లం తురుము కూడా వేసి గ్రైండ్ చేసుకోవచ్చు.

* కర్వేపాకు ముదురుగా ఉంటే పచ్చడి మెత్తగా అవ్వదు. అలాంటప్పుడూ కాస్త గోరువెచ్చని నీళ్ళు గ్రైండ్ చేసేప్పుడు పోసి తిప్పుకుంటే పచ్చడి మెత్తగా అవుతుంది.

*ఈ పచ్చడి అన్నంలోకీ, దోశల్లోకీ కూడా బావుంటుంది.

పెసలు ఒక రాత్రంతా నానబెట్టి పొద్దున్నే నీరు వాడ్చేసి, తడిలేకుండా చూసి పొడి గిన్నెలో కానీ పొడిగా ఉన్న స్టీల్ బాక్స్ లో కానీ వేసి మూత పెట్టేస్తే రాత్రికల్లా చక్కగా మొలకెత్తుతాయి. పల్చటి గుడ్డలో మూట కడితే ఇంకా బాగా వస్తాయి కానీ పొడి గిన్నెలో పెట్టడం సులువుగా ఉంటుంది. అప్పుడు మొలకపెసలని ఫ్రిజ్ లో పెట్టేస్తే రెండుమూడు రోజులు వాడుకోవచ్చు. వారమైనా పాడవవు కానీ తాజాగా ఉండాలి అనుకుంటే కొద్దిగా నానబెట్టుకోవాలి.

మొలకెత్తిన పెసలతో పెసరట్టు, పుణుకులు, రైస్, సూప్ మొదలైనవి చేసుకోవచ్చు. నేనైతే ఉప్మాలో, అట్టు మీద, కూరల్లో కూడా వేస్తుంటాను. క్రింద రాసిన సలాడ్ సులువుగా ఎవరైనా చేసుకుని తినచ్చు. ఇది తింటే చాలాసేపు ఆకలి వెయ్యకుండా కూడా ఉంటుంది. 

 కావల్సినవి:

*3/4 cup మొలకెత్తిన పెసలు(పచ్చివి)

*one medium cup మరమరాలు(puffed rice)

* 1/2 cup చిన్నగా తరిగిన కీరా ముక్కలు

* చిన్నగా తరిగిన ఉల్లిపాయ(medium size) ముక్కలు

*half lemon juice

*తగినంత ఉప్పు, కారం

* పైన చల్లటానికి తరిగిన కొత్తిమీర

తయారీ:

* పైన చెప్పిన పదార్థాలన్నీ ఒక బౌల్ లో కలిపేసుకోవాలి.

* ఉప్పు,కారం వేసి కలిపాకా, నిమ్మరసం పిండుకుని, పైన కొత్తిమీర చల్లాలి.

* ఇందులో సన్నకారప్పూస కూడా చల్లుకుంటే ఇంకా బావుంటుంది.

* పైన చెప్పిన కొలతలు ఒక్కళ్ళు తినటానికి సరిపోతాయి :-)

జొన్నరవ్వఉప్మా-అరటి దూట పెరుగుపచ్చడి

గోధుమల కంటే ఎక్కువ ఆరోగ్యకరమైన ఉపయోగాలు "చిరుధాన్యాలకు (millets)" ఉన్నాయి. అన్ని చిరుధాన్యాలలోకీ జొన్నలు ఎక్కువగా మనం వాడుతూ ఉంటాం. జొన్న రొట్టెలు, జొన్న పేలాలు చేసి వాటితో లడ్డులు, జొన్న సూప్ మొదలైనవి మనం చేసుకుంటూ ఉంటాము. గోధుమ రవ్వ లాగానే "జొన్న రవ్వ" బజార్లో దొరుకుతుంది. ఆ రవ్వతో ఉప్మా ఎలా ఉంటుందా అని ప్రయత్నించాను. బాగా వచ్చింది. మీరూ ప్రయత్నించి చూడండి...

కావాల్సినవి:

* ఒక కప్పు జొన్న రవ్వ (జొన్న రవ్వ దొరకకపోతే, జొన్నలు పొడి మూకుట్లో కాసేపు వేయించి బరగ్గా గ్రైండ్ చేసుకుని, జల్లించుకుంటే, జొన్న రవ్వ తయారవుతుంది)
* మూడు కప్పుల నీళ్ళు
* ఒక కేరెట్(తరిగినది)
* పది బీన్స్(తరిగినవి)
* ఒక ఉల్లిపాయ
* ఒక అంగుళం అల్లం ముక్క
* రెండు పచ్చిమిరపకాయలు
* ఒక ఎండు మిరపకాయ
* పోపు లోకి: ఒకటి రెండు చెంచాల నూనె, ఆవాలు,శనగపప్పు, మినపప్పు, జీలకర్ర, చిటికెడు ఇంగువ, కాస్త కర్వేపాకు
*తగినంత ఉప్పు
* పైన అలంకరించటానికి కాస్తంత కొత్తిమీర తరుగు

విధానం:

* ముందుగా చిన్న కుక్కర్లో పోపు వేయించుకుని, అందులో అల్లం,మిర్చి వేసాకా కూరముక్కలు కూడా వెయ్యాలి.

* తర్వాత అందులో జొన్నరవ్వ వేసేసి రెండు నిమిషాలు కలపాలి.

* తర్వాత నీళ్ళు పోసేసి, తగినంత ఉప్పు వేసి, కుక్కర్ మూత పెట్టేసి మూడు విజిల్స్ వచ్చాకా ఆపేయటమే.

*జొన్నరవ్వ ఉప్మా రెడీ అయిపోతుంది.

* పైన ఫోటోలో జొన్నరవ్వఉప్మాతో పాటూ పెట్టినది అరటి దూట పెరుగుపచ్చడి. కాంబినేషన్ బానే ఉంది. కారం తినేవాళ్ళు దీనికి సైడ్ డిష్ గా ఏదైనా పచ్చడి కూడా చేసుకోవచ్చు.



జొన్నలు గురించిన వివరాలు, ఉపయోగాలు ఇక్కడ చూడవచ్చు:

http://te.wikipedia.org/wiki/%E0%B0%9C%E0%B1%8A%E0%B0%A8%E0%B1%8D%E0%B0%A8%E0%B0%B2%E0%B1%81

రాగులని పిల్లల ఆహారంలో భాగం చేయాలంటే రాగిపిండిని పూరీల్లో కలపటం ఒక సులువైన పధ్ధతి. రాగుల్లో కేల్షియం ఎక్కువ ఉంటుంది కాబట్టి ఎదిగే పిల్లలకి, ఎముకలు బలహీనపడే పెద్దవారికీ ఉపయోగకరం. రాగిపిండిలో గోధుమపిండిలో కన్నా ఎక్కువ పీచుపదార్థం ఉంటుంది. రాగులు శరీరాన్ని చల్లబరుస్తాయి కూడా.

రాగిపిండి చపాతి,దోశ ల్లోకి కూడా వడచ్చు. రాగిపిండితో జావ చేసి అది పాలలో కానీ మజ్జిగలో కానీ కలిపి తీసుకోవచ్చు.

రాగి పూరీలు ఎలాగంటే:

*ఒక కప్పు గోధుమపిండి
*ఒక కప్పు రాగి పిండి(మార్కెట్లో దొరుకుతుంది)
*గుప్పెడు బొంబాయి రవ్వ(optional)
*పిండి కలపటానికి సరిపడా నీళ్ళు
*తగినంత ఉప్పు

* గోధుమపిండి, రాగిపిండి కలిపి, బొంబాయిరవ్వ, తగినంత ఉప్పు నీళ్లతో కలిపి పూరీపిండి కలుపుకోవాలి.
* పూరీపిండి కలిపేప్పుడు గుప్పెడు బొంబాయిరవ్వ కలిపితే బాగా పొంగుతాయి.



రాగిపిండి తో తయారు చేసే ఒక హెల్త్ డ్రింక్ వివరాలు ఇక్కడ:
http://trishnaventa.blogspot.in/2010/04/blog-post.html



రాగి ఉపయోగాలు ఇక్కడ:

http://www.lifemojo.com/lifestyle/health-benefits-of-ragi-finger-millet-103788519

http://articles.timesofindia.indiatimes.com/2012-05-10/diet/30260042_1_ragi-baby-food-south-india

కావల్సినవి:

*మూడు బచ్చలాకు కట్టలు

*కాస్త చింతపండు(అర నిమ్మచెక్క అంత) నానబెట్టినది

*పోపులోకి : పావుచెంచా ఆవాలు, అర చెంచా మినపప్పు, కాస్త జీలకర్ర, చిటికెడు ఇంగువ, మూడు ఎండుమిరపకాయలు
* తగినంత ఉప్పు

* 2,3 tsp oil.



తయారీ:

* బచ్చలాకు వలిచి కడగాలి. కాడలు లేతగా ఉంటే వేయచ్చు కానీ ముదురుగా ఉంటే ఆకు ఒక్కటే వలవాలి.

* 2 tsp oil లో బచ్చలాకు + చిటికెడు పసుపు వేసి మాడకుండా కలుపుతూ వేయించాలి.

* తర్వాత 1tsp oil లో పైన చెప్పిన పోపు పదార్థాలతో పోపు వేయించుకోవాలి.

* మిక్సీలో నానబెట్టిన చింతపండు,ఎండుమిర్చి, వేయింఛి చల్లార్చిన బచ్చలాకు కలిపి మరీ మెత్తగా పేస్టా కాకుండా గ్రైండ్ చేసుకోవాలి.

* బచ్చలాకు జిగురుగా ఉంటుంది కాబట్టి గ్రైండర్లో పేస్ట్ అయిపోతుందేమో అనుకుంటే రోట్లో తొక్కుకోవచ్చు కూడా.

* పచ్చడి చేసేప్పుడు పోపు కలిపేసే కన్నా, గిన్నెలోకి తీసాకా పోపు పైన వేసి కలుపుకుంటే బావుంటుంది.

* వేడి వేడి అన్నంతో తింటే ఈ పచ్చడి చాలా బావుంటుంది.

బచ్చలి ఉపయోగాలు ”కందబచ్చలి కూర’టపాలో చూడవచ్చు.

చక్కగా బయట వాన పడుతోంది కదా.. మరి రకరకాల బజ్జీలు వేసేసుకుందామా...


వాము ఆకుల బజ్జీలు

మిర్చి బజ్జీలు

తమలపాకు, బచ్చలాకు బజ్జీలు (బచ్చలిఆకుని మడిచినందువల్ల అలా ఉన్నాయి బజ్జీలు)

ఇదివరకూ రాసినవి కొన్ని పోస్ట్ లింక్స్:
సొయా వడలు మొక్కజొన్న వడలు:
అరటిపువ్వు వడలు:
కేబేజి పకోడి :

"రైతా" అని ఉత్తరాది వాళ్లు రకరకాలు చేస్తారు గానీ కమ్మని ఇంగువపోపు పెట్టిన మన పెరుగుపచ్చళ్ల ముందు ఆ రైతాలన్నీ బలాదూరే ! రాత్రిపూట భోజనంలోకి రోజు ఏదో ఒక పెరుగుపచ్చడి చేసేది అమ్మ. ఆనపకాయ, పొట్లకాయ, తోటకూర, అరటి దూట, కేరెట్.. మదలైనవాటితో. ఏదీ లేకపోతే చిన్న అల్లంముక్కతొక్కేసి, ఓ పచ్చిమిరపకాయ, కాస్తంత కొత్తిమీర వేసి పొపు పెట్టేసేది. అదో రకం అన్నమాట.

కళ్లకి మంచిదని, ఐరన్, కేల్షియమ్, ఫోలిక్ ఏసిడ్ ఎక్కువగా ఉంటాయని నేను తోటకూర ఎక్కువగా వాడతాను. తోటకూరతో పప్పు, ఆవ పెట్టి పులుసు, పచ్చడి, పెరుగుపచ్చడి, వడలు, గారెలు మొదలైనవెన్నో చేసుకోవచ్చు. ఇవాళ 'తోటకూర పెరుగుపచ్చడి ' ఎలా చెయ్యాలో చెప్తాను..

* ముందు తోటకూరను బాగా కడగాలి. లేకపోతే తినేప్పుడు మట్టి వచ్చి చాలా ఇబ్బంది పెడుతుంది ఈ అకుకూర.

* రెండు కట్టలు ఆకుకూర తరిగి, ఒక గ్లాసు నీటిలో ఉడికించాలి. తోటకూర త్వరగా ఉడికిపోతుంది కాబట్టి కుక్కర్లో అక్కర్లేకుండా ఏదైనా గిన్నెలోనే ఉప్పు వేసి, మూతపెట్టి ఉడికించుకోవచ్చు. ఆకుకూరలు ఉడికించేప్పుడు ఆకుతరుగులో సగం నీళ్ళు పోస్తే చాలు. నీళ్ళు వేస్ట్ అవ్వవు, ఆకు ఉడికాకా పారబొయ్యక్కర్లేదు.

* ఆకు రంగు మారకుండా ఉడికించుకుంటే పోషకాలు నిలిచి ఉంటాయి.

* ఉడికిన తోటకూరను ఇలా మేష్ చేసుకోవాలి. ఆకులు ఆకులుగా కొందరు తినటానికి ఇష్టపడరు.

* తర్వాత పెరుగులో తగినంత ఉప్పు వేసి చిలుక్కోవాలి.

* ఆవాలు, మినపప్పు, మెంతులు(ఎర్రగా వేగాలి), చిటికెడు ఇంగువ, ఒక ఎండు మిర్చి వేసి పోపు వేయించి, చిలికిన పెరుగులో వేసి కలపాలి.

* అప్పుడు అందులో ఉడికించి మేష్ చేసి ఉంచిన తోటకూర బాగా కలపాలి.
* ఇలా చేసుకున్న పెరుగుపచ్చడి రోజూ తింటే చాలా మంచిది. అన్నంలోనే కాక ఉత్తిగా కూడా తినేయచ్చు.

=========================

simple తోటకూర కూర:

* పైన చెప్పిన విధంగా ఉడకపెట్టిన తోటకూర నీరు లేకుండా వాడ్చిపెట్టుకోవాలి.

* తర్వాత శనగపప్పు, మినపప్పు, ఆవాలు, కాస్త జీలకర్ర్ర, పోపు వేయించాలి. అందులో రెండు తోటకూర కట్టలకి మూడు పచ్చిమిరపకాయలు, అంగుళం అల్లం ముక్కతొక్కి ఆ ముద్ద వేసి, అది కాస్త వేగాకా వడ్చి ఉంచిన తోటకూర అందులో వేసి బాగా కలపాలి. ఉప్పు తక్కువైతే కాస్తంత కలుపుకోవాలి.

* కొందరు తోటకూరలో టమాటా,ఉల్లిపాయ,వెల్లుల్లి కూడా వేసి కూర చేసుకుంటారు.

దొండకాయలు కాయపడంగా ఎక్కువ నూనె వెయ్యకుండా వండుకోవచ్చు.

శనగపప్పు కారం వేసి:

కావాల్సినవి:
పావుకేజీ దొండకాయలు

శనగపప్పు కారానికి కావాల్సినవి:
శనగపప్పు నాలుగు చెంచాలు
మినపప్పు మూడు చెంచాలు
ఆవాలు ఒక చెంచా
జీలకర్ర ఒక చెంచా
పావు స్పూన్ మెంతులు
రెండు చెంచాల కొబ్బరి(optional)
ఎండు మిరపకాయలు నాలుగైదు
ఉప్పు తగినంత

తయరీ:

* ముందుగా ఒక చెంచా నూనెలో పైనచెప్పిన పోపుసామానులో పప్పులన్నీ వేయించి స్టౌ ఆపేసాకా కొబ్బరి ఉంటే అందులో కలపాలి. తర్వాత బరగ్గా(మరీ మెత్తగా కాకుండా) గ్రైండ్ చేసుకోవాలి. తర్వాత తగినంత ఉప్పు కూడా కలిపేసి ఉంచాలి.

* కడిగిన దొండకాయలను రెండువైపులా మధ్యదాకా కట్ చేసుకోవాలి.

* వాటిలో గ్రైండ్ చేసుకున్న పొడి కూరి అదంతా వేగేదాకా చాలా టైమ్ పడుతుంది. నూనె కూడా పడుతుంది. అందుకని ముందు రెండువైపులా స్లిట్ చేసిన దొండకాయలను ఒక టీగ్లాసుడు నీళ్ళు,అర చెంచా ఉప్పు వేసి చిన్న కుక్కర్లో ఒక్క విజిల్ వచ్చేదాకా ఉడికించి దింపేయాలి. నీళ్ళు కొద్దిగానే పోసాం కాబట్టి వంపేయాల్సిన అవసరం ఉండదు. (అంతగా ముక్కల్లో నీళ్ళు మిగిలితే చారులోకో పప్పులోకో అవి వాడచ్చు.)

* ఇప్పుడు దొండకాయలు చల్లారాకా అందులోకి రెండువైపులా గ్రైండెడ్ పౌడర్ కూరాలి.

* పాన్ లో గానీ, మూకుడులో గానీ రెండు చెంచాల నూనె వేసి అందులో దొండకాయలు వేసి మాడకుండా రెండు నిమిషాలకొకసారి అటు ఇటు తిప్పుతూ వేగనివ్వాలి.

* శనగపప్పు కారం కూరిన దొండకాయల కూర రెడీ అయిపోతుంది..:)

========================================

నిన్ననే మొదటిసారి చేసిన ఈ రెండు ఎక్స్పరిమెంట్లు బాగా వచ్చాయి.

చక్కిలాలు:
బియ్యం నానపెట్టి గ్రైండ్ చేసి జల్లించి, అందులో మినప్పిండి కలిపి చేసేవి ఒకరకమైన చక్కిలాలు. అలా కాకుండా మైదా పిండి, పెసరపప్పులతో చేసే మరో రకం ఉందిట. చాలా మందికి తెలిసే ఉండచ్చు, నాకు ఈమధ్యనే కొత్తగా తెలిసింది.

కావాల్సినవి:
1/4kg మైదా
100 gms పెసరపప్పు
రెండు చెంచాలు నువ్వులు
రెండు చెంచాలు వాము
తగినంత ఉప్పు
వేయించటానికి సరిపడా నూనె

విధానం:

* ముందర 100 gms పెసరపప్పు ఒక గ్లాసుడు నీళ్ళలోకుక్కర్లో ఉడకపెట్టేసి, జారుగా ఉండేలా మేష్ చేసి ఉంచికోవాలి.

* తర్వాత మైదా పిండిని కూడా ఓ గిన్నెలో వేసి, కుక్కర్ అడుగున నీళ్ళు పోసి, మామూలుగా కుక్కర్ అడుగున పెట్టే చిల్లుల ప్లేట్ పెట్టి, అందిమీద ఈ మైదాపిండి ఉన్న గిన్నె పెట్టాలి. నీళ్లు పొయ్యకుండా. మూత అక్కర్లేదు. విజిల్ పెట్టకుండా ఓ పావుగంట అలా ఉంచాలి పొయ్యి మీద. తర్వాత స్టౌ ఆపేసి, చల్లారాకా పిండిని ఏదన్నా గరిటతో పిండి పొడిపొడిగా ఉండేలా కదపాలి. ఇలా పిండి కుక్కర్లో పెట్టడం వల్ల జంతికలు క్రిస్పీగా వస్తాయిట.

* తర్వాత జారుగా మేష్ చేసిపెట్టుకున్న పెసరపప్పుని ఈ మైదా పిండిలో పోస్తూ జంతికల పిండిలా ముద్ద కలుపుకోవాలి. అది మరీ ముద్దగా ఉండకూడదు. గట్టిగాను ఉండకూడదు. పిండి కలిపేప్పుడే ఉప్పు,కారం,వాము,నువ్వులు వేసి ముద్ద కలపాలి. జారుగా ఉన్న పెసరపప్పు తప్ప ఇక నీళ్ళు కలపకూడదు పిండికి.

* అప్పుడు జంతికల గొట్టంలో ఈ పిండి వేసి ఏదైనా ప్లాస్టిక్ కవర్ మీద చక్కిలాలు చుట్టుకోవాలి. క్రింద ఫోటోలోలాగ.

* ఐదారు చుట్టుకుని, కాగిన నూనెలో వేయించుకోవాలి. అవి అయ్యాకా మళ్ళీ ఐదారు చుట్టుకోవాలి. అన్నీ ఒకేసారి చుట్టేస్తే ఎండిపోతాయి.

* అంతే. చక్కని రుచికరమైన చక్కిలాలు రెడీ !

===========================================

చెక్కలు:

బియ్యప్పిండిలో వేడినీళ్ళూ కలిపి చెక్కలు చెయ్యాలని ప్రయత్నిస్తే రెండుమూడు సార్లు ఫ్లాప్ అయ్యింది. మర్నాటికి మెత్తబడిపోయేవి. ఈసారి చన్నీళ్ళు కలిపి చేసాను. బాగా వచ్చాయి.

చేయటానికి కావాల్సినవి:

* ఒక గ్లాసు బియ్యప్పిండి
* రెండు పచ్చిమిర్చి, చిన్న అల్లం ముక్క, కర్వేపాకు మెత్తగా తొక్కేసుకోవాలి లేదా గ్రైండ్ చేసుకోవాలి.
* రెండు చెంచాల వెన్న
* వేయించటానికి తగినంత నూనె.
* ఉప్పు తగినంత.

తయారీ:

* గ్లాసు బియ్యప్పిండి, తగినంత ఉప్పు, వెన్న, తొక్కుకున్న ముద్ద కలిపి నీళ్ళతో కట్టిగా ముద్ద కలుపుకోవాలి. చపాతీ ముద్దలాగ ఉండాలి.

* కలిపిన పిండి లోంచి చిన్న ఉండ చేసుకుని, ప్లాస్టిక్ కవర్ మీద చేత్తో స్ప్రెడ్ చేస్కోవాలి.

* వాటిని కాగిన నూనెలో వేసి వేయించుకోవటమే. చక్కని చెక్కలు తయారయిపోతాయి.

గోధుమరవ్వ ఉప్మా తిని తిని బోర్ కొట్టేస్తే ఇలా రవ్వ పొంగలి కూడా చేసుకోవచ్చు. మామూలుగా మనం బియ్యంతో చేసుకునే కట్ పొంగలి లాగానే ఇదీ కూడా.

కావాల్సినవి:

ఒక కప్పు(150gms) గోధుమరవ్వ
అర కప్పు పెసరపప్పు
నాలుగు పెద్ద చెంచాల నెయ్యి
ఐదారు జీడిపప్పు పలుకులు
రెండు పచ్చిమిరపకాయలు
రెండు ఎండుమిరపకాయలు
అర స్పూన్ జీలకర్ర, అర స్పూన్ ఆవాలు
బరగ్గా పొడి చేసిన పది మిరియాలు
కాస్తంత కర్వేపాకు, తగినంత ఉప్పు

తయారీ:

* ముందుగా నెయ్యి లో ఆవాలు,జీలకర్ర, మిరియాలు, కర్వేపాకు మిర్చి వేసి పోపు వేయించాలి. చివరలో జీడిపప్పు వెయ్యాలి.
* తర్వాత పెసరపప్పు వేసి ఎర్రగా వేగనివాలి. పెసరపప్పు వెయ్యకుండా కూడా పొపులో గోధుమరవ్వ వేయించి పొంగలి చేసేసుకోవచ్చు. పైన ఫోటొలో పొంగలి లో పెసరపప్పు వెయ్యలేదు.
* తర్వాత రవ్వ కూడా వేసి రెండు నిమిషాలు వేగాకా కప్పు రవ్వకు మూడు కప్పుల నీళ్ళు పోసి, ఉప్పు వేసి కుక్కర్(2 ltrs or 3 ltrs cooker) మూత పెట్టేయాలి.
* రెండు విజిల్స్ రాగానే కుక్కర్ ఆపేయాలి. రవ్వ పొంగలి తయార్ !!

పనస తొనలు తినేసాకా వాటి లోపల గింజల్ని పాడేయకుండా కూరలు చెయ్యటానికి వాడతారు. వీటితో ఏ రకమైన కూర చేసినా ఇవి చాలా రుచిగా ఉంటాయి. ఎండబెట్టి తొక్కు తీసి, వాటిని వేయించుకుని తింటారు. పనసగింజల వేపుడు అన్నమాట. ఇలా కాకుండా పనసగింజలు ఉడకబెట్టి బంగాళా దుంపతోనూ లేక వంకాయతో కలిపి వండుతారు. ఇవాళ వంకాయ పనసగింజల కూర ఎలా చెయ్యాలో చెప్తానూ..

కావాల్సినవి:
* పావుకేజీ వంకాయలు
* పది,పన్నెండు పనస గింజలు
* చిన్న నిమ్మకాయంత చింతపండు నానబెట్టి తీసిన రసం
* పోపుకి ఆవాలు,శనగపప్పు,మినపప్పు,జీలకర్ర,కర్వేపాకు,2ఎండుమిర్చి, 2 పచ్చిమిర్చి
* ఉప్పు తగినంత , 2 స్పూన్స్ ఆయిల్

తయారీ:

* ముందు పనసగింజల తొక్కు తీసి, ఒకో గింజ నాలుగు ముక్కలు చేసి కాస్త ఉప్పు వేసి రెండు విజిల్స్ వచ్చేదాకా ఉడకబెట్టాలి.

* తర్వాత వంకాయ ముక్కలు కూడా ఉప్పు వేసి మరీ మెత్తగా కాకుండా ఉడకబెట్టాలి.

* తర్వాత మూకుడులో రెండు చెంచాల నూనె వేసి పైన చెప్పిన పోపు పదార్ధాలతో పోపు వేయించాలి.
* పోపు వేగాకా ఉడికిన పనసగింజలు, వంకాయముక్కలు వేసి, అందులో తీసిపెట్టుకున్న చింతపండు రసం, చిటికెడు పసుపు వెయ్యాలి. ముక్కలు ఉడికేప్పుడు వేసుకున్న ఉప్పు సరిపోకపోతే మరికాస్త ఉప్పు వేసుకుని కూర దగ్గర పడ్డాకా దింపేసుకోవాలి. వంకాయ - పనసగింజల కూర రెడీ !
* ఈ కూర అన్నంలోకి బావుంటుంది.

* ఇదే విధంగా వంకాయ బదులు బంగాళా దుంపలు పనసగింజలతో కలిపి కూర చేయచ్చు. చింతపండు అక్కర్లేదు.

నిన్న కొన్నిరకాల ఆవకాయలు గురించి రాసాను కదా.. ఇవాళ మూడు మాగాయ రకాలు చెప్పుకుందాం. చిన్న సలహా ఏంటంటే ఆవకాయకు, మాగాయకు కూడా కాయ కొనేప్పుడు పీచు ఉన్న మావిడికాయలు ఎన్నుకోవాలి. అప్పుడవి ఏడాదంతా నిలవ ఉంటాయి.
తురుముమాగాయ:

మామిడికాయ తురిమేసుకుని ఒక ఎండలో పెట్టాలి. పొద్దున్న పెట్టి సాయంత్రం తెచ్చేసుకోవచ్చు.

మామిడికాయలు ౩
100gms మెంతులు,
75gms ఆవాలు
150gms కారం
150gms ఉప్పు
1/4kg నూపప్పు నూనె

తయారీ:

* 1/4kg నునె కాగాకా అందులో చింతగింజంత ఇంగువ వేసి కాచి ఉంచాలి. ఇంగువ వెయ్యగానే బుడగలు వస్తాయి. అప్పుడు దింపెయ్యాలి.
* ఆవాలు,మెంతులు రెండూ విడివిడిగా పొడిమూకుడులో వేయించుకోవాలి. ఆవాలు నొక్కితే పొడుం అయ్యేలా వేయించాలి. మెంతులు ఎర్రగా వేగి కమ్మటి వాసన రావాలి. వీటిని విడివిడిగా గ్రైండ్ చేసుకుని ఉంచుకోవాలి.

* తురిమిన కోరు తెచ్చుకున్నాకా ముందుగా టీ గ్లాస్ ఉప్పు వేసి కలుపుకోవాలి.
* తర్వాత అందులో కారం, ఆ తరువాత వేయించి పొడి చేసుకున్న మెంతిపొడి ఆవ పొడి, ఇంగువ నూనె వేసి బాగా కలపాలి.
* మూడోరోజు మరి కాస్త (తగినంత) నూనె వేసి మళ్ళీ బాగా కలిపి జాడీలో దాచుకోవటమే.
---------------------------------------
మెంతికాయ:

మామిడికాయలు 6
ఉప్పు 1/4kg
కారం 1/4kg
100gms మెంతులు
40gms ఆవాలు
1/2kg నూపప్పు నూనె
ఒక చెంచా పసుపు

తయారీ:

* మావిడి ముక్కలు సన్నగా పొడుగ్గా తరిగి ఒకరోజు లేక ఒక పూట ఎండబెట్టాలి.
* 1/4kg నునె కాగాకా అందులో చింతగింజంత ఇంగువ వేసి కాచి ఉంచాలి. ఇంగువ వెయ్యగానే బుడగలు వస్తాయి. అప్పుడు దింపెయ్యాలి.
* ఆవాలు,మెంతులు రెండూ విడివిడిగా పొడిమూకుడులో వేయించుకోవాలి. ఆవాలు నొక్కితే పొడుం అయ్యేలా వేయించాలి. మెంతులు ఎర్రగా వేగి కమ్మటి వాసన రావాలి. వీటిని విడివిడిగా గ్రైండ్ చేసుకుని ఉంచుకోవాలి.
* కారంలో కాగిన నూనె కాస్త వేసి కలిపి తర్వాత ఉప్పు వేసి కలపాలి. నూనె చల్లారిన తర్వాత ఆవపిండి, మెంతిపిండి కలపాలి.
* తర్వాత ఎండిన ముక్కలు వేసి కలపాలి. తర్వాత పసుపు కూడా అందులో కలపాలి.
* మూడవ రోజున ఊట రాకపోతే కాస్త ఇంగువ నూనె కాచి చల్లార్చి ఊరగాయలో కలపాలి.
---------------------------------------
ఎండు మాగాయ:

మామిడికాయలు 4
ఉప్పు 1/4kg
కారం 1/4kg
150gms మెంతులు
150gms ఆవాలు
1 spoon పసుపు
450/500gms నూపప్పు నూనె

తయారీ:

* మామిడికాయలను తొక్కు తీసి సన్నగా పల్చగా ఉండేలా ముక్కలు పీలర్ తో పీల్ చేయాలి.
* ముక్కల్లో 1/4kg ఉప్పు, ఒక చెంచా పసుపు కలిపి జాడీలో పెట్టాలి.
* రెండవరోజు బాగా కలపాలి. మూడవరోజు జాడీలో కాస్త ఊట కనిపిస్తుంది.
* మూడవరోజు ముక్కలు మాత్రం తీసి ఎండలో పెట్టాలి. సాయంత్రం మళ్ళీ జాడిలో ఉన్న ఊటలో ముక్కలు వేసేయాలి.
* అలా ముక్కలని రెండు మూడు రోజులపాటు ముక్క విరిగేలా ఎండేదాకా ఎండబెట్టాలి. చివరిరోజు ఊట కూడా ముక్కలతో పాటూ విడిగా ఎండలో పెట్టాలి.
* ఎండబెట్టడానికి మూడురోజులు సరిపోతాయి.
* మూడవరోజు 1/4kg కారం వేసి ముక్కలు, ఊట అన్నీ కలిపాలి.
* తర్వాత ఆవాలు,మెంతులు విడివిడిగా వేయించి , విడివిడిగానే పొడి చేసుకుని ఊరగాయలో కలపాలి.
* చింతగింజంత ఇంగువ వేసి 1/4kg పప్పు నూనె కాచి, చల్లార్చి ఊరగాయలో వెయ్యాలి.
* జాడీలో పెట్టిన మూడవరోజు కాస్త ఇంగువ వేసి 200gms నూనె కాచి చల్లార్చి ఊరగాయలో కలపాలి.

రకరకాల ఆవకాయలు మాగాయల list గతంలో "మామ్మయ్య - ఊరగాయలు !" టపాలో రాసాను. తర్వాత క్రితం ఏడాది ఊరగాయలు పెట్టాకా "ఊరగాయ వైరాగ్యం" అని కూడా రాసానా... పది కాయలకే నేనిలా అనుకుంటే వందల లెఖ్ఖలో ఆవకాయలు, మాగాయలు పెట్టిన అమ్మమ్మలూ, నాన్నమ్మలూ ఎలా పెట్టేవారో, పెట్టాకా ఏం అనుకునేవారో అనుకుంటూ ఉంటాను ! నేనైతే ఈసారి మూడే మూడు రకాలు పెట్టాను. వెల్లుల్లి ఆవకాయ, తురుము మాగాయ, మెంతికాయ.

ఈసారి కొన్ని రకాల ఆవకాయలు, మాగాయలు రకాలు ఈ బ్లాగులో రాద్దామని. ఈ టపా అయితే ప్రత్యేకంగా బ్లాగ్మిత్రులు సునీత గారి కోసం ! ఇంకా ఊరగాయలు పెట్టుకోనివాళ్లెవరన్నా ఉంటే ఈ రకాలు ట్రైచేయండి..

1) పెసర ఆవకాయ:

పచ్చిపెసరపప్పు గ్రైండ్ చేసి, జల్లించాకా వచ్చిన మెత్తటి పచ్చి పెసరపిండితో ఈ ఆవకాయ పెడతారు. ఇందులో ఆవపిండి కలపరు. పెసరపిండి ఉంటుంది కాబట్టి కమ్మగా ఉంటుందీ ఆవకాయ.

పాళ్ళు:
5 మావిడికాయలు (మామూలు ఆవకాయకు లాగానే కొట్టించుకోవాలి)
1/4kg కారం
1/4kg ఉప్పు (రాళ్ళ ఉప్పు మెత్తగా పౌడర్ చేసినది అమ్ముతారు. అది వాడితే మంచిది)
300gms జల్లించిన పచ్చి పెసరపిండి
అరచెంచా పసుపు
1/2 kg నూపప్పు నూనె
తయారీ:

* పచ్చిపెసరపప్పు గ్రైండ్ చేసి, జల్లించాకా వచ్చిన మెత్తటి పెసరపిండి కొలిచి పక్కన పెట్టుకోవాలి.
* ఉప్పు ఉండలు లేకుండా చూసుకుంటూ ముందు పొడులన్నీ బాగా కలపాలి.
* తర్వాత పసుపు, 1/4kgనూనె వేసి కలిపి, ముక్కలు కూడా వేసి కలపాలి.
* ఆవకాయ కలిపిన మూడవ రోజు ఊరగాయ మళ్ళీ బాగా కలిపి మిగిలిన 1/4kg నూనె వేసి కలిపి జాడీలోనో సీసాలోనో పెట్టేసుకోవటమే.

***********************************************
2)అల్లం ఆవకాయ:
ఇందులో కూడా ఆవ బదులు అల్లంవెల్లుల్లి ముద్ద కలుపుకోవాలి.

పాళ్ళు:
5 మావిడికాయలు (మామూలు ఆవకాయకు లాగానే కొట్టించుకోవాలి)
1/4kg కారం
(రాళ్ళ ఉప్పు మెత్తగా పౌడర్ చేసినది అమ్ముతారు. అది వాడితే మంచిది)
1/4kg అల్లంవెల్లుల్లి ముద్ద ( ఫ్రెష్ గా ఇంట్లోనే గ్రైండ్ చేసుకుంటే మంచిది)
అరచెంచా పసుపు
1/2 kg నూపప్పు నూనె


తయారీ:

* ముందుగా అల్లం,వెల్లుల్లి పొట్టు తీసుకుని, మెత్తగా ముద్దలా గ్రైండ్ చేసుకోవాలి.
* పావుకేజీ నూనె మూకుడులో పోసి, అది వేగాకా ఓ చెంచాడు ఆవాలు వేసి వెగనివ్వాలి.
*తర్వాత గ్రైండ్ చేసిన అల్లంవెల్లుల్లి ముద్ద వేసి మాడకుండా వేగనివ్వాలి.
* అల్లంవెల్లుల్లి ముద్ద వేగాకా స్టౌ ఆపేసి అందులో 1/4kg కారం, 1/4kg ఉప్పు, అర చెంచా పసుపు అందులో కలపాలి.
* చల్లారాకా మామిడి ముక్కలు వేసి బాగాకలుపుకోవాలి.
* ఆవకాయ కలిపిన మూడవ రోజు ఊరగాయ మళ్ళీ బాగా కలిపి మిగిలిన 1/4kg నూనె వేసి కలిపి జాడీలోనో సీసాలోనో పెట్టేసుకోవాలి.
**********************************

3)పులిహోర ఆవకాయ:

కావాల్సినవి:

ఐదు మావిడికాయలు ఆవకాయ కోసం కొట్టినట్లుగా కాకుండా బాగా చిన్నగా కొట్టించుకోవాలి.
1/4kg కారం
1/4kg ఉప్పు (రాళ్ళ ఉప్పు మెత్తగా పౌడర్ చేసినది అమ్ముతారు. అది వాడితే మంచిది)
1/4kg ఆవపిండి
అరచెంచా పసుపు
1/2 kg నూపప్పు నూనె
తయారీ:

* ఆవకాయకు కలుపుకున్నట్లే ముందుగా పొడులన్నీ కలిపేసి, తర్వాత 1/4kg నూనె, ముక్కలు వేసి కలిపేయాలి.
* మూడవ రోజున యధాప్రకారం మిగిలిన 1/4kg నూనె వేసి కలిపేసి జాడిలో పెట్టేయాలి.

తర్వాత "పులిహోర ఆవకాయ" తినాలనిపించినప్పుడు ఏం చెయ్యాలంటే:

* ఓ 100gms ఆవకాయ బయటకు తీసుకోవాలి.
* 100gms నూపప్పు పొడిగా దోరగా వేయించి, మెత్తగా గ్రైండ్ చేసుకోవాలి.
* ముకుడులో ఆవాలు,శనగపప్పు, కర్వేపాకు, చిటికెడు ఇంగువ వేసి పోపు పెట్టుకోవాలి.
* గ్రైండ్ చేసిన మెత్తటి నూపప్పు, పోపు తీసిపెట్టుకున్న ఆవకాయలో బాగా కలిపేస్తే పులిహోర ఆవకాయ రెడీ.

పెసరావకాయ పెట్టుకున్నట్లు నూపప్పు పొడెం ఆవకాయ కలిపేసుకోవచ్చు. కానీ అప్పటికప్పుడు పోపు పెట్టుకున్న ఫ్రెష్నెస్ దానికి ఉండదు. అందుకని పులిహోర ఆవకాయ అంటే ఇలా అప్పటికప్పుడూ చేసుకోవటమే ఉత్తమం.

ఈవాళ్టికి ఇవి చాలు. మళ్ళీ రేపు మరికొన్ని రకాల ఊరగాయలతో వస్తానేం !!

ఇదివరకు ఓసారి ఈ కూర తృష్ణ లో రాసాను. ఒక్క కొబ్బరి మాత్రమే వేసి చేసాను అప్పుడు. ఇవాళ ఇదే కూరలో కొబ్బరిలో అల్లం, పచ్చిమిర్చి కలిపి గ్రైండ్ చేసి వండాను. బాగా వచ్చింది.




తయారీ:


* పచ్చి బొప్పాసి కాయ మధ్యలో గింజలు తీసేసి తురుముకోవాలి.


* చిన్న అల్లం ముక్క, నాలుగు పచ్చిమిర్చి,కొబ్బరి ముక్కలు కలిపి గ్రైండ్ చేసుకుని పక్కన పెట్టుకోవాలి. 


* కుక్కర్లో అయితే కొద్దిగా (అంటే తురుము క్వాంటిటిలో సగం నీళ్ళు) పోసి ఒక్క కూత రాగానే ఆపేసుకుని తడంతా పోయేలా వడబోసేసుకోవాలి. తక్కువ నీళ్ళు పోస్తాం కాబట్టి వడబోసినప్పుడు కాస్తంత మాత్రమే నీళ్ళు పోతాయి.

* శనగపప్పు,మినపప్పు,ఆవాలు,జీలకర్ర, కర్వేపాకు,ఒక ఎండు మిర్చి పోపు పెట్టుకుని, అందులో గ్రైడ్ చేసుకున్న కొబ్బరికోరు వేసి కాస్త వేగాకా ఉడికించి ఉంచుకున్న బొప్పాయి తురుము వేసి బాగా కలపాలి.


* ఈ కూర అన్నంలో కన్నా చెపాతీల్లోకి బాగుంటుంది.

చిన్న చిన్న మావిడి పిందెలతో ఆవబద్దలు పెట్టేది అమ్మ. మామూలు టేంపరరీ ఆవబద్దల్లా కాక చిన్న చిన్న పిందెలతో పెట్టడం వల్ల దీనికి ’వగరు రుచి అదనం. ఈ ఆవబద్దల వెనుక ఒక కమ్మటి జ్ఞాపకం ఉంది..


మా క్వార్టర్స్ లో, పక్కనే ఉన్న రేడియో స్టేషన్ ఆవరణలోనూ మావిడి చెట్లు ఉండేవి. ఉగాది సమయానికి ఆ చెట్ల నిండా మావిడి పిందెలు కళకళలాడుతూ ఉండేవి. కాస్త ఎక్కువ గాలి వీస్తే కొన్ని పిందెలు రాలిపడిపోతూ ఉండేవి. మా క్వార్టర్స్ లో అందరికీ పనులు చేసిపెట్టే ప్యూన్ ఒకతను ఉండేవాడు. అతను బుజ్జి బుజ్జి మావిడి పిందెలు రాలినప్పుడల్లా ఏరుకొచ్చి అడిగినవాళ్లందరికీ ఇస్తుండేవాడు. అలా మార్కెట్లో పెద్ద మావిడికాయలు వచ్చేదాకా మా ఇంట్లో చిన్న చిన్న మావిడి పిందెలతో ఆవబద్దలు, మెంతిబద్దలు పెడుతూండేది అమ్మ.


మాకు క్రితం వారం మా సంతలో దొరికాయి మావిడి పిందెలు. కొనేసి ఆవబద్దలు పెట్టేసా.

మామూలు టేంపరరీ ఆవబద్దలు పెట్టుకున్నట్లే ఇదీ పెట్టేసుకోవటం --
* మావిడి పిందెలు లోపల జీడి తీసేసి, చిన్నగా తరిగేసుకుని ,
* ఉప్పు, ఆవపొడి, కారం 1:1:1 పాళ్ళలో తీసుకుని,

* నూనె వేసి కలిపేసుకుని,

*అందులో తరిగిన బుల్లి బుల్లి మావిడిపిందెల ముక్కలు కలిపేసుకోవటమే !

*వగరుగా, పుల్లగా, కారంగా ఈ ఆవబద్దల రుచి చాలా బావుంటుంది.

ఆనపకాయతో పాలు పోసి వండే కూర, అల్లంపచ్చిమిర్చి, కొత్తిమీర కారం, నూపప్పు కారం, కూటు, పప్పుకూర, పెసరపప్పు పొడికూర, పంచదార వేసి తియ్యకూర మొదలైన ఎన్నో రకాల కూరలు వండుకోవచ్చు. అయినా సరే నీటి శాతం ఎక్కువ ఉండి రుచిలో చప్పదనం ఎక్కువ ఉండటం వల్ల ఎక్కువమంది ఆనపకాయ కూరను ఒక పథ్యం కూరగానే పరిగణిస్తారు. ఆనపకాయ కూర కూడా ఓ కూరేనా? అనేవారు కూడా ఉన్నారు.

పైన రాసినవి కాక ఆనపకాయతో చపాతీ లేదా పూరీల్లోకి తినేలాంటి రెండు రకాల కూరలు బొంబాయిలో ఉండగా మా పక్కింటి ఆంటీ దగ్గర నేర్చుకున్నాను. అందులో ఒకటి ఈ టపాలో చెప్తున్నాను. చేస్కోవటమ్ చాలా తేలిక. ఎలాగంటే --

ఆనపకాయ పావుకేజీ
గుప్పెడు వేరుశనగపప్పు(పల్లీలు)
ఒక ఉల్లిపాయ (మీడియం సైజు)
పచ్చిమిరపకాయలు మూడు లేక నాలుగు
అల్లం,వెల్లుల్లి పేస్ట్ ఒక చెంచా

తయారీ:

* ముందుగా గుప్పెడు వేరుశనగపప్పు(పల్లీలు) పొడిగా వేయించి పేస్ట్ లా గ్రైండ్ చేసుకోవాలి.
* తర్వాత తరిగిన ఆనపకాయ ముక్కలు ఉప్పు వేసి కొంచెం నీళ్ళలో ఉడకబెడితే నీళ్ళు మిగలకుండా, రంగు మారకుండా ఉడుకుతాయి ముక్కలు.

* తర్వాత మూకుడులో రెండు చెంచాలు నూనె వేసి సన్నగా తరిగిన ఉల్లిపాయ ముక్కలు, పచ్చిమిర్చి ముక్కలు వేసి వేయించాలి.

* దానిలో ఒక చెంచా అల్లమ్వెల్లుల్లి పేస్ట్ వేసి, అది వేగాకా గ్రైండ్ చేసుకున్న వేరుశనగపప్పు(పల్లీల) పేస్ట్ అందులో వేసి కలపాలి. ఈ మిశ్రమం క్రింద ఫోటోలోలాగ జారుగా ఉండాలి. అవసరమైతే కాసిని నీళ్ళు పోసుకోవాలి.

* సుమారు ఐదు నిమిషాలు ఈ మిశ్రమం ఉడకనివ్వాలి. మధ్య మధ్య కలుపుతూ ఉండాలి. మిశ్రమం ఉడికాకా ఇలా ఉంటుంది.

* అందులో ఉడికిన ఆనపకాయ ముక్కలు వేసి మరో ఐదు నిమిషాల తరువాత దింపేసుకోవాలి.

* ఈ కూర చపాతీ, రోటీ, పూరీ దేన్లోకయినా బావుంటుంది.

వంటింట్లో కందిపప్పు వేయిస్తూంటేనే ఆ వాసనకి మా మావగారు వంటింట్లోకి వచ్చేసేవారు కండిపచ్చడి చేస్తున్నావా? అని. ఆయనకు ఎంతో ఇష్టం కందిపచ్చడి. ఆయన సూపర్ వంటల స్పెషలిస్ట్ కూడా. చిన్నతనంలో వాళ్ళ చెల్లెళ్లకూ, తమ్ముళ్ళకూ ఆయనే వండి పెట్టేవారుట. కందిపచ్చడి, టమాటో పచ్చడి ఆయన రోట్లో రుబ్బుతూంటే సగం రోట్లోనే ఖాళీ అయిపోయేవట. పైగా వాళ్లవన్నీ గుంటూరు కారాలు. మా పెళ్ళైన మొదట్లో పాపం అన్నీ తినేవారు కానీ తర్వాతర్వాత ఆయనకు ఫుడ్ రెస్ట్రిక్షన్స్ చాలా ఉండేవి. అందుకని ఆయన తినకూడరని ఆయనకు ఇష్టమైనవేమో వండేవాళ్లం కాదు. ఆయన కాలంచేసి నాలుగేళ్లవుతున్నా ఇప్పటికీ కందిపచ్చడి చేస్తే కళ్ళల్లో నీళ్ళు తిరుగుతాయి..!! ఆయనను తలవకుండా ఈ టపా కూడా రాయలేను మరి..


సరే, కొబ్బరి + కంది పచ్చడి లోకి వచ్చేస్తే... ఎర్రగా వేయించిన కందిపప్పు లో నానబెట్టిన చింతపండు, ఉప్పు, ఎర్ర మిరపకాయలతో వేయించిన పోపు కలిపి మెత్తగా గ్రైండ్ చేసి, ఘుమఘుమలాడే కందిపచ్చడి రెడి అయిపోతుంది కదా ! మా నాన్నమ్మ ఇదే కందిపచ్చడిలో కొబ్బరి కలిపి కొబ్బరి + కంది పచ్చడి చేసేది. అదీ చాలా బావుంటుంది. ఎలాగంటే..

ఒక కొబ్బరి చిప్ప (half coconut)
150gms కండిపప్పు
నిమ్మకాయంత నానబెట్టిన చింతపండు
రెండు పచ్చిమిరపకాయలు
పోపుకి: ఐదారు ఎండు మిరపకాయలు, ఒక చెంచా మినపప్పు, కొద్దిగా ఆవాలు, జీలకర్ర, చిటికెడు ఇంగువ, చిటికెడు పసుపు, కర్వేపాకు

* ముందుగా కందిపప్పు ఏమాత్రం మాడకుండా ఎర్రగా వేయించుకోవాలి. పచ్చడి రుచి అంతా ఈ వేయించటంలోనే దాగి ఉంటుంది. వేగిన కందిపప్పు  మిక్సీలో కాస్త తిప్పాలి.

*   కందిపప్పు   కాస్త నలిగాకా చింతపండు, కొబ్బరి(కొబ్బరిచిప్ప ముక్కలు చేసి గ్రైండ్ చేసుకున్నా సరే, లేక తురుముకున్నా సరే), ఉప్పు, పచ్చి మిర్చి, పోపులో వేగిన ఎండు మిరపకాయలు వేసి బాగా మెత్తగా గ్రైండ్ చేసుకోవాలి. పచ్చడి మరీ గట్టిగా అనిపిస్తే కాసిని నీళ్ళు పోసికోవచ్చు గ్రైండ్ చేసేప్పుడు.

* పచ్చడితో పాటూ గ్రైండ్ చేసే కన్నా పచ్చడి గిన్నెలోకి తీసాకా వేగిన పోపు పైన వేసి కలిపితే ఏ పచ్చడి అయినా బావుంటుంది.

కొబ్బరి వెయ్యని కందిపచ్చడికి ఒక టిప్:


* గ్రైండ్ చేసేప్పుడు రెండు మూడు వెల్లుల్లి రేకులు వేసుకుంటే ఉత్తి కంది పచ్చడి మరి మరీ రుచికరంగా ఉంటుంది.

నారింజకాయ
నిన్నుచూడగానే
నోరూరుతుంది
తొక్కతీసి తింటే
అబ్బబ్బ పులుపు
తిననే తినను...

అంటూ చిన్నప్పుడు పాడుకునేవాళ్ళం కదా..! 
నారింజకాయ చాలా పుల్లగా ఉంటుంది. బాగా పండితే తియ్యగా మారితుంది. సిటీల్లో అరుదుగా దొరికే ఈ నారింజకాయ చెట్టు ఒకటి అన్నయ్య వాళ్ల ఫ్రెండ్ ఇంట్లో ఉందిట. ఏవో మాటల్లో "ఆ కాయలేమిటో తెలీవు. ఏంచేసుకోవాలో తెలీక పడేస్తూ ఉంటాం" అన్నాడట అతను.. అయ్యో మేం వాడతాం..చెట్టుకెన్నుంటే అన్నీ పట్టుకురా అని అన్నయ్య నారింజకాయలు తెప్పించి నాకూ ఇచ్చాడు.

నారింజకాయతో చేసే "నారింజకాయ కారం" చాలా బావుంటుంది. రెండు రకాలుగా దీనిని చేయచ్చు..

మొదటిరకం:


* ఒక నారింజకాయ ఉంటే రెండు పెద్ద చెంచాలు నూనె వేడి చేసుకోవాలి.

* కాగిన నూనెలో పావుచెంచా ఇంగువ వేసి కాగాకా, మూడు చెంచాలు మెంతిపిండి వెయ్యాలి. తర్వాత మూడు చెంచాల కారం కూడా వేసి స్టౌ ఆపేయాలి. ఆ వేడికి కారం కూడా వేగుతుంది. ఇది చల్లర్చాలి.

* విడిగా ఒక గిన్నెలో నారింజకాయలు రసం తీసి,(రసం తీసేప్పుడు చెయ్యి తగలకుండా చూసుకోవాలి.లేకపోతే రసం చేదు వచ్చేస్తుంది) అందులో తగినంత ఉప్పు(కారానికి సమానంగా), ఒక చెంచా పచ్చి ఆవ పొడి(పచ్చిదే) వేసి బాగా కలిపిన తర్వాత కాచి చల్లార్చిన మెంతిపిండి మిశ్రమం అందులో కలపాలి.

రెండవరకం:
* రెండు చెంచాలు మినపప్పు
* రెండు చెంచాలు ఆవాలు
* నాలుగు చెంచాలు మెంతులు
* పది పన్నెండు ఎండు మెరపకాయలు
-- ఇవన్నీ కలిపి కాస్త నూనెలో వేయించి, చివరలో పావుచెంచా ఇంగువ కూడా వెయ్యాలి. చల్లారాకా మెత్తగా గ్రైండ్ చేసుకోవాలి.

తర్వాత నారింజకాయ రసం తీసుకుని, అందులో ఈ గ్రైండ్ చేసుకున్న మిశ్రమం వేసి, తగినంత ఉప్పు వేసుకుని మొత్తం బాగా కలుపుకోవాలి.

ఇదేవిధంగా నిమ్మకాయ కారం కూడా చేసుకోవచ్చు.

వేడి వేడి అన్నంలో ఈ నారింజకాయ కారం కలుపుకుని, కాస్తంత నెయ్యి వేసుకుని తింటే... అమృతం అంటే ఇదేనేమో అనిపించకమానదు !!